२ कोरिन्थि 11 - आठपहरियापावाल लोक् माङ्जोगा मुलिचेलाचि 1 आङा मुरखा गाड्डे डोक् चेक्ङायाक्ङा भोने चा खानिङा याङ्आङ्डिटिङा नुङ् आसा युङ्सुङ्टुङ्॥ आङा याङ्आङ्डानि॥ 2 माङ्हाङ्ङा खानि माया हिट्नुङ् निङ्ग्वा माचोगि गाड्डे डोक् आङा चा खानि याप्मा माया चोक्नाँनि॥ आङाउम्टे ठिबाङ् बेउला उप्पाङा मेन्झेमा उइछा भ्या चोक्माबिमा चामारसिङा चोगु गाड्डे डोक् खिरिस्ट खानिलाउङ्सा पिमाना बाचा चोगुएसुङे॥ हिड्डेउङ् खानिलाउङ्सा उन्ङाना चोखो बेउलि नुङ् पिमाना निङ्ग्वा चोगुङ्टुङ्॥ 3 टरो याप्मा बारखा पाइले ओप्पुङा ओचाप्पाङ् रिङ् लोडुङ् हाब्बा छालाँ चोगु गाड्डे डोक् खानि चा खिरिस्टङि आचोगुम्ना सोजो हिट्नुङ् चोखो भाक्तिलाम्मा लाप्माङ् माखाट्टिटि नुङ् आङा किट्टाइसाङे॥ 4 पोङ्भोने कोइ खानि सोरि ओआब्युङ् आन्याँ पारचार चोगुम्माना येसु नुङ्ना आरको येसुङाना बिसाएङि पारचार ओचोगुटु भोने खेम्मा हारका आलिसिगा॥ हिट्नुङ् खानिङा पाइले आलाडुम्ना हाङ्सा नुङ्ना आरको हाङ्सा आथाबा पाइले आन्याँ पारचार चोगुम्माना नुना खाबोर नुङ्ना आरको खाबोर बिस्वास चोक्मा हारका आलिसिगा रैछो॥ 5 हिट्नागा ठेगा मुलिचेलाचि नुङ् उपिग्गा याप्मिचि नुङ्ना आङा खाट्टिप्मा चा खाट्टियुना नुङ् मिट्निङ्ना॥ 6 आङा चेक्मा नुलोक् भाँटि टाट्निङ् चा पाक् चेक्ङेट्ङाना नुङ् ठाहा टोगुङ्टुङ्॥ आन्याँ ना रिङ् सोब्बे पारिक्लाम्मा खानिङि पारचिन्दा चोगुएसुम्मे॥ 7 आङा माङ्हाङ्ङाना ना नुना खाबोर पारचार चोगुङ्नाँ खानिङा पालोवालो हुङानुम् नुङ् आङा काइले चा नाक्नेयाट्निङ्॥ टरो खानि टो आलिस्याक् नुङ् आङा आप्पेलाउङ्सा यो चोगुङे॥ पाक् आङा नाड्डे चोक्मा गाल्ति लिसेनि टे? 8 आङा खानि घुवार फामाउङ्सा आरु माङ्पाङ्ङिगा याप्मिचिलाम्मा ओफाबा टोगुङे॥ नाड्डे चोक्माम्बाक् सुप्मा ए नुङ् खानिङा माप्मा लिनिना॥ 9 हिट्नुङ् खानिलोक् आङा वासाङ्नाँ आङा चाहाब् लिसाङ्ना बेला खानि खोना चा दुखे पिनेट्निन्, पोङ्भोने आङा लाउङ्सा चाहाब् लिसागा सोब्बे थोक् माकेडोनियालाम्मा ओआबागा बिस्वासिचिङा डोक् याङ्ओटोङ्साबिडे॥ नाड्डेउङ् आङा खानिलाउङ्सा याङ्छामा पिनेट्निन् हिट्नुङ् हान्डेङ् चा हिट्नाड्डे डोक् चोक्ङा॥ 10 खिरिस्टङाना छेम्बाना खाबोर आनिङ्ग्वाङि लिलोक् ना ठेलोक् चोक्माना रिङ् माप्मा आखैया छेट्रा टेप्गा खोनाङा चा आङा छाक्मा उहिनिङ्गा॥ 