Saumu 106 - Ritonõpo Omiry: A Bíblia Sagrada na língua Aparai do Brasil

Kure Ritonõpo ehtoh Izyraeu tomo a

¹ Kure Ritonõpo mana! “Kure mase,” kahtoko Ritonõpo a kure aexiryke, kypyno xine exikehpyra mana.

² Inyrityã kurã tyjamitunuru ke ikuhpỹme nase. Jũme eahmaryhtao kyya xine kure aexiry onymotyẽkara sytatose.

³ Tãkye mã mokaro, Ritonõpo omipona exiketomo, zae ehtoh poko rokẽ exiketomo.

⁴ Wenikehpyra exiko ypoko, Ritonõpo, opoetory tõ akorehmaryhtao oya; kypynanohko roropa toto pynanopyryhtao oya.

⁵ Opoetory tõ kure rokẽ ehtoh enery se ase, atãkyematohme ononory põkõ maro, oseahmatohme tosẽkõme oenetupuhnanõ maro.

⁶ Popyra toehse kymarokomo, zae pyra ipunaka; iirypyryme toehse sytatose, kytamurukõ samo.

⁷ Ejitu po kytamurukõ ahtao onenetupuhpyra toh kynexine Ritonõpo nyrityã kurã poko. Tuenikehse toh kynexine tahxime typyno xine Ritonõpo ehtopõpyry poko, aomipona pyra toehse toh kynexine tuna konõto Tahpiremã po.

⁸ Yrome tyjamitunuru enepotohme, typynanohse toh eya, tõmihpyry ae ro.

⁹ Ritonõpo a tyripose ahtao tuna konõto Tahpiremã tãpaikapose; typoetory tõ tarose eya nono tonorẽ poro.

¹⁰ Toto zehno exiketõ winoino typynanohse toto eya; epetõkara winoino tanỹse toto.

¹¹ Yrome epetõkara tyneryse; epara tokurehse toto emero.

¹² Moro eneryke tyya xine zae aomihpyry ehtoh tonetupuhse eya xine, toremiase toto Ritonõpo eahmaryme.

¹³ Yrome axĩ tuenikehse ropa toto inyrihpyry poko, tamoreme tyriry se toehtoh tyrise eya xine, aomiry oneraximara toh kynexine.

¹⁴ Typenetatoh se toehse toto ona po, ahno esao pyra, Ritonõpo tukuhse eya xine.

¹⁵ Naeroro ise toto ehtoh tokarose eya, yrome tyrohsẽ konõto tonehpose roropa eya xine.

¹⁶ Moroto ona po Moeze zumoxike toehse toh kynexine, Arão roropa, Ritonõpo maro oturukety, aomiry omipona exikety.

¹⁷ Naeroro nono totapuruhmakase, Tatã tonyohse, kuih kary samo nono aka tomõse; Apirão roropa, itapyĩ taõkõ maro, tonẽse nono aka.

¹⁸ Toto marõkõ pona apoto toepukase, mokaro tyahkase, ajoajohpãkomo.

¹⁹ Ypy Xinai po pui mũkuru panõ tyrise Izyraeu tomo a, uuru risemy, tynyrihpyrykõ toahmase eya xine Ritonõpo myakãme.

²⁰ Ritonõpo Imehxo Exikety tymyakãmase eya xine okyno panõ ke, onahpoty enahne ke.

²¹ Tuenikehse toh kynexine Ritonõpo Typynanohnekõ poko, inyrityã kurã poko roropa tyjamitunuru ke Ejitu po.

²² Inyrityã osenuruhkatohme moroto! Inyrihpyry aoserehtopõpyrykõ poko tuna konõto Tahpiremã po!

²³ Naeroro: “Toto enahkapõko ase,” tykase Ritonõpo Izyraeu tõ poko; yrome Moeze, inymenekahpyry typoetoryme toexikihmase Ritonõpo ẽpataka toto ewomatohme, toto onenahkara aehtohme.

²⁴ Moromeĩpo aomihpyry zae exiry onenetupuhpyra toexirykõke Kanaã pona tomomyry se pyra toehse toh kynexine, nono kurã pona.

