Saumu 34 - Ritonõpo Omiry: A Bíblia Sagrada na língua Aparai do Brasil

Kure Ritonõpo ehtoh poko

Tuisa Apimereke ẽpataka Tawi ahtao rowohpã samo

¹ “Kure mase, Ritonõpo Jesemy,” kakehpyra ase; Oeahmary poko kohmãnõko ase.

² Eahmãko ase inyrityã kurã pokoino. Ah taosanumasã moro poko netã toto, atãkyematohme!

³ Oximaro imehxo Ritonõpo ehtoh sekarotone imehnomo a; oximõme Kuesẽkõ seahmatone!

⁴ Tõturuse ywy Kuesẽkomo a jakorehmatohme, mame tozuhse ywy eya; typynanohse ywy joserehtopõpyry tõ poe.

⁵ Typynanohnekomo a eramaketõ atãkyemãko mã toto; jũme atasamara exĩko mã toto.

⁶ Takorehmaneke pyra jahtao tykohtase ywy; totase Ritonõpo a, mame typynanohse ywy eya yyryhmatoh tonõ poe emero.

⁷ Ritonõpo nenyokyhpyry osesarĩko mana aomipona exiketõ zomye, toto ewomãko mã ynororo toto onyryhmara imehnõ ehtohme.

⁸ Anusasame Ritonõpo Kuesẽkõ ehtoh ikuhko tuaro oehtohme kure aexiry poko. Tãkye mã mokaro, imaro osewomaketomo.

⁹ Imehxo Kuesẽkõ enetupuhnanõ, aomiry omipona ehtoko, emitapãpyra mã toto, aomiry omipona exiketomo!

¹⁰ Reão tõ omise exĩko, emitapãnõko mã toto, yrome Kuesẽkõ omiry omipona exiketõ mã emitapãpyra mana.

¹¹ Osehtoko, jepe tõ poetohti, kuetatoko ke, ãmorepatorỹko ase kure Ritonõpo Kuesẽkõ ritoh poko oya xine.

¹² Oseahmary se hmatou isene ehtoh poko? Okynahxo isene oehtohkõ se hmatou, tãkye roropa oehtohkõme?

¹³ Ahtao omi xihpyry ke oturupyra ehtoko, ajohpe pyra ehtoko roropa.

¹⁴ Popyra ehtoh irumekatoko, zae ehtoh poko oehtohkõme; osepeme ehtoko kure rokẽ oehtohkõme oximaro.

¹⁵ Zae ehtoh poko exiketõ pyno Kuesẽkõ mana, aomirykõ etãko mana ekaroporyhtao eya xine.

¹⁶ Yrome popyra ehtoh poko exiketõ akorekehkãko mana; naeroro toorihse toto ahtao axĩ toto poko wenikehnõko mã toto.

¹⁷ “Kuakorehmako, Jesemy!” tykohmase ahtao zae ehtoh poko exiketomo a, etãko Ritonõpo mana, toto pynanohnõko mana aetuarimatohkõ wino.

¹⁸ Sekese pyra exiketõ wino moe pyra Kuesẽkõ mana, atasamaketõ pynanohnõko mana.

¹⁹ Zae ehtoh poko exiketõ etuarimãko roropa mana, yrome morara toehse ahtao toto pynanohnõko Kuesẽkõ mana.

²⁰ Toto ewomãko mana, ipunaka; jehpyry onyhmopyra exĩko mana emero porehme.

²¹ Popyra ehtoh poko exiketõ orihnõko mã toto tynyrityã xihpyry pokoino. Kurãkõ zehno exiketõ mã tuãnohsẽme exĩko mã toto.

²² Typoetory tõ pynanohnõko Kuesẽkõ mana; Eya ytoketõ osewomapose, mokaro pynanohnõko mana.