Onger Akaba 11 - Godɨn Eghaghanim: Akar Gavgavir Dɨkɨrɨzir Ghurim ko Igiam

Gumazim nɨghnɨzir gavgavim Godɨn iti

An onger akabar faragha zuir gumazim gɨnɨghnɨgha, onger akar kam osiri.

¹ Kɨ nɨghnɨzir gavgavim Ikiavɨra Itir Godɨn ikia kamaghɨn fo, a na geghuva nan gari. Nɨ ti onganigh kamagh na mɨkɨm suam, “Nɨ kuarazimɨn mɨn mɨghegh mɨghsɨamɨn mavanang.”

² Guizbangɨra, gumazir kuraba uan barir pibagh afegha gɨfa. Me amɨnirbɨrimɨn uan baribar gumazir aghuibagh asasava ami.

³ Gumazamiziba arazir aghuiba ateghtɨ biziba bar ikuvightɨ, gumazir arazir aghuibar gɨn zuim manmaghɨra damuam?

⁴ Ikiavɨra Itir God uan Dɨpenimɨn aven ikiavɨra iti. A uan Nguibamɨn atrivimɨn ikiavɨra iti, egha gumazamiziba amir biziba a bar moghɨra dar gara da tuisɨsi.

⁵ Ikiavɨra Itir God, a gumazamizir aghuiba ko kuraba uaghara men araziba tuisɨgha men gari. Egha gumazir mɨsoghasa ifongeziba, a uan navir averiamɨn aven bar men aghua.

⁶ An avir bar puvɨra isia feim gumazir kurabagh inge. Kar a men ivezir kuram ikarvazima, men mɨkarziba bar puvɨra men feima me mɨzazir kuram isi.

⁷ Guizbangɨra, Ikiavɨra Itir God arazir aghuibagh ami. A uabɨ arazir aghuim bar a gifonge. Gumazamiziba an akam baragh an gɨn mangɨva, an guamɨn ganam.