Saumu 147 - Ritonõpo Omiry: A Bíblia Sagrada na língua Aparai do Brasil

Kure mase, Ritonõpo, Jamihmehxo Exikety

¹ “Kure mase, Ritonõpo,” sykatone! Kueremiarykõ Ritonõpo eahmaryme kure mana; jamaro mana, zae roropa eahmary kyya xine mana.

² Pata Jerusarẽ kurãkãko ropa Kuesẽkõ mana; Izyraeu tõ enehnõko ropa mana imehnõ nonory poe, arotyã imehnõ poetoryme.

³ Emynyhmaketõ kurãkãko ropa mana, iiryhmatopõpyrykõ epinohnõko mana.

⁴ Xirikuato tõ tuhke ehtoh tyripose eya, toine esety ae toto kohmãko mana.

⁵ Imehxo Kuesẽkõ mana, jamihme kuhse mana; tuarohxo ynororo, emero zuaro mana.

⁶ Imehnõ motye osekaropyra exiketõ anỹnõko Kuesẽkõ mana, yrome popyra exiketõ akuhmõko mana nono pona.

⁷ Eremiatoko Kuesẽkõ eahmaryme; rira tõ etotoko, “Kure mase, Ritonõpo,” karyme.

⁸ Akurũ ke kapu apurũko mana, konopo enehpõko mana nono pona, onahpoty ahtanohpõko roropa mana ypy tõ po.

⁹ Onokyro tomo a tonahsẽ ekarõko mana, atõko poenõ nahpãko roropa mana ikohmaryhtao eya xine.

¹⁰ Oty Ritonõpo zamaro nae? Kawaru tõ jamihmãkomo? Arypyra. Soutatu tõ orẽpyra exiketomo? Arypyra roropa.

¹¹ Ritonõpo zamaro mokaro, aomiry omipona exiketomo, penekehpyra exiketõ Ritonõpo eraximary poko typynanohtohkõme.

¹² Ritonõpo eahmatoko, Jerusarẽ põkomo! “Kure mase,” kahtoko Oesẽkomo a, Xião põkomo!

¹³ Jamihme apatary omõtoh rĩko mana. Kure rokẽ apatary põkõ rĩko roropa mana.

¹⁴ Ononory ehpiry ewomãko mana, ozehno xine pyra imehnõ ehtohme, tonahsẽ kurã ekarõko oya xine mana tãkye oehtohkõme.

¹⁵ Tõmiry ke tyripõko mana, axĩ inyripohpyry exĩko mana.

¹⁶ Kuenimã enehpõko mana sero nono pona topuxixime, kaneru hpoty samo; kuenimã topuru pahnõko mana putoh katoh samo.

¹⁷ Konopoimo enehpõko mana topuxikiri samo, jeru kuenimano. Kõxikene sytatose exĩko kuenimã enehporyhtao eya.

¹⁸ Mame aomiry omi poe jeru kuenimã tuname exĩko ropa mana. Tyryrykane enehpõko mana, mame tuna serere ãko mana.

¹⁹ Tõmihpyry ekarõko Ritonõpo mana Jako pakomotyamo a, tynyripohpyry tõ Izyraeu tomo a.

²⁰ Morara onyripyra imepỹ nonory põkomo a; imehnõ ahno aomiry waro pyra mã toto. “Kure mase, Ritonõpo,” sykatone!