Apakuke 1 - Ritonõpo Omiry: A Bíblia Sagrada na língua Aparai do Brasil

¹ Ritonõpo nekarohpyry sero urutõ Apakuke a enepotoh ae.

Ikerekeremãko Apakuke zae pyra ehtoh poko

² Ritonõpo Jesemy, oya oturũko ase, yna akorehmatohme repe. Oty katohme onetara sã mahno? Kohtãko ase oya: “Yna ryhmãko mã toto!” ãko ase repe. Yrome yna onypynanohpyra mase.

³ Popyra ehtoh enepõko mase ya. Oty katohme? Oty katoh zae pyra exiketõ onuãnohpyra mahno? Ematonãko mã toto! Imehnõ etapãko toto! Oseosezuhnõko mã toto emero rokẽ poko.

⁴ Naeroro õmihpyry omipona pyra mã toto, zae ehtoh onyripyra mã toto. Kure ehtoh poko exiketõ tapuruse mã toto zae pyra exiketomo a. Zae pyra ahno apiakãko mã toto.

Ezuhtoh Ritonõpo a

⁵ Mame ynara tykase Ritonõpo typoetory tomo a: “Imeimehnõ nonory põkõ enetoko omye xine. Osenuruhkãko matose, oserehnõko roropa matose. Seromaroro tyoro sã tyrĩko ase. Moro poko ekaroryhtao oya xine: ‘Ajohpe,’ ãko rokẽ matose.

⁶ Papironia põkõ enehnõko ase, zehno exiketomo, imehnõ etapananomo. Etypohpyra exĩko mã toto, ytoytoketõme mã toto sero nono poro, imehnõ nonory poremãkatohme.

⁷ “Mokaro zuno imehnõ ripõko mã toto. Tõmihpyrykõ omipona rokẽ imehnõ ripõko mã toto imehnõ motye kure tõsekarorykõke eya xine.

⁸ Ekykõ, kawaru tõ axihxo ytõko mã toto, reoparatu tõ motye. Zehno exiketõ sã mã toto, kaikuximo tõ samo, omise ahtao. Tokykõ, kawaru po ytoketõ tururume ytokehpyra mã toto. Moino oehnõko mã toto, axĩ samo piano samo ayhtoryhtao, tykarimory apoise. Mokã sã mã toto.

⁹ Ytoytõko mã toto, soutatu tomo, ahno poremãkapose. Aytorykohtao imehnõ enaroximãko mã toto. Tynamotokõme ahno apoĩko mã toto tuhke, ikuhpỹme isawã samo tuna konõto ehpio exikety samo.

¹⁰ Tuisa tõ eunohnõko mã toto, papironio tõ soutatu tomo, kowenatu tõ poihtõko mã toto. Tapyi tõ jamihmãkõ poko eunohnõko mã toto; Nono arõko mã toto apuru pona opyi ritohme pata põkõ apoitohme.

¹¹ Mame mya ytõko mã toto tyryrykane samo. Osenepyra ropa exĩko mã toto, Ritonõpo oneahmara mã toto, oseahmãko rokẽ mã toto tyjamitunurukõ pokoino.”

Ikerekerematopõpyry ropa Apakuke a

¹² Moino ro mase, Ritonõpo, jũme. Jesẽme mase, zae rokẽ Exiketyme mase, Kurano. Yna Ewomaneme mase. Papironio tõ tymenekase oya, jamihme tyripose toto oya yna wãnohtohme.

¹³ Yrome otãto mokaro popyra exiketõ eanahtõko mah, Ritonõpo? Nuriame exiketõ enery se pyra mase ipunaka kure oexiryke. Popyra exiketõ tyyrypyrykõ poko ehtoh oneanahtosaromepyra mase. Naeroro oty katohme mynyhme rokẽ mahno kurehxo exiketõ etaparyhtao popyra exiketomo a?

¹⁴ Oty katoh ahno tyripõko mah kana samo tuna konõto kuao, onokyro tõ sã roropa tosẽke pyra exiketõ samo?

¹⁵ Imehnõ ahno apoĩko papironio tõ mana, kana tõ apoiry sã kana anỹnanomo a, oka ke te, tarãpa ke, moro sã ahno apoĩko mã toto. Mame oseahmãko rokẽ mã toto.

¹⁶ Tynekarorykõ ekarõko mã toto tarãpa tomo a, tarãpa tõ eahmãko mã toto oka tõ maro. Morohne pokoino kure otuhnõko mã toto te, tymõkomoke toehse roropa mã toto.

¹⁷ Mokaro papironio tõ jũme etonakehpyra exĩko toh nae? Imehnõ nonory põkõ maro etonakehpyra exĩko toh nae?