Saumu 87 - Ritonõpo Omiry: A Bíblia Sagrada na língua Aparai do Brasil

Jerusarẽ, Ritonõpo patary

Kora tõ nymerohpyry.

^1-2 Ypy kurã po typatary tyrise Ritonõpo a; imehnõ pata tõ motye Izyraeu tõ nonory po, pata Jerusarẽ sehxo mana.

³ Etako pahne, Ritonõpo patary, aotururu kurã Jerusarẽ poko:

⁴ “Ahno esehtoryhtao ya jomiry omipona exiketõme, Ejitu esehtõko ase, Papironia roropa; Pirixitea põkomo, Tiro põkõ maro, Etiopia põkõ roropa: mokaro rĩko ase Jerusarẽ po aenurutyã samo.”

⁵ Pata Jerusarẽ poko ynara ãko mã toto: ahno tõ emero rokẽ nonory poe moro pata po osesarĩko mã toto, mame Ritonõpo Imehxo Exikety mã moro pata rĩko jamihme.

⁶ Ahno tõ esety merõko Ritonõpo mana; mokaro emero Jerusarẽ põkõme exĩko mã toto.

⁷ Wãko mã toto, eremiãko roropa, ynara ãko mã toto: “Jerusarẽ pokoino kure rokẽ sytatose, atãkyemãko sytatose.”