१ कोरिन्थि 2 - आठपहरियाठोना बारे पावालङाना रिङ् 1 आम्भु-आन्झाचि, आङा माङ्हाङ्ङाना खाबोर पारचार चोक्ङा खानि सोरि आबाङ्नाँ, ठेगा-ठेगा रिङ् माट्सा ठोना लिसाना याप्मि गाड्डे आङा खानिङि आप्नेयाट्निङ्॥ 2 पोङ्भोने खानिलोक् लिसाङ्नाँ येसु खिरिस्ट लोक् उन् खाप्चेङि उछुडुना रिङ् माले पाक्चा लोमाना निङ्ग्वा चोक्नेयाट्निङ्॥ 3 आङा खानि सोरि आबाङ्नाँ निम्छारो वासेट्टाङ्ना हिट्नुङ् किप्माङा पिलिम् पिलिम् योग्सा युङाङे॥ 4 आङा खानिलोक् चेक्टाङ्नाँ हिट्नुङ् माङ्हाङ्ङाना खाबोर पारचार चोगुङ्नाँ खानिङा आङा बिस्वास याङ्चोगानि पिक्सा ओचाप्पाङ् रिङ् चेक्नेयाट्निङ्, टरो आङा पारचार चोगुङ्ना खाबोर छेम्बाना ए नुङ् सेङ्सेङ्ना हाङ्साङाना ओसाक्तिङा खानि मानिमेट्टिटि॥ 5 हिट्नाड्डेउङ् खानिङाना बिस्वास याप्मिचिगा ठोनाङि उलिनि चा, टरो माङ्हाङ्ङाना ओसाक्तिङि उलियाक्॥ 6 टरो चा बिस्वासङि पासिङ् उलिसागालोक् ठोना लिसा गाड्डे आनि चेक्टिटि, टरो ना जुगङिना ठोना माखाक् आथाबा ना टालाङि सासान् काचोक्बाचिगा ठोना चा माखाक्, नागा सासान् काचोक्बाचिउम् एला डोक् ओमेग्युक्॥ 7 टरो आनिम्टे माङ्हाङ्ङाना ठोबाना ठोनाङाना रिङ् पारचार चोगुएट्टुम्, ना रिङ् माङ्हाङ्ङा पाइले साक्चा निमेट्टुव्टुन्चिन्, हिट्नुङ् ना योजाना आनिना ओचेट्नु लाउङ्सा माङ्हाङ्ङा नारा सिरिस्टि चोगुना बेलालाम्मा डोक् चोगुएसुना डाना॥ 8 ना नाराङि सासान् काचोक्बाचि खोनाँ चा ना ठोबाना योजाना बुजा ओचोग्वाट्टुन्॥ हिट्नागाँ ना रिङ् बुजा ओचोगुनाबे आनिना माङ्ठेना टाङ्बा खाप्चेङि उछुड्वाट्टुन् बे॥ 9 टरो धारमाछाप्लाङि नाड्डे छेप्टेसे, “याप्मिङा खोना बेला चा निसुन्गेट्टुन्ना, खेम्सुन्गेट्टुन्ना, हिट्नुङ् मिट्टुन्गेट्टुन्ना रिङ् डोक् माङ्हाङ्ङा माया चोगुचिगा लाउङ्सा टेयार चोगुएसुए॥” 10 माङ्हाङ्ङा आनि लोङ्सा सेङ्सेङ्ना हाङ्सालाम्मा ठोबाना रिङ् आनिमेट्टाइसे॥ सेङ्सेङ्ना हाङ्साङा सोब्बे रिङ् कोलुटु, हिट्नुङ् माङ्हाङ्ङाना आड्डिक् ठोबाना रिङ् चा कोलुटु॥ 11 याप्मिङाना उनिङ्ग्वाङिना रिङ् आप्पे उन्ङा माले आरु साङ् चा उनिङ्ग्वाङिना रिङ् बुजा चोक्मा उहिडुन्ना॥ हिट्नाडे डोक् माङ्हाङ्ङाना उनिङ्ग्वाङिना रिङ् माङ्हाङ्ङा आप्पे ओहाङ्साङा माले आरु साङा चा बुजा ओचोगुन्ना॥ 12 हाट्ले आनि नाराङि उलिसागा याप्मिचिगा हाङ्सा टोग्निम्गेट्निम्ना, टरो माङ्हाङ्ङा आपिडाना ख्वाप्पा थोक् बुजा चोक्मा उहिडुम् नुङ् उन्लाम्मा सेङ्सेङ्ना हाङ्सा टोगुएसुम्मे॥ 13 हिट्नाड्डेउङ् आन्याँ नागा रिङ् याप्मिचिङा उन्चि ठोनालाम्मा सिकाँ उलिसाउङ् उमाट्टु गाड्डे पारचार चोक्निम्मागा, टरो सेङ्सेङ्ना हाङ्साङा याप्मि हिसिक्टागा रिङ् खानि लोनाँनि, हिट्नुङ् आन्याँ आत्मिक् रिङ्चि आत्मिक् याप्मिचि लाउङ्सा पारचिन्दा लोडुम्चिम्चिम्मा॥ 14 जुन् याप्मिलोक् सेङ्सेङ्ना हाङ्सा लिनिना, हिट्नाङा माङ्हाङ्ङाना ओहाङ्साङा सिकाँ चोगुना रिङ् लाडुन्ना, पोङ्भोने ना रिङ् हिट्ना लाउङ्सा बिथाँना रिङ् लियुक्॥ हिट्नुङ् हिट्नाङा नागा रिङ् बुजा चोग्मा हिडुन्ना, पोङ्भोने ठिबाङ् याप्मिङा नागा रिङ् सेङ्सेङ्ना हाङ्साङा घुवार फाडुङ् एडोक् बुजा चोक्मा हिडुटु॥ 15 जुन् याप्मिलोक् सेङ्सेङ्ना हाङ्सा उन्ङि लियुक्, हिट्नाङा ख्वाप्पा रिङ् नुलोक् बुजा चोगुटु, टरो जुन् याप्मिलोक् सेङ्सेङ्ना हाङ्सा लिनिना हिट्नाँ उन् बुजा चोक्मा उहिडुन्ना॥ 16 धारमाछाप्लाङि नाड्डे छेप्टेसे, “साङा चा टाङ्बाङाना उनिङ्ग्वाङिना रिङ् ठाहा टोग्मा उहिडुन्ना, हिट्नुङ् उन् साङा चा हिसिक्मा उहिडुन्ना॥” टरो आनिम्बाक् बुजा चोक्मा हिडुम्टुम्, पोङ्भोने आनिलोक् खिरिस्टङाना निङ्ग्वा युङ्ग्वा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.