Saumu 61 - Ritonõpo Omiry: A Bíblia Sagrada na língua Aparai do Brasil

Towomase ywy Ritonõpo a

Tawi nymerohpyry, inekarohpyry eremiaketõ tuisary a.

¹ Ritonõpo, okohmary ya etako, etuarimãko ase. Jotururu oya etako.

² Tapotũkehse ywy; ameke roropa ytapyĩ tae okohmãko ase! Kuaroko topuimo pona, jewomatoh taka, ymotye kuhse mase jamihme.

³ Omoro mase jewomaneme exiryke, jamitu mase, jewomane, ypoko pyra yzehnotokõ ehtohme.

⁴ Amaro ehxi atapyĩ tao jũme joorikyry ponãmero. Osewomaxi ãporiry zopikoxi.

⁵ Ritonõpo jomihpyry metase: tymõkomoke exiketõ tymõkomory nomõko mã toto typoenõ mõkomoryme. Moro sã mã Õmiry omipona exiketõ ehtoh kurã mekaroase ya.

⁶ Tuhke jeimamyry ekaroko ya okynahxo isene jehtohme.

⁷ Ritonõpo, mokyro akorehmako zae tuisame aexiry poko oneneryme jũme. Ewomako ipyno oehtoh ke, anamonohpyra roropa oehtoh ke.

⁸ Morarame eremiãko ase oeahmaryme, zae oehtoh poko jũme. Kokoro rokẽ ynekarory ekarõko ase oya jomihpyry ae ro.