²⁵ Tytapyĩkõ tao, okyno pihpyry risẽ tao tehme toexirykõ se toh kynexine ikerekeremãko, aomiry onetara, imoiry se pyra toh kynexine Ritonõpo Tosẽkõ omiry poko.

²⁶ Naeroro ynara tykase ynororo eya xine: “Ourutorỹko ase, ona po oorihmanohpotorỹko ase,

²⁷ apakomotyã sapararahme exĩko, juaro pyra exiketõ rãnaka, imehnõ nonory po orihnõko matose.”

²⁸ Moromeĩpo tõximõse Ritonõpo poetory tõ ypy Peoa po, tyneponãmarykõ Paau eahmatohme, tõtuhse toto tynekarorykõ poko isene pyra exiketõ eahmaryme.

²⁹ Tynyrityã ke tyehno xine Ritonõpo tyripose eya xine, naeroro tyrohsẽ xihpyrymã ke, tyyryhmase toto.

³⁰ Yrome mokyro zae pyra exikety tuãnohse Pineia a, mame moro tyrohsẽ tonahse.

³¹ Inyrihpyry kurã poko wenikehpyra mã toto, zae Pineia ehtoh ekarõko jũkõ mana, imepỹ zumakahpõkomo a jũme wenikehpyra toto ehtohme.

³² Moromeĩpo Meripa tuna enatyry po, tyehno xine Ritonõpo tyripose eya xine, morara ahtao sam tykase Moeze, mokaro pokoino.

³³ Tyekĩtapãse ynororo taomipohtomase ynororo eya xine, azahkuru tõturuse ynororo, ajoajohpã samo.

³⁴ Pohnõ onetapara tokurehse toto, Ritonõpo Tosẽkõ nyripohpyry omipona pyra.

³⁵ Yrome typytase toto mokaro maro, torẽnase toto imaro xine, typoenohse toto eya xine inyrityãkõ eahmary poko.

³⁶ Imehnõ neponãmary toahmase Ritonõpo poetory tomo a, morara exiryke tonahkase toto.

³⁷ Typoenõkomo tõxirykomo te, orutua kõ roropa totapase eya xine jahkatohme tynekarorykõme Kanaã põkõ neponãmary eahmatohme.

³⁸ Poeto kurãkõ totapase eya xine, mame moro nono nuriame toehse mokaro etaparyke eya xine.

³⁹ Morohne riryke eya xine popyra toehse toh kynexine ipunaka. Nuriame toehse toto Ritonõpo a imeimehnõ poko exiketõ samo, aomiry onymoipyra toh kynexine.

⁴⁰ Naeroro typoetory tõ zehno toehse Ritonõpo, typenekehse ynororo toto poko.

⁴¹ Turumekase toh eya, typoremãkapose toto Ritonõpo waro pyra exiketomo a.

⁴² Izyraeu tõ tyyryhmase epetõkara a, tyrohmanohpose toto eya xine.

⁴³ Tuhke rokẽ typynanohse toto Ritonõpo a, yrome Tosẽkõ rumekary sehxo toh kynexine, yronymyrymehxo tyyrypyrykõ poko se toh kynexine.

⁴⁴ Mãpyra tyxitaryme Ritonõpo a takorehmarykõ tokaropose ahtao eya xine, toto omiry totase Ritonõpo a. Toytose ropa ynororo eya xine aetuarimarykohtao.

⁴⁵ Mokaro eneryke tyya wenikehpyra toehse tõmihpyry etapotopõpyry poko, typoetory tõ pynohxo toexiryke toto zehno pyra toehse ropa ynororo.

⁴⁶ Typoetory tõ pyno iporemãkaponanõ tyripose ropa eya.

⁴⁷ Ritonõpo yna Esemy, yna ipynanohko! Yna enehko ropa awaro pyra exiketõ nonory poe, “Kure mase,” katohme yna a oya, atãkyemãko roropa oesety kurã eahmaryme.

⁴⁸ “Kure mase,” kahtoko Ritonõpo Izyraeu tõ Esemy a. “Kure mase,” kahtoko eya seromaroro te, jũme roropa. Sero nono põkõ emero, ynara kahtoko: “Zae mase!” “Kure mase, Ritonõpo” kahtoko!