Saumu 70 - Ritonõpo Omiry: A Bíblia Sagrada na língua Aparai do Brasil

Oturutoh Ritonõpo a akorehmatohme

Tawi nymerohpyry, inekarohpyry eremiaketõ tuisary a.

¹ Ritonõpo, axĩ ke kypynanohko! Jesẽme mase; axĩ kuakorehmako, seromaroro!

² Jetapary se exiketõ poremãkapory se ase oya. Tuaro pyra tyripoko toto. Tãkye exiketõ jetuarimary poko iramapoko ropa, aehxirotohkõme.

³ Ah ypoihtone tõ typoremãse nexĩ toto; Ah neramã toto toehxirotopõpyryke.

⁴ Ah tãkye nexĩ toto: “Ritonõpo Imehxo Kuesẽkõme mana,” kananomo! Tãkye exĩko mã toto typynanohse toexirykõke, ah ynara nykã toto: “Kure kuhse Mase, Ritonõpo, Imehxo Exikety.”

⁵ Ywy ase jamihme pyra te, tytineruke pyra roropa ase; Ritonõpo axĩ ke osehko jakorehmase! Ypynanohneme mase, Jesẽme mase. Axĩ ke kuakorehmako!