DALEK TERABA NON JISAS KRAES JON TEULU 8 - Gospels of Mark and John in Apma

Aji havin ah te lel basal

¹ Tarutni rat mulmul sera, ba Jisas mwe sak li rep niah rat tehu i rewen Oliv.

² Tei jubung bwaleh matjubung nan ba ban le koron valin God. Tarutni rat tepma nedi dalji bi mwe sadok tavan bi bawo mwe sesra ni.

³ Goah rat sesra Temwat bi aji nan goah rat wuhu Temwat rat teli aji havin mapma niah te lel basal. Ram mapma bi ra bajuru lemtan tarutni.

⁴ Ra bep mini Jisas nuhu, “Sesesrakan, aji havin ahe ba ka mat wutdihi li non vasalan.

⁵ Ko bihni nuhu mwe gap? Gonani le noma temwat niah Moses te skani ba aji havin ah tapmak ah ba man bwah bamtean.”

⁶ Rat ga git dopmi nge tedapmak metan goah bat vep gasrite apma ah ra bat wuhu uru. Ba Jisas mo ol va tavan bi maulu i warungun li tan.

⁷ Rat ti ne uhleli rada ini bi Jisas mwe sadok boswos bi bep mini ni nuhu, “Aji rei gimi ah tebado lelte kapmwaan nga ba ma nei ni nae niah man bwah bawora aji havin ahe i vet.”

⁸ Bi mo ol mwetak va tavan bi maulul li tan.

⁹ Entorah rat rongo tapmak bi ra ban botwot. Ram mamlu bwabwalehlal te vawora li wakatkatraba ni. Te gamui Jisas ngetedi nuru aji havin.

¹⁰ Jisas mwe sadok boswos bi bep mini aji havin nuhu, “Ani rat van ibe nong? Aji rei ni temu bweha kik?”

¹¹ Aji havin balu ini bep nuhu, “Tebu, Subu.” Jisas bep mini nuhu, “Nana bi nan ba skakte illnan nga mini kik, ba kom mul bi kon bam lel mwetakte kapmwaanan.”

Jisas bibi heren ut li uruu

¹² Jisas te doptop mwetak mini ni, bep nuhu, “Nana nambi heren ut li uruu. Aji ah man dahkuru nana ba ma buhu heren masan, tebam hural nga le wulmet.”

¹³ Aji nan goah rat wuhu Temwat rabep mini nuhu, “Nanong ba kom gam doptop bamul ma nokom, bi apma ah ko mwatwo ba tebaite mwetaknga nga.”

¹⁴ Jisas balu ini bep nuhu, “Tebu masen a nam bat roptop bamul ma nokok ba apma ah nam bep ba metaknga u gonani nam maililngi ut ah nat tepma iginan bi nam maililngi ut ah nan ban iginan. Ba gimi ba kat baililngi ut nga ah nat tepma iginan bi kat bililngi ut nga ah nam ban iginan.

¹⁵ Kam sasa nokon halan lelian non aji, ba nana ba nat bado sasa tenga le lelian non aji.

¹⁶ Tigoah nam bat leli veveikan ba nok veveikan batei mwetaknga u gonani nat baite nihkek nga ba Tadat niah tesro nana ba mwidi bek.

¹⁷ Ba teulan le nomi Temwat nagoah tigoah aji karu ranru ioh li apma bwaleh ba apma bwaleh ba apma nonong ba mwetaknga.

¹⁸ Nam doptop bamul ma nokok bi Tadat niah tesro nana bi mumu doptop nokok.”

¹⁹ Ram uhleli ini nuhu, “Temam nimbeh?” Ba Jisas balu ini bep nuhu, “Kat baililngi nana nga, bi kat bililngi Tadat nga. Tigoah kabat telilngi nana, ba kabat teililngi Tadat tedapmak.”

²⁰ Jisas te vep leut ni nong le non sesesrakan le koron valin God, le sangvik go ut ah tangin utnen sekakan te sadok iginan. Aji bat ba wuhu nga gonani non to tei tebadopma nga.

