Onger Akaba 110 - Godɨn Eghaghanim: Akar Gavgavir Dɨkɨrɨzir Ghurim ko Igiam

Ikiavɨra Itir God gavgavim isa atrivim ganɨdir ighiam

Kar Godɨn ziam fer onger akam. Devit an osiri.

¹ Ikiavɨra Itir God, nan Ekiam mɨgɨa ghaze, “Nɨ nan agharir guvimɨn daperagh ikɨ mangɨtɨ, kɨ nɨn apaniba dɨkabɨragh me isɨ nɨn dafarim datɨghtɨ me nɨn dagarimningɨn apengan ikiam.”

² Ikiavɨra Itir God nɨ damightɨ, nɨ Saionɨn nguibamɨn ikɨ gavgavir ekiam ikɨ nguibar avɨribagh ativagh dar ganam. God ghaze, nɨ uan apanibagh ativagham.

³ Nɨ uan apanibav soghamin dughiam, nɨn gumazamiziba uaghan nɨ ko mangɨ nɨn akurvagham, egh ia Godɨn mɨghsɨamɨn ghuavanangam. E gari ghuariabar amariba dɨmagaribar ira azenibagh iri da aghua dagher avɨriba iti. Kamaghɨra, nɨ dughiabar zurara gavgavim ini mamaghɨra ikɨ, egh gumazir igiamɨn mɨn otogham.

⁴ Ikiavɨra Itir God Akar Gavgavim nɨ koma anekɨrigha gɨfa, egh uan nɨghnɨzim giraghan kogham. A ghaze, “Nɨ ofa gamir gumazimɨn ikɨ mamaghɨra ikiam. Nɨ Melkisedeghɨn mɨn ofa gamir gumazimɨn ikiam.”

⁵ Ekiam gavgavim nɨ danɨngasa nɨ ko iti. Eghtɨ an anɨngagharir dughiam otoghtɨ an atriviba tintinimɨn me mɨsogh me gasɨghasɨgham.

⁶ A nguazimɨn gumazamizibar arazir kuraba ikarvagh, egh mɨdorozir danganibar a gumazir avɨribav soghtɨ me arɨmɨghiram. An atrivir avɨriba ko mɨsogh me abɨnam.

⁷ Atrivim tuavir mɨriamɨn ivemarir daghurir dɨpabar amɨ, egh a gavgavim inigh, uan apaniba dɨkabɨragham.