DALEK TERABA NON JISAS KRAES JON TEULU 16 - Gospels of Mark and John in Apma

¹ “Nat vep leutini nong mini gimi, metan goah kanbaslal nga, dini hal ah natelngi mini gimi.

² Ran bohni gimi dini valin no tangroan. Bi to manepma niah rat das gabarani gimi dini goah rabihni mwetaknga. Ajini nanong ran bihni nuhu ram leli uman non God.

³ Ran leli leut nanong mini gimi u gonani rat baililngi Tadat nga io nana.

⁴ Ba nambep leutni nong mini gimi u goah taron man gamupma ba kaneililngi masi nuhu nat vep baworate mini gimi.” “Nat ba vepte leutni nga nong mini gimi envawonan gonani nat tok ngama bemi.

Uman non Tabite Kokon

⁵ Ba nanong ba nam samul bemul ben aji ah tesro nana. Ba nannga ba aji rei gimi tebaga uhleli nga i nana nuhu, ‘Ani koban ibeh?’

⁶ Nanong ba rongnan nokomi mwegapma i goah natvep leutni nong mini gimi.

⁷ Taapmaini. Gonani mwetaknga letlet nambep mini gimi, tigoah nan ba van nga dini gimi ba Bejimmi niah Tabite Kokon ba man ba sipma nga. Ba entorah nanban ba nanesro mwispma bemi.

⁸ Bi entorah man sipma ba man sesra tarutnan ut li uruu i goah ramsalal le halan kapmwaan. Bi man sesra ni i goah ramsalal dini halan woswosan. Bi manmu sesra ni i halan veveikan niah God man veveik i tarutnan ut li uruu ini. Tabite Kokon nanong man leli ba ran bus tokol na ajini nanong.

⁹ Ramsalal le halan kapmwaan gonani rat ba vihni mwetaknga nak nga.

¹⁰ Bi man sesra ni i goah ramsalal dini halan woswosan. Gonani namban ben Tadat bi kan bam gita nana nga limalen.

¹¹ Bi man leli ba goah ramdi le veveikan non God ba randi utemsa. Gonani Setan niah salenan tarut at li uruu ba mwidite le veveikan.

¹² “Apma halkawu lengleng ngama niah mwidi u goah nambatmu vep mini gimi.

¹³ Entorah Tabite Kokon nan mwetaknga man sipma ba man sesra gimi i halan leut ah mwetaknga. Tabite Kokon nanong man ba doptop bamul tenga li rowon, ba man doptop nokon apma ah man rongo. Bi man doptop nokon apma ah nemagapma ngama.

¹⁴ Maneskani meresan mini nana, gonani maneli apma ah nambat vep bi mwegam bep seresere mini gimi.

¹⁵ Leut sera ah non Tadat ba nok, bi bujun nanong nagoah nambep mini gimi nuhu, ‘Tabite Kokon maneli nok vehuran ah naneskani mini bi mwegam bep seresere mini gimi.’ ”

Manbaite viuk nga ba Jisas mulma

¹⁶ “Manei le ngudu to ba kan bam gita nana nga, bi manei mwetak le ngudu to ba kan gita nana.”

¹⁷ Datngin non tarutni rabep mini aji go nuhu, “Meramnan non vehuran ahe ba nimbesi? Gonani bep mini kidi nuhu, ‘Manei le ngudu to ba kan bam gita nana nga, bi manei mwetak le ngudu to ba kan gita nana.’ Bi mumu bep nuhu, ‘Bujun i goah namban ben Tadat.’ ”

¹⁸ Ram uhleli i aji go nuhu, “Meramnan ngudu to ah kobep ba niah apma? Itan ah maililngi apma ah bep?”

¹⁹ Jisas teililngi goah rat toni nuhu rabat uhleli meramnan vehuran ini niah tevep mini ni. Bep mini ni nuhu, “Natvep mini gimi nuhu, ‘Manei le ngudu to ba kan bam gita nana nga, bi manei mwetak le ngudu to ba kan gita nana.’ Apma nanong ah kamdi nesale sige nuhu kabat teililngi meramnan?

²⁰ Mwetaknga letlet nambep mini gimi, kandeng bi rongnan nokomi man gapma le nomi vihnian, ba rongnan nokon tarut at li uruu man gam gabis. Rongnan nokomi man gapma ba nomi rongnan nokokte tekapma nanong ba man bukak vali rongnan nokokte tekabis.

²¹ Entorah mwidi bwelwel nagoah aji havin nema babap ba morongo jukun bi rongnan nokon mwegapma. Ba entorah aji havak bo vautemsa ba tebam rongmwegapma nga ba rongnan nokon mwegabis i aji havak niah tewo vali uruu.

²² Halan tedapmak nanong mini gimi. Nanong ba rongnan nokomi mwegapma, ba nanmu git mwetani gimi ngama limalen. Bi le jinemmi man bwewelip i rongnan nokokte tekabis. Rongnan nokokte tekabis nanong ba aji tebulong ah manlep gabarani dini gimi.

²³ “Entorah ren nanong manepma ba kan bamudi nga neuhlelite apma bwaleh i nana. Mwetaknga letlet nambep mini gimi, Tadat maneskak sera leutnae niah kan uhleli dini li nana.

²⁴ Mwegat nanong nagoah katbado uhlelite apma bwaleh nga ini li nana. Karu uhlelite apma i Tadat, bi maneskani mini gimi. Metan goah kan bwewelip i rongnan nokokte tekabis.”

Rowon Jisas tesasviri rowon tarut at li uruu

²⁵ “Natvep leut halkawu lengleng mini gimi li maun vehuran. Ba to manepma niah nan bamdoptop nga mini gimi li maun vehuran. Ba nandoptop renren luhluhmwi mini gimi nokon Tadat.

²⁶ Entorah ren nanong manepma, ba kan uhleli apma i Tadat li nan. Nat ba vep tenga nuhu nan uhlelite li gimi,

²⁷ gonani Tadat ba mwegololo i gimi tapmak goah kat mwegololo i nana. Bi kabihni mwetaknganan nuhu nat sipma ben.

²⁸ Nat sipma dini Tadat bi nesipma vali uruu bi namalngi ut li uruu bi nam samul bamul ben Tadat.”

²⁹ Non tarutni rabep mini nuhu, “Nanong ba mwegamrai nanong. Komga doptop renren luhluhmwi nanong, gonani kot bam doptop nga li maun vehuran.

³⁰ Kamaililngi nanong nuhu, komaililngi sera leutnae. Bi kot bamdonitenga nuhu aji man uhlelite vehuran i kik. Nom vehuranni nong mweleli ba kabihni mwetaknga nam nuhu kot sipma ben God.”

³¹ Jisas bep mini ni nuhu, “Kamga vihni mwetaknga nanong?

³² To tepma, bi mwidi bwelwel nanong, niah kan ropropselal dini nana bi kam mulmul li vini nami. Kanling gabarani nana bi nangamdi ma nihkek. Ba manbaite nihkek luhluhmwi nga gonani Tadat mandi bek.

³³ Natvep gonong mini gimi metan goah maneskani uterororong mini gimi. Bi kanei bwaleh mini nana. Tarut at li uruu ran leli ba kan rongo illan, ba rowomi manetkol. Gonani rowok ba tesasviri illan at li uruu.”