Kan ba van nga ut ah nan ban iginan

²¹ Jisas bep mwetani mini ni nuhu, “Nan ban dini gimi bi kan dongvi nana, ba kan mat nge li nomi kapmwaan. Gonani kan ba van nga ut ah nan ban iginan.”

²² Jiusni ra bep nuhu, “Bep nuhu tan ba van nga ut ah ban iginan, man ban ibeh, man ih bamula ni?”

²³ Jisas bep mini ni nuhu, “Gimi kabi aji at tavan ba nat sipma mere le bini. Kabi aji at li uruu ba nat baite aji at li uruu nga.

²⁴ Bujun nanong nagoah nam bep nuhu kan mat nge le nomi kapwaan, kan mat le nomi kapmwaan gonani kat ba vihni mwetaknga nak nga niah ‘Nana ah Nana’.”

²⁵ Ram uhleli ini nuhu, “Kik itan?” Jisas balu ini bep nuhu, “Nana naah nat vep bawora mini gimi envawonan.

²⁶ Apma hal kawu lengleng ngama niah nam batmu bep mini gimi niah batei kavep bamte nami. Aji ah tesro nana ba ni mwetaknga, ni nam bep apma nge mini tarut nan ut li uruu niah te vep mini nana.”

²⁷ Rat bililngi tenga nuhu te doptop mini ni nokon Teman.

²⁸ Jisas bep mini nuhu, “Entorah kan dakrani nana niah nambi Nujun Aji ba kan gaililngi nanong nuhu ‘Nana ah Nana’. Kan neililngi nuhu nat ba lelte apma nga li rowok, ba apma sera ah nam bep ba nam bep goah Tadat tesesra nana ini.

²⁹ Aji ah tesro nana ba mwi di ras bek, teba ling gabarakte nana nga u gonani nam lel ras i apma ah rongnan nokon mwe gabis ini.”

³⁰ Hal kawu lengleng nan tarutni niah rat rongo goah Jisas te vep vehuran nong, rat bihni mwetaknga nan.

Goah ram sale bamul ma ni, bi goah aji watnende ram sale i ni

³¹ Jisas bep mini Jiusni niah rat vihni mwetaknga nan nuhu, “Tigoah kan nemko mini nok sesesrakan ba kabi mamjin nok tarut na ngate.

³² Kan nelilngi apma ah mwetaknga bi apma ah mwetaknga man leli ba kan nemsalsal.”

³³ Ra balu nuhu, “Woran Abraham ba rat bi di tenga le ngan aji watnende, bi gemi ahe ba ka bi woran Abraham. Ko bep gavak ini nuhu kaman bamsalsal nga?”

³⁴ Jisas bep mini ni nuhu, “Mwetaknga letlet nam bep mini gimi, aji sera ah ram leli kapmwaan ba ram di le kaen kapmwaan.

³⁵ Atnan karih ba non woswosan tebulong u goah man di temrap leiman non subu. Ba bi nujuk aji ah mwi di ras leiman teman.

³⁶ Tigoah nana niah nambi Nujun God nan leli ba kan nemsalsal ba mwetaknga letlet kan nemsalsal rada nae.

³⁷ Nam mililngi nuhu ka bi woran Abraham ba nan nga ba kam lel dopmi nuhu kama hi nana, u gonani kat ba lep gogo nok sesesrakan nga vale gimi.

³⁸ Nam bep apma ah Tadat te sesra mini nana, ba gimi kam leli apma ah temami rat vep mini gimi.”

³⁹ Ra balu ini rabep nuhu, “Temama ah Abraham.” Jisas bep mini ni nuhu, “Tigoah bat tei nujun Abraham na ngate ah gimi ba ka bat leli apma ah te vep mini gimi.

⁴⁰ Nanong ba kam doni nuhu kamahi nana neg u gonani nam bep mwetaknga mini gimi niah nat rongo dini God. Ba Abraham ba teba lelte apma nga ah tedapmak!

