मुलिचेला टोॽवा 18 - आठपहरियापावाल कोरिन्थि खालाङ्गाङि खाडाना 1 हिट्नुङुना पावाल एथेन्स नाडुङ् कोरिन्थि खालाङ्गाङि खाडे॥ 2 हिट्नि उन्ङा पोन्टास छेट्राङि युङ्ना आकिलास निङ् ओलोडुना ठिबाङ् याहुदि टुबुए॥ हिट्ना ओटालिमाङ् पिरिस्किलालोक् इटालिया देसलाम्मा लोप्मो टाइसाना, पोङ्भोने रोमङिना सासाक् क्लौडियास ओलोडुना याप्मिङा सोब्बे याहुदिचि “रोम खालाङ्गा नाडानुम् खाडानि” पिक्सा आग्याँ पिडुचे॥ हिट्नुङ् पावाल आकिलास लोक् पिरिस्किला टुब्सिङा खाडे, 3 पोङ्भोने पावालङा पाल चोक्माना टोॽवा चोगुगा डागा हिट्नुङ् हिट्नागाचिङा चा पाल चोक्माना टोॽवा डोक् चोगाचुगा डाचिगा॥ हिट्डेउङ् उन् हिट्नागाचिलोक् युङे हिट्नुङ् एक्केउ टोॽवा ओचोगे॥ 4 पावाल सोरोक् युङ्माना लेम्बा याहुदि छुम्मापाङ्ङि खाडाउङ् याहुदि हिट्नुङ् गिरिक् याप्मिचिलोक् रिङ्पान् चोगाना हिट्नुङ् याहुदिचि लोक् गिरिक् याप्मिचिङा चा येसुङि बिस्वास ओचोगुवाक् नुङ् हिट्नागा लोडुचे॥ 5 सिलास लोक् तिमोथि माकेडोनिया छेट्रालाम्मा आबाचे, पावालङाम्बाक् येसुङाना बारेङि पारचार चोग्माना टोॽवा डोक् चोगुएट्टुना॥ हिट्नुङ् उन्ङा “येसु डोक् खिरिस्ट ए” पिक्सा याहुदिचि पारचिन्दा उलिलोक् लोडुचे॥ 6 टरो याहुदिचि पावालङाना बिरुद्दाङि ओकोबे हिट्नुङ् ओचाफेन्लोक् ओलोडुए॥ पावालङा हिट्नागा ओछेक्छेक् उलियाक् नुङ् ओलोट्लिङ्ङिना खाम्सेरेक्वा ठाम्सा लोडुचे, “खानि आमेगिए भोने, खानिङा आप्पे आचोगुम्ना फाट्टुरलाम्मा डोक् आमेगिटि॥ खानिङा आङा फाट्टुर लाप्मा आटोग्निम्ना॥ हाट्लेलाम्मा आङा पानिछोङ्बा याप्मिचिङि नुना खाबोर पारचार चोक्ङा खाट्नाँ॥” 7 हिट्नुङ् पावालङा याहुदि छुम्मापाङ् नाडुङ् हिट्नालाम्मा माङ्हाङ्ङाना माङ्ध्यान् काचोक्बा ठिबाङ् तितास युस्तास उनिङ् लिसाना याप्मि ओपाङ्ङि खाडे॥ हिट्नाङाना ओपाङ् याहुदिचिगा छुम्मापाङ् सोरि डोक् डाना॥ 8 याहुदि छुम्मापाङ्ङिना ओठेडोङ् किरिस्पास हिट्नुङ् ओपाङ्ङिगा सोब्बे याप्मिचिङा टाङ्बाङि बिस्वास ओचोगुए हिट्नुङ् कोरिन्थिङिगा जोम् याप्मिचिङा पावालङा पारचार चोगुना नुना खाबोर ओखेम्सुङ् बिस्वास ओचोगुए, हिट्नुङ् बाप्टिस्मा ओलाडुए॥ 9 ठिक् युसा टाङ्बाङा पावाल निमापुमा पिडुङ् लोडुए, “खान् किट्नेन्, नुना खाबोर पारचार चोगुयाक्टु॥ टरो मिचेक्ङे युङ्नेन्॥ 10 पोङ्भोने आङा खान् घुवार फानाँ हिट्नुङ् साङा चा खान् पाक्चा मेट्मा माहिनिना, पोङ्भोने ना खालाङ्गाङि आङा सेगुङ्चिङ्गा जोम् आयाप्मिचि ओवाहेट्॥” 11 हिट्नुङ् पावाल ठिक् बारखा ङा माइना सोम्मा कोरिन्थि खालाङ्गाङि युङे, हिट्नुङ् माङ्हाङ् रिङ् याप्मिचि हिसिक्टुचे॥ 12 आखैया छेट्राङि गालियोन ओलोडुना याप्मि सासाक् लिसाना बेला याहुदिचि ओटोङाउङ् पावाल ओपाट्टुए हिट्नुङ् ओलाबुङ् सासाक् सोरि ओखाट्टुए, 13 हिट्नुङ् नाट्डे ओलोडुए, “ना याप्मिङा आनि याहुदि धारमाबिधिङा माट्टुना नुङ्ना एकेलेङ् पाराङा माङ्हाङ् माङ्ध्यान् चोक्मा कोन्युक् पिक्सा याप्मिचि हिसिक्टुचिउङ् लेगालाप्टुएट्टुचि॥” 14 पावाल चेक्टा लाबाना बेला गालियोन ओलोडुना याप्मिङा याहुदिचि लोडुचे, “हाउ याहुदिचि, ना रिङ् छेम्बा डोक् ओचाफेन्ना टोॽवा आथाबा आपाराधङाना रिङ् नाम्बे आङा खानि रिङ् खेम्मा ओचेट्नुना डोक् लिसे॥ 15 टरो ना रिङ्उम्टे साब्दाचि, निङ्चि हिट्नुङ् खानि आप्पे धारमाबिधिङाना रिङ् रैछो खानिङा आप्पे टोङ्सानुम्॥ आङा नागा रिङ्ङाना न्याए चोक्निङ्ना॥” 16 हिट्नुङ् गालियोनङा हिट्नागा सोब्बे आदालातलाम्मा भारा होटुडिसुचे॥ 17 हिट्नुङ् याहुदिचिङा उन्चि छुम्मापाङ्ङिना ओठेडोङ् सोस्थेनेस ओलाबुङ् आदालात सोरि डोक् ओलेम्सुए॥ टरो गालियोनङा हिट्नागा खेम्गेन्डोक् लाप्टुवाट्टुन्चिन्॥ पावाल एन्टिओखिया खालाङ्गाङि नोक्टाना 18 पावाल बिस्वासिचिलोक् याप्मा लेम्बा सोम्मा कोरिन्थि खालाङ्गाङि युङे॥ हिट्नुङ् पावाल हिट्नागालोक् सेन्डाउङ् हिट्निलाम्मा लाम्टियाउङ् किंकिरिया खालाङ्गाङि टासुए हिट्नुङ् आम्टेप्मा बेला पाइले पावालङा चामारसिङा चोगुएसुनाँ हिट्नि उन्ङा ओफ्याक् खोक्मेट्टुचे॥ हिट्नुङ् चुवाखोङ्डाङ्ङि ठाङाउङ् पिरिस्किला हिट्नुङ् आकिलासलोक् सिरियालेङ् खाडे॥ 19 हिट्नागा एफिसास खालाङ्गाङि ओटासुङ् पावालङा पिरिस्किला लोक् आकिलास हिट्नि डोक् नाडुचे॥ हिट्नुङ् पावालउम्बाक् याहुदिचिगा छुम्मापाङ्ङि खाडाउङ् याहुदिचिलोक् बादबिबाद चोगे॥ 20 याहुदिचिङा पावाल उन्चिलोक् होप्मो लेम्बा सोम्मा युङा नुङ् बिन्टि ओचोगुए, टरो उन् टेन्नेयाट्नि॥ 