मुलिचेला टोॽवा 21 - आठपहरियापावाल लोक् ओसाइबाचि यरुसलेम ओखाडागा 1 एफिसासङिगा ओठेडोङ्चिलोक् सेन्डिङाउङ् आन्याँ चुवाखोङ्डाङ्ङि ठाङिङाउङ् सिधा कोस ओलोडुना टापुङि टासुम्मे॥ हिट्नुङ् हान्डेङ् रोडास ओलोडुना खालाङ्गा टासुम्मे हिट्नुङ् हिट्नालाम्मा पाटारा ओलोडुना खालाङ्गाङि टासुम्मे॥ 2 हिट्नि फोनिके ओलोडुना छेट्रालेङ् खाट्ना ठिक् चुवाखोङ्डाङ् आन्याँ टुबुमे हिट्नुङ् हिट्नि ठाङिङाउङ् खाडिङे॥ 3 हिट्नुङ् आन्याँ साइपारस टापु निसुमे, हिट्नुङ् आन्याँ फेङ्साङ्लेङ् लिसा सिरिया छेट्रालेङ् खाडिङे॥ टुरोस खालाङ्गाङि माल्माट्टा होप्मालोङ्सा चुवाखोङ्डाङ् ओयेम्सुए, हिट्नुङ् आन्याँ चा हिट्नि डोक् होन्डिङे॥ 4 हिट्नुङ् हिट्नि उयुङागा बिस्वासि भुम्भु-झान्झाचि कोलुम्चिमुङ् टुबुम्चिम्मे हिट्नुङ् हिट्नागालोक् सि लेम्बा सोम्मा युङिङे॥ हिट्निगा बिस्वासिचिङा सेङ्सेङ्ना हाङ्सालाम्मा रिङ् ओटोगुङ् “यरुसलेमङि खाट्नेन्” पिक्सा हिट्नागाँ पावाल ओलोडुए॥ 5 हिट्निलाम्मा आन्याँना खाप्माना बेला लिसाउङ् आन्याँ चुवाखोङ्डाङ्लेङ् खाडिङे, हिट्निगा सोब्बे बिस्वासिचिगा उन्चि टालिमाङ् हिट्नुङ् उन्चि छाचिङा धारि खालाङ्गा भारा सोम्मा याप्मि ओसाए॥ हिट्नुङ् आन्याँ सामुन्दरा ओधारङि टुम्बुट् येप्टुमुङ् बिन्टि चोगिङे, हिट्नुङ् सेन्डिङे॥ 6 टब आन्याँ चुवाखोङ्डाङ्ङि ठाङिङे, हिट्नुङ् हिट्नागा उन्चि पाङ्लेङ् ओनोक्टे॥ 7 टुरोस खालाङ्गालाम्मा आन्याँ टोलेमाइस खालाङ्गाङि टासुमुङ् चुवाखोङ्डाङ्लाम्मा होन्डिङे॥ हिट्नुङ् आन्याँ हिट्निगा बिस्वासि भुम्भु-झान्झाचि टुब्सिङा खाडिङे हिट्नुङ् ठिक् लेम्बा हिट्नागालोक् युङिङे॥ 8 हान्डेङ् हिट्निलाम्मा सेन्डिङाउङ् कैसारिया खालाङ्गाङि टासुम्मे हिट्नुङ् पारचारङाना टोॽवा काचोक्बा फिलिप ओपाङ्ङि खाडिङाउङ् युङिङे॥ फिलिपम्बाक् यरुसलेमङि मुलिचेलाचि घुवार फामाचि लोङ्सा ओसेगुचिगा माड्डेङि ठिबाङ् डाना॥ 9 नाङाना माङ्हाङ्लाम्माना रिङ् कामाप्बाचि टेम्बोक् जाना भ्या उलिनिगेट्निगा मेन्झेमाचि ओडागा॥ 10 आन्याँ फिलिप ओपाङ्ङि ठिक् इप्पोक् लेम्बा सोम्मा युङिङे॥ हिट्ना बेला याहुदिया छेट्रालाम्मा ठिबाङ् आगाबास ओलोडुना माङ्काटा आन्याँ सोरि टाए॥ 