⁴¹ Gimi kam dahkuru apma ah temami ni rat leli.” Ba ra balu ini ra bep nuhu, “Kamat baite nujun hal nga, ba Temama nante ah God, bi kabi nujun God.”

⁴² Jisas bep mini ni nuhu, “Tigoah God batei temami na ngate ba kabat mwegololo i nana. Gonani goi namdi ahe ba nat sipma ben God, nat ba sipma tenga li nok tonian, ba tesro nana.

⁴³ U pama ah kat baililngi mwatwen apma nga ah nam bep? Na u gonani kat badoni nga nuhu kama rongtani nok toptowan.

⁴⁴ Kabi nuju tamami niah Loah bi kam doni nuhu kama duhri tonian non temami niah tei le vawonan ba tehi ajini. Man ba mwee nga mini apma ah mwetaknga, gonani mwetaknga tebulong dini. Mwe geket, bi mwe leli apma nante ah boswos mini gonani bi ni aji nan keketan, bi bibi teman keketan.

⁴⁵ Nam bep mwetaknga mini gimi bi nai kat ba vihni mwetaknga nak nga ini.

⁴⁶ Itan rei gimi niah man sesra nuhu nam bi aji nan kapmwaa? Tigoah nan bep mwetaknga mini gimi ba mwe gai u apma nagoah kat ba vihni mwetaknga nak nga?

⁴⁷ Aji ah mwi sipma ben God ba morongtani dalen God. Ba gimi ba katba sipma tenga ben God, bi bujun nanong na goah kat ba rorongtak nga.”

Jisas bi Abraham

⁴⁸ Jiusni ra balu ini mini Jisas ra bep nuhu, “Ko bep nuhu teba woswos tenga na goah ka bep nuhu kik aji at Sameria niah loah mwidi le kik?”

⁴⁹ Jisas balu ini bep nuhu, “Loah tebulong le nana gonani nam matpe Tadat. Ba gimi kat batpe nana nga.

⁵⁰ Nat ba dongvite vihni meres nak nga. Ba aji modok ah modongvi bi manei ni nae niah man sasa.

⁵¹ Mwetaknga letlet nam bep mini gimi, aji ah morong mwetani dalek ba man badi tenga nemate.”

⁵² Jiusni ra bep mini nuhu, “Nanong ba kam mailingi luhluhmwi nuhu loah mwi di le kik. Gonani Abraham temat bi ajinan vepnan dalen God ni rat mat sera, ba nan nga ba ko bep nuhu, ‘Aji ah man rong mwetani dalem ba man ba mat nga.’

⁵³ Gavak, kik kawu ngate vali temama niah Abraham niah temate? Bi ajinan dalen God ni rat mat ko bihni nuhu nemai kik itan?”

⁵⁴ Jisas balu ini bep nuhu, “Tigoah nam bat geri bamula nana ma ba tokoi nan bat bulong. Ba Tadat niah mwe geri nana niah ka bep nuhu bi ni nomi God.

⁵⁵ Kat baililngi nga, ba nam maililngi, tigoah nam bat vep nuhu nat bililngi nga ba nam bat tei aji nan keketan tekeni gimi, ba nam mililngi bi nam rong mwetani dalen.

⁵⁶ Temami ah Abraham ba rong nan nokon tei tekabis u gonani te doni nuhu bat kita to ah nam bat tepma lelen. Tei tekita bi rongnam nokon tei tekabis ini.”

⁵⁷ Jiusni ra bep mini nuhu, “Dam nam tebadoi ngawul kalim nga, bi ko bep nuhu kot kita Abraham?”

⁵⁸ Jisas balu ini bep mini ni nuhu, “Mwetaknga letlet nam bep mini gimi bawo ba Abraham tega bo, ba tei ‘Nana’.”

⁵⁹ Ram apko vet nuhu rama weha ba Jisas matpo surak bi ban dini ut le koron valin God.