२ युहान्ना 1 - आठपहरिया1 आङा माङ्पाङ्ङिना ओठेडोङ्लाम्मा माङ्हाङ्ङा सेगुना मेन्झेमा लोक् ओछालेट्चिलोङ्सा ना चिट्ठि छेप्टुएट्टुङ्॥ छेम्बा डोक् आङा खानि ख्वाप्पा माया चोक्नाँनि॥ आङा एरोक् माखाक् टरो छेम्बाना रिङ् ठाहा काटोक्बा सोब्बेङा खानि माया माचोगिटि॥ 2 आन्याँ खानि माया चोक्नाँनि, पोङ्भोने छेम्बाना रिङ् आनिङि युङ्ग्वा हिट्नुङ् हिट्ना रिङ् आनिलोक् सोरोक् लियुयाक्युक्॥ 3 माङ्हाङ् पाबा हिट्नुङ् उन्ङाना छा येसु खिरिस्टङा आनिलोङ्सा मायादाया, लुक्माटुक्मा हिट्नुङ् हाङ्हाङ् आपियाक्॥ हिट्नुङ् नागा सोब्बे थोक् छेम्बाना रिङ्ङा हिट्नुङ् मायाङि आनिगा उलियाक्॥ छेम्बाना रिङ् हिट्नुङ् माया 4 काइछाचि माड्डे आम्टेप्मा जाना माङ्हाङ् पाबाङा आनि आलोडाना गाड्डे सात्तेताङि ओवासागा खेम्सुङुङ् आङा आड्डिक् हारका लिसाइसाङे॥ 5 हाउ मायालु झान्झा, आनि सोब्बेङा ठिबाङ्ङा आरकोलोङ्सा माया चोक्मा कोन्युक् नुङ् आङा खान् बिन्टि चोक्नाँ॥ आङा खान्लाउङ्सा खोना चा ओछोङ्ग्वाट् आग्याँ छेप्टुङ्ना माखाक्, टरो उटुम्लाम्मा आनिलोक् लिसाना आग्याँ डोक् छेप्टुएट्टुङ्॥ 6 माया चोक्माम्बाक् माङ्हाङ्ङा आनि आलोडाना गाड्डे लाम्टिमा ए॥ खानिङा उटुम्लाम्मा आखेम्सुम्ना आग्याँम्बाक् ना डोक् ए– खानि सोब्बेङा ठिबाङ्ङा आरको माया चोक्मा कोन्युक्॥ 7 आङा ना रिङ् लोनाँनि पोङ्भोने छालाँ काचोक् याप्मा याप्मिचि नारा टेप् ओहोन्डाइसे॥ हिट्नागाँ येसु खिरिस्ट याप्मिङाना उरुपङि टायाना नुङ् ओलाडुन्ना॥ नाड्डेगा याप्मिचिउम्बाक् याप्मि छालाँ काचोक् खिरिस्टङाना ओसाट्टुरचि ए॥ 8 हिड्डेउङ् ओछेक्छेक् युङानि, जुन् रिङ् लाउङ्सा आनि टोॽवा चोगेएट्टि, हिट्ना इनाम् मामाना माखाक् टरो सोब्बे इनाम् टोक्माना लिसानि॥ 9 खिरिस्टङाना हिसिक्माङि निङ्ग्वा टिसुन्ना टरो आरु रिङ्ङि निङ्ग्वा टिसुना याप्मिलोक् माङ्हाङ् लिनिना॥ टरो जुन् याप्मिङा खिरिस्टङाना हिसिक्माङि उनिङ्ग्वा टिसुटु हिट्नालोक् माङ्हाङ् पाबा हिट्नुङ् छा इप्पाङ् डोक् लिचिचि॥ 10 हिट्नुङ् कोइ याप्मि खानि सोरि खिरिस्टङाना बारेङि छेम्बाना हिसिक्मा टाडुन्ना भोने हिट्ना खानि पाङ्ङि स्वागाट् चोक्नेनुम्, हिट्ना स्या चा चोक्नेनुम्॥ 11 पोङ्भोने हिट्ना स्या चोक्मा डोक् हिट्नाङाना भेन्ना टोॽवाङि घुवार फामा ए॥ 12 आङा खानि लोमाना याप्मा रिङ् आनिङ्ग्वाङि युङ्ग्वा, टरो हिट्नागा रिङ् चिट्ठिङि छेप्निङ्ना॥ टरो आङा एला डोक् आब्मा हिट्नुङ् टुबियुङ् डोक् मुन्डुप्टि नुङ् आनिङ्ग्वाङि लोसाइसाङे॥ हिट्ना बेला आनि एक्केउ आड्डिक् हारका लिसिटि॥ 13 माङ्हाङ्ङा सेगुना खान्ङाना आप्पे कान्झाङाना छाचिङा चा खान् बाबा मालोडाइसे॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.