2 Gara Ximotewoosii 3 - Waadaa Haarawa

Guyyoota Muumme'ee Titti Wonittoota Hamaa Ta'an

¹ Guyyoota muummee titti yeroon sarddamissiisu akka dhufu beeki,

² Namoonni mataa isaanii ka jaalatan, qarshi'iif ka haafayan, ufi dhaaddota, ufi tuultota, worra nama arrabissan, maatii isaaniitiif ka hin ajajaminne, galata dhabeeyyii, qulqullummaa ka hin qabnne,

³ jaalala ka hin qabnne, dhiifama worra hin taasfnne, maqaa namaa worra balleessan, mataa isaanii ka hin toowanne, gara jabeeyyii, waan mishaa ta'e ka jibban,

⁴ ganttoota, ufi eeggannaa ka hin qabnne, ufi tuulummaan ka afuufaman, Waaqa jaalachuu irra gammachuu foonii isaanii ka jaalatan ni ta'an.

⁵ Waaqa ka waaqeffatan fakkaatanii ni muldhatan, huminna waaqeffanna'aa garuu ni waakkatan, namoota akkana jiran irraa fagaadhu.

⁶ Namoonni kunniin gara mana maraa huluuqanii aseenu'uun, dubarttoota cubbuun baayi'een isaan irratti tuulameef, hawwii adda addaatiin worra eemaraman, dubarttoota hafuuraan dadhabddootaa ta'an, akka namoota isaan qabaniiti.

⁷ Dubarttoonni akkanaa kunniin yeroo maraa ni baratan, garuu dhugaa gara beeku'uu gayu'uuf hin danda'an.

⁸ Yaaneesii fi Yaambres akkuma Muse'een mormmanitti namoonni kunniin sammuun isaanii worra badee fi waayee amanti'iitiin'llee worra kufaatiin isaan irra gaye waan ta'aniif, dhugaa ni mormman.

⁹ Gowwummaan Yaaneesii fi Yaambresii akkuma muldhatetti gowwummaan namoota kanniinii'llee, nama mara duranatti waan muldhatuuf isaanii hin mijaayu.

Gorssa Muumme'ee

¹⁰ Ati garuu barsiisa kiyya, akkaataa jireenna kiyyaa, kaayyoo kiyya, amantii kiyya, obissa kiyya, jaalala kiyyaa fi waan qabadheen jajabaachuu kiyya horddof,

¹¹ akkuma kana ari'atama kiyyaa fi rakkinna kiyya ni beekitta, Anxokiya'aa fi Iqoniiyumi, Lisxira'aatti'llee waan ana irra gayee fi obissaan ari'atama fudhadhe'llee ni beekitta, Gooftaan garuu mara jalaayyuu ana ni fayyise.

¹² Worra gosa Yesus Kristosiin ta'anii jireenna hafuuraa jiraachuu worri barbaadan marinuu, ari'ataminni isaan irra ni gaya.

¹³ Garuu namoonni hamaaleyyi'ii fi fakkeesitoonni garuu, namoota dogoggorssa'aatii fi mataa isaanii'llee dogoggorssa'aa, hamaa irratti hammeenna dabala'aa ni deeman,

¹⁴ Ati garuu ka baratte eennuun irraa akka ta'e waan beekittuuf, ka barattee fi dhugaa hubatteen'llee jabaadhu.

¹⁵ Akkuma kana ijoollummaa keetii jala qabddee Yesus Kristostti amanu'uun, barsiisa fayyinni ittiin argamu ka siif kennan kitaabban Qulqulluu ta'an beekittee jirta.

¹⁶ Kitaabnni Qulqulluun marrinuu eemarittii Hafuura Waaqaatiin ka barreeffame, isaan dhugaa barsiisu'uuf, worra dogoggoran itti baanachu'uuf, dogoggora sirreessu'uu fi eemarittii jireenna sirrii ta'eef tolu kennu'uuf ni fayyada.

¹⁷ Ka fayyadu'llee naminni Waaqaa muda maleessa akka ta'uu fi hujii mishaa kamiinuu hojjachu'uuf, gayaa ta'ee akka argamuuf.