11 हिट्नुङ् हिट्ना आन्याँ सोरि आबाउङ् पावालङाना ओफोॽयि फेन्डुङ् आप्पे उलाङ् उमुक् रेक्टुङ् नाड्डे माट्टुए, “सेङ्सेङ्ना हाङ्साङा नाड्डे माट्टुटु, ‘ना फोॽयि टाङ्बालोङ्सा यरुसलेमङि याहुदिचिङा नाड्डे पारिक् डोक् ओरेक्टुटु हिट्नुङ् पानिछोङ्बाचि मुक्ङि उपिडुटु॥’” 12 ना रिङ् खेम्सुमुङ् आन्याँ हिट्निगा बिस्वासि याप्मिचि सोब्बेङा यरुसलेम खाट्नेन् पिक्सा पावाल बिन्टि चोगुम्मे॥ 13 टरो पावालङा माट्टुए, “खानि आहाबिउङ् पोङ् आनिङ्ग्वा आटुक्मेट्टुम्टुम्ना? पोङ्भोने टाङ्बा येसु उनिङ् लोङ्सा आङा खाम्बाङ्ङि ठामा एरोक् माखाक्, टरो यरुसलेमङि सिमा चा टेयार लिङा॥” 14 आन्याँ पावालङाना उनिङ्ग्वा नोक्मा हिनिम्माना निसुमुङ् “टाङ्बाङाना उनिङ्ग्वा गाड्डे डोक् उलियाक्” पिक्सा मिचेक्ङे युङिङे॥ 15 हिट्नुङ्ना टेयार लिसिङाउङ् आन्याँ यरुसलेमलेङ् लाम्टिइङे॥ 16 आन्याँलोक् कैसारियाङिगा आम्टेप्मा बिस्वासि भुम्भु-झान्झाचि चा ओखाडे॥ हिट्नुङ् हिट्नागाँ साइपारसलाम्मा आबाउङ् युङाना ठिबाङ् पाइले डोक् बिस्वासि लिसाना मानासोन ओलोडुना चेला ओपाङ्ङि बासा हेन्सिङा आन्याँ याप्मिओखाट्टे॥ पावालङा याकुब टुबुना 17 आन्याँ यरुसलेम खालाङ्गाङि टासुम्मानाँ हिट्निगा बिस्वासिचिङा हारका उलिसाउङ् स्वागाट् याप्मिओचोगे॥ 18 हान्डेङ् आन्याँ एक्केउ पावाललोक् याकुब ओपाङ्ङि खाडिङे॥ हिट्नि सोब्बे ओठेडोङ्चि उछुमाउङ् उयुङासागा॥ 19 पावालङा हिट्नागा सोब्बे बाबा मेट्टुचे हिट्नुङ् उन्ङा चोगुना टोॽवालाम्मा पानिछोङ्बाचि माझाङि माङ्हाङ्ङा खोड्डे पारिक् टोॽवा चोगुएना हिट्ना सोब्बे रिङ्चि खेम्मेट्टुचे॥ 20 पावाल उरिङ् ओखेम्सुङ् हिट्नागाँ माङ्हाङ् उनिङ् ओचोन्डुए॥ हिट्नुङ् उन् ओलोडुए, “झान्झा खेम्सु, नाहि चा याप्मा हाजार याहुदिचिङा टाङ्बाङि बिस्वास ओचोगुना खान्ङा ठाहा आटोगुएसुए, हिट्नुङ् मोसाङा छेप्टुना धारमाबिधि सोरोक् टेन्मा राजि ओवाहेट्॥ 21 टरो पानिछोङ्बाचिङि उयुङागा याहुदिचिङा ‘मोसाङा छेप्टुना धारमाबिधि टेन्मा कोन्निना हिट्नुङ् ओओचिगा खाताना चोक्मा कोन्निना हिट्नुङ् याहुदिचिगा रिति रिवाज मानाँ चोक्मा कोन्निना’ पिक्सा खान्ङा आहिसिक्टुचिगा बो पिक्सा हिट्नागाँ ओखेम्सुएसुए॥ 22 हिट्डेउङ् हाट्ले आन्याँ पाक् चोग्याँगा? खान् नाहि आटायाना रिङ् हिट्नागाँ ओखेम्सुएट्टुटु॥ 23 हाट्ले आन्याँ लोना गाड्डे चोगा॥ नाहि माङ्हाङ्लोक् चामारसिङा ओचोगा टेम्बोक् जाना बिस्वासिचि आन्याँलोक् ओवाहेट्॥ 24 नागा याप्मिचि खाट्टुचिउङ् माङ्ठानाङि खाडा हिट्नुङ् चोख्याँ लिसानि॥ हिट्नुङ् नागा लोङ्सा चाहाब् लिगा थोक्चि खान्ङा डोक् भोरपुर चोगुबिडुचि हिट्नुङ् हिट्नागाँ फ्याक् ओखोक्टुवाक्॥ नाड्डेउङ् खान्ङा धारमाबिधि मानाँ आचोगुना उनिसुङ् खान्ङाना बारेङि ओखेम्सुना रिङ् माङ्जो रैछो नुङ् सोब्बेङा ठाहा ओटोगुटु॥ 25 टरो पानिछोङ्बा बिस्वासिचि लोङ्साम्टे ‘मुरतिङि ठाङ्बालाक् थोक् चानेनुम्, ओहेलिक्, ठोॽवारिक् उरिङ्सुङ् सेप्बालाक् जिवाट्ङा उसा चानेनुम् हिट्नुङ् इम्मेप्माजामा टोॽवा चोक्नेनिन्’ पिक्सा पाइले डोक् चिट्ठि छेप्टुमुङ् हाक्टुएसुम्चिमे॥” 26 हान्डेङ्लेङ् पावालङा हिट्नागा टेम्बोक् जाना याप्मिचि माङ्ठानाङि खाट्टुचिउङ् सोब्बे चोख्याँ उलिसे॥ हिट्नुङ् चोख्याँ लिमाना लेम्बा खोना बेला लाट्युक्ना हिट्नुङ् सोब्बेङा भोक् ठाङ्माना रिङ् पुजारिचि लोसिङा पावाल माङ्ठाना भिट्रा लिगे॥ पावाल माङ्ठानाङि ओलाबुना 27 चोख्याँ लिमाना लाट्टाना सि लेम्बा लिसाना बेला, एसिया छेट्राङिगा याहुदिचिङा पावाल माङ्ठानाङि उनिसुङ् ख्वाप्पा याप्मिचिगा खिमेयाङ्मे मुसिप्पा ओचाट्टुचिउङ् उन् ओलाबुए॥ 28 हिट्नागा टाराङ्-टाराङ् राट्सा नाड्डे उपिगे, “इस्राइलि याप्मिचि, आबानि हिट्नुङ् घुवार याप्मि फाडा॥ आनि छोङ्बाचि बिरुद्दाङि, आनि धारमाबिधि बिरुद्दाङि हिट्नुङ् ना माङ्ठाना बिरुद्दाङि टोम्बो योम्बो वासा याप्मिचि काहिसिक्बा याप्मि ना डोक् ए॥ नाट्टेप्मा एडोक् माखाक्, नाङा पानिछोङ्बाचि चा माङ्ठानाङि लिगुचिउङ् ना सेङ्सेङ्ना डेन् आसुद्दो चोगुए॥” 29 पोङ्भोने हिट्नागाँ एफिसासलाम्मा आबाना तोरफिमास ओलोडुना याप्मि पावाललोक् एक्केउ खालाङ्गाङि वासाचिगा उनिसुचिगा डागा, हिड्डेउङ् पावालङा हिट्ना याप्मि माङ्ठाना भिट्रा लिगुए नुङ् उमिट्टाउङ् हिट्डे उपिगे॥ 30 ना रिङ् खालाङ्गा टेप् खालाङ्बालाङ् लिसाउङ् याप्मिचि ख्वाप्पालाम्मा पिन्सा हिट्नि ओटाए॥ हिट्नागाँ पावाल ओलाबुङ् माङ्ठानालाम्मा डोरो डोरो साट्सा भारा ओहोट्टुए, हिट्नुङ् हिट्ना बेला डोक् माङ्ठानाङिगा ढुवारिक्चि उछुप्टुचे॥ 