11 खानि आङा माया चोक्नेनिन्गा, पोङ्भोने खानिलाम्मा ओफाबा लाट्नेएट्निङ् नुङ् पाक् खानि आमिट्टिटिगि? हिट्डे माखाक्, आङा खानि आम्टेप्मा औधि माया चोक्नानि हिट्ना रिङ् माङ्हाङ्ङा ठाहा टोगुटु॥ 12 टरो आङा सोरोक् चोगुङ्ना टोॽवा डोक् चोगुङ्याक्टुङ्टुङ्॥ हिट्नुङ् आप्पे ठेगा मुलिचेलाचि नुङ् लिमा ओकोन्गा याप्मिचिङा आन्याँ चोगुम्मागा टोॽवा गाड्डे डोक् चोगुएट्टुम्मा नुङ् ठेलोक् रिङ् पिक्मा उहिडुन्गा॥ 13 पोङ्भोने हिट्नागा याप्मिचि माङ्जोगा मुलिचेलाचि हिट्नुङ् कासुप्बा टोॽवा काचोक्चि ए, हिट्नुङ् हिट्नागा खिरिस्टङाना मुलिचेलाचि गाड्डे लिमा एडोक् ओकोन्गा, टरो हिट्नागा माखाक्॥ 14 हिट्नुङ् ना रिङ् छाक्का डोक् लिमायेट्माना रिङ् माखाक्, पोङ्भोने सैतान आप्पे चा ओम्ना माङ्हाङ् रिङ् काउग्बा गाड्डे फेराँ लिना॥ 15 हिट्नाड्डेउङ् सैतान ओसेवाक्चि चा माङ्हाङ् ओटोकानाङि धारमोति ओसेवाक्चि गाड्डे ठेट्मा छाक्का लिमाना रिङ् माखाक्॥ आखेरिङि हिट्नागाँ जोस्तो टोॽवा ओचोगेसुए हिट्नाडेना डोक् साजाए ओटोगुटु॥ पावालङाना दुखे 16 आङा फेरि लोनाँनि, आङा खोनाङा चा ठोनाबा याप्मि नुङ् याङ्उमिट्निङ्चा॥ टरो खानिङा ठोनाबा याप्मि नुङ् आमिट्टिटिङा भोने ठोनाबा याप्मि गाड्डे डोक् याङ्लाडानि, हिट्नाड्डेउङ् आङा खाट्टिप्मा आनाभुक् ठेलोक् चोक्मा टोगुङ्टुङ्॥ 17 आङा ना ठेना रिङ् चेक्माम्बाक् टाङ्बाङाना उनिङ्ग्वा गाड्डे माखाक्, टरो ठोनाबा चेक्टि पारा डोक् आङा ठोनाबा रिङ् चेक्ङा॥ 18 पोङ्भोने याप्मा याप्मिचिङा उन्चिङा ओचोगुना टोॽवाङि उन्चि नाभुक् ठेना ओचोगुटु भोने, आङा चा आनाभुक् ठेलोक् चोगुङ्टुङ्॥ 19 पोङ्भोने खानिङा याप्मा रिङ् बुजा चोगुम्मागा नुङ् आमिट्टुम्गा, टरो चा ठोनाबाचि खुसि आलिसिउङ् आआङ्डुम्चिम्गा रैछो॥ 20 छेम्बा डोक्, कोइङा खानि कामारा माचोगि चा, खानिलोक् लिसागा ख्वाप्पा थोक् ओखाट्टु चा, खानि माटेप्टि चा, ठेलोक् ओचोक्चा, हिट्नुङ् खानि काकालाङि मालेम्सि चा खानिङा आआङ्डुम्चिम्गा रैछौ॥ 21 आन्याँ हिट्नागाँ ओचोगु गाड्डे चोक्मा निम्छारो लिसिङागा रिङ् माप्मा आङा मोन्निसिङा॥ टरो कोइङा ठेना लिमाना रिङ् चोक्युक् भोने, आङा चा हिट्नागा रिङ्ङि ठेना लिमाना रिङ् चोक्ङा॥ आङा चेक्माम्बाक् ठोनाबा गाड्डे डोक् चेक्ङेट्ङा॥ 22 पाक् हिट्नागा हिब्रु याप्मिचि इ? आङा चा हिब्रु याप्मि डोक्॥ पाक् हिट्नागा इस्राइलि याप्मिचि इ? आङा चा इस्राइलि याप्मि डोक् ए॥ पाक् हिट्नागा आब्राहाम उपुङ्लाङिगा इ? आङा आब्राहामङाना उपुङ्लाङिना डोक् ए॥ 