Saumu 130 - Ritonõpo Omiry: A Bíblia Sagrada na língua Aparai do Brasil

Oturutoh Ritonõpo a akorehmatohme

Ytoytoketõ eremiatoh sero.

¹ Ritonõpo yna Esemy, kykohmase zue ae typynanohneke pyra jahtao.

² Okohmary etako Ritonõpo! Jotururu etako jakorehmary ekaroporyhtao oya.

³ Yna rypyry tymerose ahtao oya yna wãnopyry emero, tyyrypyhpyke yna exiryke porehme.

⁴ Yrome popyra yna ehtoh korokãko mase, morara exiryke oeahmãko ynanase.

⁵ Jakorehmary poko Ritonõpo Kuesẽkomo a penetãko ase; eraximãko ase, zae aomiry enetupuhnõko ase.

⁶ Kuesẽkõ eraximãko ase pata omõtoh erase tomo a ẽmepyry eraximary motye, pata omõtoh erase tomo a ẽmepyry eraximary motye.

⁷ Izyraeu tomo, Ritonõpo Oesẽkõ enetupuhtoko opyno xine exikehpyra aexiryke, opynanopyrykõ se exikehpyra roropa aexiryke.

⁸ Typoetory tõ Izyraeu pynanohnõko mana iirypyrykõ korokãko mana porehme.