३ युहान्ना 1 - आठपहरिया1 आङा माङ्पाङ्ङिना ओठेडोङ् युहान्नालाम्मा, छेम्बा डोक् आङा माया चोगुङ्ना गायासलाउङ्सा ना चिट्ठि छेप्टुङ्गेट्टुङ्॥ 2 मायालु आसाइबा, हिट्नुङ् माङ्हाङ्लोक् खान्ङाना साम्बान्धा नुलोक् लिसा गाड्डे डोक् खान्ङाना सोब्बे रिङ् ओचेट्नु उलि हिट्नुङ् कायेम् चा नुलोक् उलियाक् नुङ् आङा बिन्टि चोगुङ्टुङ्॥ 3 आम्टेप्मा भुम्भु-झान्झाचि ओआबाउङ् खान् माङ्हाङ्ङाना छेम्बाना लाम्बोङि आलाम्टियाना रिङ् याङ्ओलोडाङ्ना आङा आड्डिक् हारका लिसाङे॥ हिट्नुङ् छेम्बा डोक् खान् हिट्ना पारा डोक् आचोग्येट् नुङ् आङा ठाहा टोगुङ्टुङ्॥ 4 आङागा पिच्छाचि छेम्बाना लाम्बोङि ओलाम्टिएट्गा रिङ् खेम्मा टोक्मा नुङ्ना आरु ठेना हारका आङि पाक्चा वाइना॥ 5 मायालु आसाइबा, खान्ङा बिस्वासि भुम्भु-झान्झाचि मिसेन् आनिसुन्चिन्चा घुवार आफाडुचिउङ् ओचेट्नुना टोॽवा डोक् आचोगुएट्टु॥ 6 हिट्नागाँ खान्ङा आचोगुचिगा मायाङाना बारेङि नेहिना माङ्पाङ्ङिगा बिस्वासिचि सोरि ओमाट्टुएसुए॥ खान्ङा माङ्हाङ् हारका लिना रिङ् चोगुङ् हिट्नागा आरु ठोङ्ङि ओखाट्नाँ चा घुवार फामाचि कोन्युक्॥ 7 पोङ्भोने हिट्नागा टाङ्बाङाना डोक् सेवा चोक्मा लाउङ्सा आबिस्वासिचिलाम्मा पाक्चा मिआप्मे याट्राङि ओहोन्डाइसे॥ 8 आनि बिस्वासिचिङा नाड्डेगा याप्मिचि घुवार फामाचि कोन्युक्, नाड्डेउङ् आनि छेम्बाना रिङ् लाउङ्सा हिट्नागाँगा टोॽवाङि घुवार फाडुम्चिमुङ् उन्चिलोक् एक्केउ टोॽवा काचोक् लिसिटि॥ 9 आङा माङ्पाङ्लोङ्सा चिट्ठि छेप्टुङ्ना डाना, टरो खानिङि आप्पेलोङ्सा ठेना लिमा कोन्ना डियोतिरफासङा आरिङ्ङि उनिङ्ग्वा टिसुन्ना॥ 10 हिड्डेउङ् जब आङा खानिङि आप्माँ, हिट्नुङ् हिट्ना पाक् चोक्येट्ना हिट्ना रिङ् खानि लोनाँनि॥ हिट्नाङा आनि बिरुद्दाङि ओचाफेम्मा रिङ् माट्टुगोन्डु॥ हिट्टेप्मा एरोक् माखाक्, हिट्नाङा आनि बिस्वासि भुम्भु-झान्झाचि स्वागाट् चोगुन्चिन्गा, हिट्नुङ् स्वागाट् चोक्मा निङ्ग्वा काचोक्चि चा चोक्मा पिडुन्चिन्गा, हिट्नुङ् हिट्नागा माङ्पाङ्लाम्मा भारा होट्टुचिगा॥ 11 मायालु आसाइबा, नाड्डेगा ओभेन्गा टोॽवा काचोक् याप्मिचिगा चाट्ला योॽवा चोगुन्, टरो नुना रिङ् एरोक् सिकाँ लिसा॥ जुन् याप्मिङा ओचेट्नु चोगुटु हिट्ना माङ्हाङ्ङाना ओयाप्मि ए॥ जुन्ङा ओचाफेम्मा टोॽवा चोगुटु, हिट्नाँ माङ्हाङ् मिसेन् डोक् निसुन्गेट्टुन्ना॥ 12 डेमेतिरयासम्बाक् सोब्बेङा ओचेट्नु ओलोडुना, हिट्नुङ् उन् छेम्बाना रिङ्ङि वाना युङ्ना, हिट्नुङ् ना रिङ्ङा डोक् उन् ओचेट्नुना याप्मि नुङ् पारमान् चोगुटु॥ हिट्नुङ् आनि चा नाङाना साँचि पिडुम्टुम्, हिट्नुङ् आनि साँचि छेम्बाना नुङ् खान्ङा ठाहा आटोगुटु॥ 13 आङा खान्लाउङ्सा लोमाना रिङ्उम् याप्मा युङ्ग्वा, टरो हिट्नागा रिङ् आङा चिट्ठिङि छेप्निङ्ना॥ 14 पोङ्भोने खान्लोक् एला डोक् टुब्माना आसा युङ्ग्वा, हिट्नुङ् आन्चि टुब्चिउङ् मुन्डुप्चि॥ 15 माङ्हाङ्ङाना हाङ्हाङ् खान्लोक् उलियाक्॥ नाहि उलिसागा सोब्बे कासाइबाचिङा चा खान् बाबा माहाक्टाइसे, हिट्नुङ् हिट्नि उलिसागा सोब्बे आनि साइबाचिलोङ्सा आङाना बाबा खेम्मेट्टुचि॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.