Saumu 85 - Ritonõpo Omiry: A Bíblia Sagrada na língua Aparai do Brasil

Oturutoh Ritonõpo a kure rokẽ ehtoh poko

Kora tõ nymerohpyry, tokarose eremiaketõ tuisary a.

¹ Ritonõpo yna Esemy, kure rokẽ mexiase sero ononory poko; Izyraeu tõ tonehpose ropa oya, tomãkapose roropa toto oya.

² Opoetory tõ rypyry emero tykorokase oya, popyra toto ehtopõpyry onenepyra toehse mase.

³ Toto zehno pyra toehse ropa mase, tohne oehtopõpyry wino toeramase ropa.

⁴ Yna enehko ropa, Ritonõpo yna Pynanohne, penekehpyra exiko opoetory tõ poko!

⁵ Jũme yna zehno exikehpyra hma? Zehno oehtoh jũme exikehpyra hnae?

⁶ Yna jamihtanohpoko ropa, morarahtao yna, opoetory tomo atãkyemãko ropa ynanase.

⁷ Ritonõpo yna Esemy yna pyno oehtoh enepoko yna a, yna ipynanohko roropa.

⁸ Ritonõpo omiry etãko ase; kyya xine, typoetory tomo a tõmiry etapõko mana kuewomarykõ poko, torẽtyke pyra kuehtohkõme eramara ropa kuahtao xine ajoajohpe kuehtohkõ pokona ropa.

⁹ Ajohpe pyra, tõmihpyry omipona se exiketõ pynanopyry se Ritonõpo mana, kynonorykõ po exikehpyra toehtohme, Kypynanohnekõme.

¹⁰ Kypyno xine Ritonõpo ehtoh anamonohpyra aehtoh maro oseporỹko mã toto; zae aehtoh, osepeme se toehtoh maro oseahmãko mã toto.

¹¹ Amonohpyra ahno ehtoh ahtãko mana sero nono po porehme. Zae Exiketyme, Ritonõpo kuenetorỹko mana kapu poe.

¹² Kyya xine kure ehtoh ekarõko Ritonõpo Kuesẽkõ mana. Mame kynonorykõ po tykyrysã ahtãko, itamurume exĩko mana.

¹³ Zae ehtoh Ritonõpo esemazupurume ytõko Kuesẽkõ esemaryme, aytotohme kukurohtaka xine.