Onger Akaba 1 - Godɨn Eghaghanim: Akar Gavgavir Dɨkɨrɨzir Ghurim ko Igiam

Akɨnafarir namba 1 ( Onger Akaba 1--41 ) Godɨn damazimɨn derazir gumazamiziba ko, gumazamizir arazir kurabagh amiba

¹ Gumazamizir kamaghɨn amiba, me bar akongegh: me gumazamizir arazir kurabagh amibar akaba baragha men gɨn aruir puvatɨgha, tuavir gumazamizir kuraba zuiba, me men gɨn zuir puvatɨgha, Godɨn akaba batogha da dɨpovir gumazamiziba ko, apiaghirir puvatɨ.

² Gumazamizir kaba, bar Ikiavɨra Itir Godɨn Arazibagh ifongegha, dɨmagariba ko aruebar dar gara pamtem dagh nɨghnɨghavɨra iti.

³ Me mati temem, me dɨpar mɨriamɨn anekara. A uan dughiamra bava, dafariba mɨdir puvatɨ. Kamaghɨra, bizir me amiba bar, da deraghavɨrama otifi.

⁴ Ezɨ gumazamizir arazir kurabagh amiba, me kamaghɨn ikian kogham. Bar puvatɨ. Amɨnim raizɨn mɨsevibagh ivarazɨ da zui moghɨn, bizir me amiba deragh otivan kogh, dagheba dar puvatɨgh pura mangam.

⁵ Kamaghɨra, gumazamizir arazir kurabagh amiba, God uan kotiamɨn me batuegh ivezir kuram me danɨngtɨ, me Godɨn damazimɨn derazir gumazamizibar saghon ikiam.

⁶ Guizbangɨra, gumazamizir Ikiavɨra Itir Godɨn damazimɨn deraziba, a me geghuv deragh men ganam. Eghtɨ gumazamizir arazir kurabagh amiba, me bar ikuvigh ovegham.