21 हिट्नुङ् पावालङा नाट्डे लोडुचिउङ् हिट्नागालोक् सेन्डे, “माङ्हाङ्ङाना उनिङ्ग्वा लिसे भोने, आङा फेरि खानि सोरि नोक्ङा टाङा॥” हिट्डे लोडुचिउङ् उन् चुवाखोङ्डाङ्ङि ठाङाउङ् एफिसासलाम्मा लाम्टिए॥ 22 हिट्नुङ् उन् कैसारिया खालाङ्गाङि होन्डाटायाउङ् हिट्नालाम्मा टो यरुसलेम खाडे, हिट्नुङ् हिट्नि माङ्पाङ्ङिगा बिस्वासिचि टुबुचे॥ हिट्नुङ् उन् हिट्नालाम्मा एन्टिओखिया खालाङ्गाङि उङ्से॥ 23 हिट्नुङ् हिट्नि होप्मो लेम्बा सोम्मा युङे॥ हिट्नुङ्ना उन् गालातिया लोक् फिरगिया छेट्रा टेप् लाम्टियाउङ् हिट्निगा सोब्बे बिस्वासिचि बिस्वासङि बोल्लेउ लिसानि पिक्सा आँट् पिडुचे॥ आपोल्लोस एफिसास खालाङ्गाङि 24 हिट्ना बेला आलेक्जेन्डरिया खालाङ्गाङि पोङ्साना आपोल्लोस निङ् लिसाना ठिबाङ् याहुदि याप्मि एफिसासङि टाए॥ हिट्ना नुना ओठोना लिसाना हिट्नुङ् औधि नुलोक् चेक्मा निसुना याप्मि डाना हिट्नुङ् उन्ङा धारमाछाप्लाङिगा रिङ् जोम् निसुगा डागा॥ 25 उन्ङा येसु डाङ्बाङा निमेट्टुना चोला टोगुम्ना लाम्बोङाना बारेङि हिसिक्मा टोगुएसुना, हिट्नुङ् आड्डिक् छोम्बोक् छोम्बोक् लिसाउङ् येसुङागा रिङ्चि ओचेट्नुलोक् याप्मिचि हिसिक्टुचिगा डागा॥ टरो चा आपोल्लोसङा युहान्नाङा पिडुचिगा बाप्टिस्मा एडोक् ठाहा टोगुएसुना॥ 26 उन् याहुदिचिगा छुम्मापाङ्ङि मिकिट्ने चेक्मा ठालाँ चोगुए॥ जब उन् चेक्टानाँ पिरिस्किला लोक् आकिलासङा खेम्साचुए हिट्नुङ् हिट्नागाचिङा उन्चि पाङ्ङि खाट्टाचुए, हिट्नुङ् माङ्हाङ्ङा आनिमेट्टाना चोला टोगुम्ना रिङ् आझा पारचिन्दा उनिसुवाक् नुङ् लोडाचुए॥ 27 हिट्नुङ्ना आपोल्लोसङा आखैया छेट्राङि खाप्माना निङ्ग्वा चोगुए॥ हिट्नुङ् एफिसासङिगा बिस्वासि भुम्भु-झान्झाचिङा खाप्माउङ्सा आँट् उपिडुए, हिट्नुङ् आखैयाङिगा बिस्वासिचि लोङ्सा “खानिङि आपोल्लोस आप्युगेट् स्वागाट् चोगानुम् ए” पिक्सा ठिक् पाट्रा ओछेप्टुङ् ओहाक्टुचे॥ हिट्नि टासुङ् आपोल्लोसङा माङ्हाङ्ङा पिडुना दायालाम्मा येसुङि बिस्वास काचोक्बाचि जोम् घुवार फाडुचे॥ 28 पोङ्भोने हिट्निगा याहुदिचिलोक् याप्मिचि टोकानाङि जोम् बादबिबाद चोगाउङ् हिट्नागाँगा बिरोध चोक्सा उन्ङा धारमाछाप्लालाम्मा “येसु डोक् खिरिस्ट” नुङ् पारमान् चोगुङ् निमेट्टुचे॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.