Saumu 56 - Ritonõpo Omiry: A Bíblia Sagrada na língua Aparai do Brasil

Ritonõpo ymaro mana

Tawi nymerohpyry, inekarohpyry eremiaketõ tuisary a.

¹ Ritonõpo, ypyno exiko, osetapãko mã toto ymaro; yyryhmakehpyra jepetõkara mana.

² Japoijapoiry poko kohmãnõko mã toto, tuhke mã mokaro osetapaketõ ymaro.

³ Enaromỹke jahtao oenetupuhnõko ase, Ritonõpo Jamihmehxo Exikety.

⁴ Ritonõpo enetupuhnõko ase, eahmãko roropa ase aomihpyry pokoino, kymaro xine toexiry poko. Enetuputyryke ya enaromyra exĩko ase. Yyryhmasaromepyra ahno mana.

⁵ Jepetõkara jakorekehkary poko kohmãnõko mã toto, josepekatyry se jahtao osenetupuhnõko mã toto popyra jyriry poko.

⁶ Oximõnõko mã toto, otonẽnõko ynyriry enetohme tyya xine, jetapatoh eraximãko mã toto.

⁷ Ritonõpo, mokaro zuãnohko popyra toto ehtamitume; zehno oehtoh enepoko, toto iporemãkapoko!

⁸ Yronymyryme torẽtyke jehtoh waro mase, yxity tukurãkase oya okyryry kutehi ao. Onymeropyra mã kehko apapẽ pokona?

⁹ Okohmaryhtao ya jakorehmatohme, jepetõkara epãko mã toto. Ynara zuaro ase: Ritonõpo ymaro mana.

¹⁰ Ritonõpo omihpyry eahmãko ase; Kuesẽkõ omihpyry.

¹¹ Ritonõpo enetuputyryke ya enaromyra exĩko ase. Yyryhmasaromepyra ahno mana.

¹² Ritonõpo, jomihpyry ae ro ynekarory ekarõko ase oya; “kure mase,” ãko ase ynekaroryme,

¹³ ynara exiryke: kypynanopyase orihsasaka jahtao, yporemãkapopyra mexiase. Naeroro, Ritonõpo, oẽpataka ytoytõko ase, saeremae ytõko ase isene jexiryke.