Gara Worra Qolasaayisii 4 - Waadaa Haarawa

¹ Yaa gooftota! Isin'llee sami'itti gooftota akka qabddan beekittanii tajaajiltoota keessan, qajeelumma'aa fi wol qixxumma'aan isaan bulchaa.

Gorssa Dabalataa

² Waaqa dammaxxanii galateeffachu'uun, uduu addaan hin kutin kadhadhaa

³ kanaan woliin'llee Waaqinni dubbii isaatiif balbala akka nuuf banuu fi waayee isaatiin hidhamee bakka ani itti argamu kanatti, dhossaa Kristosii lallabu'uuf akka dandda'u nuuf'llee kadhadhaa.

⁴ Ani'llee akka narraa malutti dubbii isaa ifatti akka dubbadhuuf, naa kadhadhaa.

⁵ Yeroo carraa kamii tittuu fayyadama'aa namoota hin amanne biratti, ogumma'aan jiraadhaa.

⁶ Tokkoo tokkoo namaatiif deebii barbaachisaa ta'e kennuu akka beekittaniif, yeroo maraa haasofnni keessan bifaa fi mi'aa ka qabu haa ta'u.

Nagaya Muumme'ee

⁷ Xikiqoos waayee kiyya waan maraa isinitti ni hima, inni obboleessa jaalatamaa, tajaajilaa amanama'aa fi hujii Goofta'aatiin'llee waahela kiyya ka tajaajilaati.

⁸ Isa waayeen gara keessan ergeef waayee haala keenna akka isinitti himuu fi onnee teessan'llee akka jajabeessuuf.

⁹ Isa woliin'llee worra keessan ka ta'e ka amanamee jiruu fi ka jaalatame obboleessi keenna Oneesimos gara keessa ni dhufa, isaan waayee waan bakka kana jiru maraa isinitti ni beekisisan.

¹⁰ Anaan woliin ka hidhame Arisxaarkos'llee nagaya isiniif ni dhiyeessa, yeroo tokko «Gara keessan yeroo dhufutti akka ufitti fudhattaniin» jedhee, isin yaadachiisee ka ture, ilma abbeeraa Baarnaabaasii Maarqoos'llee, nagaya isinii dhiyeessa.

¹¹ Iyosxoos jedhamee'llee ka waamamu Iyyaasuun nagaya isinii ni dhiyeessa. Waayee Mootummaa Waaqaatiif anaan woliin namoota hojjatan jiddu'uu worra Yihudotaa ka ta'an kanniin qofa, ana'llee jajabeessanii jiran.

¹² Worra keessan ka ta'e tajaajilaan Yesus Kristosii Ephafaarm nagaya isiniif ni dhiyeessa, jireenna hafuuraatiin guddachu'uun jabaattanii akka dhaabattanii fi fedha Waaqaa maraa akka raawwattaniif, inni yeroo maraa isiniif ni kadhata.

¹³ Waayee keessan Loodooqiya'aa fi magaalota Heraapholisii waayee namoota jiraniitiif'llee haalaan akka dadhabu, ani mataan kiyyaa ragaa ni bayaaf.

¹⁴ Ka jaalatame ogeessi fayya'aa Luqaasii fi Deemaas'llee, nagaya isinii ni dhiyeessan.

¹⁵ Obboleeyyan Loodooqiya'aa jiran Nimufu'uu fi woldaya amanti'ii ta mana isi'ii jirttuuf'llee, nagaya naa dhiyeessaa.

¹⁶ Ergaa kana isin eega dubbiffattaniin duubatti namoota Loodooqiyaa bira woldaya jirttutti'llee akka dubbiffamttu taasisaa, isin'llee ergaa Loodooqiyaa isiniif ergamu dubbisaa.

¹⁷ Arkiphosiin'llee, «Tajaajila Gofta'aatiin hujii si'iif kenname ufi eegganna'aan akka raawwatu» jedha'aatii itti naa himaa.

¹⁸ Nagaya kana harka kiyyaan ka barreesse ana Phaawulos, birbiraataan hidhamee akka jiru yaadadhaa. Kennaan Waaqaa ka bilisaa isin woliin haa ta'u.