31 हिट्नुङ् याप्मिचिङा पावाल सेप्मा निङ्ग्वा ओचोगुएट्टुना, हिट्ना बेला यरुसलेमङि खालाङ्बालाङ् लिसाना रिङ्ङाना खाबोर रोमि टिलिङ्गाचिगा सेनापतिङा खेम्सुए॥ 32 हिट्डेउङ् उन् हिट्ना बेला डोक् टिलिङ्गाचि लोक् काप्तानचि खाट्टुचिउङ् याप्मिचिगा खिमेयाङ्मेलेङ् पिन्सा लिगे॥ खिमेयाङ्मेङिगा याप्मिचिङा सेनापति हिट्नुङ् टिलिङ्गाचि ओआबागा उनिसुचिउङ् पावाल लेम्मा ओनाडुए॥ 33 टब हिट्ना सेनापति नेहेट्टाङ् खाडाउङ् पावाल लाबुए हिट्नुङ् इप्पोक् धाउङाना साङ्लाङा रेक्मा मेट्टुचे॥ हिट्नुङ् “ना याप्मि साइना हिट्नुङ् पाक् चोगुएना?” पिक्सा याप्मिचि सिलाप्टुचे॥ 34 टरो हिट्नि उछुमागा याप्मिचिङा कोइङा ठिक् रिङ् ओमाट्टुए, कोइङा आरको रिङ् माट्सा ओराट्टे॥ ना खालाङ्बालाङ्ङा सेनापतिङा पाक् घाट्ना लिसेना नुङ् ठाहा डोक् टोक्मा हिडुवाट्टुन्, हिट्नुङ् उन्ङा पावाल टिलिङ्गाचिगा ब्यारेकङि खाट्टानुम् पिक्सा आग्याँ पिडुचे॥ 35 जब पावाल लाम्टिमाना सिंढिङि होन्डा आबे हिट्नुङ् याप्मिचिगा खिमेयाङ्मेङा उन् सेप्मा लोङ्सा ओपाट्टुए॥ हिट्डे लिसाउङ् टिलिङ्गाचिङा उखुयुङ् ओखाट्टुए॥ 36 पोङ्भोने याप्मिचिगा खिमेयाङ्मे उन्चि ओएङ्-ओएङ् ओखाडाउङ् “ना याप्मि सेडानुम्, सेडानुम्” पिक्सा ओराट्टा याक्टे॥ पावालङा याप्मिचि सोरि ओबारेङि माट्टुना 37 टिलिङ्गाचिङा पावाल ब्यारेक भिट्रा ओहोट्टुना बेला उन्ङा सेनापति लोडुए, “आडाङ्बा, खान् ठिक् रिङ् लोमा हिनाँनि?” हिट्ना सेनापतिङा लोडुए, “हाउ, खान् गिरिक् रिङ् चा आचेक्ना इ? 38 पाक् खान् इम्टेप्मा बारखा पाइले सारकार बिरुद्दाङि आकोबाना मिस्रि याप्मि इ? हिट्नाँ टेम्बोक् हाजार याप्मिचि साक्चा उयुङ्निना डेन्ङि सारकारङाना बिरोध काचोक्चि लाम्बेट्टुचे॥” 39 पावालङा लोडुए, “आडाङ्बा, आङाउम्टे किलिकिया छेट्राङि टारसास खालाङ्गाङि पोङ्साङ्ना याहुदि याप्मि॥ आङाउम्टे हिट्ना निङ्ला मुक्टाना खालाङ्गाङिना ठिबाङ् याप्मि॥ आङा स्या मेट्नाँ, नागा याप्मिचि टोकानाङि ठिक् इप्पोक् रिङ् चेक्मा याङ्पिडा लो॥” 40 सेनापतिङा पावाल याप्मिचि सोरि चेक्मा लोङ्सा पिडुए, हिट्नुङ् पावाल सिंढिङि येबाउङ् याप्मिचि स्वाग् लिसानि पिक्सा उमुक्ङा इसारा चोगुचे॥ याप्मिचि चेक्मा ओनाडुङ् उन्ङा हिट्नागा हिब्रु रिङ्ङि नाड्डे लोडुचे, |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.