Saumu 116 - Ritonõpo Omiry: A Bíblia Sagrada na língua Aparai do Brasil

Typynanohse Ritonõpo a orihpyra ehtohme

¹ Ritonõpo Jesẽ pyno ase jomiry etaryke eya; jotururu eya etãko mana.

² Jomiry etãko mana tykohmaryhtao ya jakorehmatohme.

³ Jorihmapotoh jomye nexiase ameke pyra. Tapuruse exiase jerehtoh ke jorikyry zuno jexiryke, enaromỹke exiase torẽtyke roropa ipunaka.

⁴ Mame Ritonõpo tykohmase ya: “Ajohpame sã kypynanohko, Ritonõpo, orihpyra jehtohme!”

⁵ Kure Ritonõpo mana; kypynanopyrykõ eya anamonohpyra mana. Kypynanohtorỹko Kuesẽkõ mana.

⁶ Osewomasaromepyra exiketõ ewomãko mana. Orihsasaka jahtao typynanohse exiase eya.

⁷ Torẽtyke pyra exiko ipunaka, ãko ase ya ukurohtao, Ritonõpo Jesemy onenetupuhkehpyra exiko, kure rokẽ tyrise jexiryke eya!

⁸ Ritonõpo a typynanohse ywy jorikyryino, yxity tõ totypohkapose eya yporemãkapopyra roropa nexiase.

⁹ Morara exiryke ytoytõko ase Ritonõpo neneryme, isene exiketõ rãnao.

¹⁰ Onenetupuhkehpyra exiase ynara tykase jahtao ro: “Takurihmose ywy ipunaka.”

¹¹ Enaromỹke exiase ahtao ynara tykase ywy: “Ahno emero ajohpe rokẽ mã toto.”

¹² Oty ekarõko ha ynekaroryme Ritonõpo Jesemy a kure rokẽ tyrise jexiryke eya?

¹³ Uwa eukuru jehnahpyry kurã enehnõko ase ynekaroryme Jesemy a, “Kure mase,” katohme eya, typynanohse jexiryke eya.

¹⁴ Ipoetory tõ oximõmãkõ rãnao ynekarory ekarõko ase eya, jomihpyry ae ro.

¹⁵ Sam ãko Ritonõpo mana typoetory poko aorikyry eneryhtao eya!

¹⁶ Opoetoryme ase, Ritonõpo; õmiry omipona ase, õmiry omipona aja ehtopõpyry saaro. Typynanohse exiase oya orihpyra jehtohme.

¹⁷ “Kure mase,” ãko ase ynekaroryme oya, jotururu ekarõko ase roropa oya.

^18-19 Oximõme opoetory tõ ahtao emero, zara tõ po, Atapyĩ Kurã tao, Jerusarẽ po, ynekarory ekarõko ase oya, jomihpyry ae ro. “Kure mase, Ritonõpo,” kahtoko!