23 पाक् हिट्नागा खिरिस्टङाना ओसेवाक्चि इ? आङा ङाङ्सुबा याप्मि गाड्डे डोक् चेक्ङा, आङा हिट्नागा नुङ्ना चा ओचेट्नुना सेवाक् ए॥ आङा हिट्नागा नुङ्ना याप्मा टुक्ना टोॽवा चोगेसुङे॥ याप्मा खेप् आङा खाम्बाङ्ङि याङ्ओठेन्डे, ओचाफेन्लोक् कोरराङा याङ्ओलेम्से, याप्मा खेप् सिमालोक् हिङ्मा लिसाङे॥ 24 फाराक् फाराक् बेला लेम्बोक् खेप् आङा याहुदिचिङा इप्पोक् कोरि ठिक् काम कोरराङा याङ्ओलेम्से॥ 25 हिट्नुङ् सुम्बोक् खेप् रोमि हाकिमचिङा लाहुरिक्ङा याङ्ओलेम्से॥ ठिक् खेप् सेप्मा लाउङ्सा लुङ्गेॽवाङा याङ्ओलेप्टे॥ आङा ठाङाङ्ना ठेना चुवाखोङ्डाङ् सुम्बोक् खेप् सामुन्दराङि जाखाम् लिसे॥ ठिक् लेम्बा लोक् ठिक् युसा सामुन्दराङि डोक् लिसाङे॥ 26 आङा याप्मा खेप् याट्रा चोगाङ्नाँ ठेगा होङ् खोक्मा कोन्ना याङ्छामाङि, याङ्काखुट्चिगा याङ्छामाङि ठायाङे, आङागा आप्पे याहुदि याप्मिचि लोक् पानिछोङ्बा याप्मिचिगा याङ्छामाङि ठायाङे॥ हिट्नुङ् खालाङ्गाङि चा, साक्चा उयुङ्निगा ठोङ्ङि, सामुन्दराङि हिट्नुङ् आन्याँ बिस्वासिचि नुङ् उपिग्गा माङ्जोगा याप्मिचिगा याङ्छामाङि ठायाङे॥ 27 आङा मिहिनेत चोगुङुङ् टोॽवा चोगुङे हिट्नुङ् याप्मा खेप् इम्नेट्निङ्॥ आसाॽवासे हिट्नुङ् आवेॽप्मा काडे, हिट्नुङ् आम्टेप्मा टेप्मा आङा चामा चाङा चा टोक्नेट्निङ्॥ औधि चुङ्गुवामाङा पोट्राकाक् लिसाङे, पोङ्भोने आङालोक् कोना लोट्निङ् वानेट्निना॥ 28 हिट्नुङ् हिट्नागा याङ्छामा एडोक् माखाक्, टरो सोब्बे माङ्पाङ्ङिगा लोङ्सा लेन्सेन् यान्दा चोक्माना रिङ् आनिङ्ग्वाङि दुखे आङ्डुङे॥ 29 कोइ बिस्वासि बिस्वासङि फेटुलो लियुक् भोने पाक् उन्ङाना निम्छारोङि आनिङ्ग्वा टुक्नि नै टे? कोइङा पाप चोक्मा मेट्टुचिचि भोने पाक् आङा याक्लेप्मा टोक्निङ्नै टे? 30 आङा आप्पेलाउङ्सा आनिङ् चोन्डुङ्टुङ् भोने, आङा दोरो वाइना नुङ् निमेट्माना रिङ्ङि डोक् आनिङ् चोन्डुङ्टुङ्॥ 31 टाङ्बा येसु खिरिस्टङाना पाबा माङ्हाङ्लाउङ्सा आङा छेम्बाना रिङ् माट्टुङ्टुङ्, माङ्जो चेक्निङ्ना नुङ् ठाहा युङ्ग्वा॥ हिट्नुङ् उन्ङाना सोरोक् पोए-पोए उलियाक्॥ 32 आङा दामास्कास खालाङ्गाङि लिसाङ्नाँ आरितास हाङ्बाङाना हाकिमङा आङा लाप्माउङ्सा खालाङ्गाङि काकोबाचि युङ्सुचे॥ 33 टरो आसाइबाचिङा याङ्ढोङ्ङि याङ्ओठेन्डाउङ् आङा पारखाल सोरिना ठिक् झ्यालालाम्मा भारा यो याङ्ओठेन्डे, हिट्नुङ् आङा हाकिमङाना उमुक्ङि ठानेट्निङ्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.