Luuga 7 - Kitaab al Vahd aj Jadid 1978

IIMAAN RA’IIS AJ JEESH

¹ Wa lamma kammal kullu kalaamu le_n naas al gaavidiin yasmavuuhu, daxal Kafranaaḥuum.

² Wa ra’iis aj jeesh kaan vindu xaddaam maḥbuub leehu. Wa kaan vaiyaan gariib le_l moot.

³ Wa lamma simiv van Yasuuv, rassal shuyuux al Yahuud, wa ṭalabu minnu yaji yashfi xaddaamu.

⁴ Wa lamma jo le Yasuuv, sa’aloohu katiir wa gaalu, “Huwa bistaḥigg tavmil leehu da.

⁵ Vashaan biḥibb ash shavb bitaavna, wa huwa zaatu bana leena beet ar Rabb.”

⁶ Wa Yasuuv masha mavaahum. Wa lamma maa kaan baviid min al beet, ra’iis aj jeesh rassal leehu aṣ‐ḥaabu yaguul leehu, “Yaa Rabb, maa tatavvib nafsak, vashaan ana maa bastaḥigg inta tadxul beeti.

⁷ Wa vashaan kida, maa ḥasabta nafsi mustaḥigg aji leek. Wa laakin guul kilma wa xaddaami yakuun ṭaiyib.

⁸ Vashaan ana kamaan raajil tiḥit as sulṭa, wa vindi vasaakir tiḥit iidi. Aguul le da, Amshi, wa yamshi. Wa le taani, Tavaal, wa yaji. Wa le xaddaami, Avmil da, wa yavmilu.”

⁹ Wa lamma Yasuuv simiv al kilmaat di, itvajjab minnu wa itlafat le_n naas at tibivoohu wa gaal, “Aguul leekum, ana maa ligiit wa laa fi Israa’iil iimaan gadur da.”

¹⁰ Wa wakit maa rajavu_l murassaliin le_l beet, ligu_l xaddaam biga ṭaiyib.

YASUUV YAGAWWIM WALAD AL ARMALA

¹¹ Wa ḥaṣal bavd al yoom da ’innu masha le madiina isima Naayiin. Wa talaamiizu wa naas kutaar mashu mavaahu.

¹² Wa lamma garrab le baab al balad, shuuf, kaan fih naas shaayiliin zool meyyit, wa huwa walad waḥiid vind ummu. Wa hiya armala. Wa mavaaha naas kutaar min al balad.

¹³ Wa lamma shaafa, ar Rabb kaan vindu raḥma leeha wa gaal leeha, “Maa tabki.”

¹⁴ Wa garrab wa lamas al vangareeb, wa_sh shaayiliinu wagafu. Wa Yasuuv gaal, “Yaa shaabb, aguul leek, guum!”

¹⁵ Wa_l kaan meyyit gannab wa ibtada yitkallam, wa Yasuuv sallamu le ummu.

¹⁶ Wa_l xoof masak kullahum, wa hum majjadu Allaah wa gaalu, “Nabi vaẓiim gaam fi wasiṭna!” wa “Allaah ja vashaan yasaavid shavbu.”

¹⁷ Wa_l xabar da masha fi kull al Yahuudiyya wa fi kull al bilaad al gariiba minnu.

YASUUV WA YUUḤANNA AL MAVMADAAN

¹⁸ Wa talaamiiz Yuuḥanna kallamoohu van al ḥaajaat di kullaha.

¹⁹ Wa Yuuḥanna naada itneen min talaamiizu, wa rassalum le Yasuuv wa gaal, “Inta huwa aj jaai? walla nantaẓir waaḥid gheerak?”

²⁰ Wa lamma jo leehu_r raajleen, gaalu, “Yuuḥanna al Mavmadaan rassalna leek vashaan yas’al, ‘Inta huwa aj jaai walla nantaẓir waaḥid gheerak?’”

²¹ Wa fi_s saava diik shafa naas kutaar min amraaḍum, wa vayaatum, wa min arwaaḥ sharriira. Wa fataḥ vuyuun vamyaaniin kutaar.

²² Wa radda wa gaal leehum, “Amshu wa xabbiru Yuuḥanna be_l ḥaajaat ash shuftuuha wa simivtuuha. Al vamyaaniin bishuufu, wa_l vuruj bimshu, wa_l mujazzamiin bitnaḍḍafu, wa_ṭ ṭurush bismavu, wa_l meyyitiin biguumu, wa_l masaakiin bibashshiru leehum.

²³ Wa mubaarak al maa yagav valashaanni.”

²⁴ Wa bavd maa maraasiil Yuuḥanna mashu, hu biga yaguul le_n naas van Yuuḥanna, “Ṭalavtu fi_l xala tavaayinu fi shinu? Geshsh bithizzu_l habuub?

²⁵ Walla ṭalavtu tashuufu shinu? Zool laabis hiduum samiḥ? Shuuf! al laabsiin al hiduum aj jamiil wa_l biviishu zei al ghaniyyiin, hum fi saraayaat al muluuk.

²⁶ Wa laakin ṭalavtu tashuufu shinu? Nabi? Aiwa, aguul leekum, wa aḥsan min nabi.

²⁷ Da huwa al maktuub vannu, Shuuf! Arassil maraasili giddaamak, Al yaḥaḍḍir leek ṭariigak giddaamak.

²⁸ Wa aguul leekum ’innu maa fih zool min al mawluudiin min an niswaan akbar min Yuuḥanna. Wa laakin al aṣghar fi malakuut Allaah akbar minnu.”

²⁹ Wa_n naas kulluhum wa_l bilimmu_ḍ ḍariiba, lamma simivu, shihidu le vadl Allaah. Wa hum kaanu mitvammidiin be mavmuudiyyat Yuuḥanna.

³⁰ Wa laakin al Farriisiyyiin wa muvallimiin al gaanuun rafaḍu iraadat Allaah fishaanum, wa Yuuḥanna maa vammadoohum.

³¹ “Naas az zaman hum zei shinu? Wa yashbahu minu?

³² Hum zei awlaad gaavidiin fi_s suug wa binaadu bavḍahum le bavḍ wa yaguulu, Ghanneena leekum wa maa ragaṣtu, wa bakeena leekum wa maa bakeetu.

³³ Vashaan Yuuḥanna al Mavmadaan ja maa yaakul veesh wa laa yashrab xamr. Wa intu bitguulu, Vindu sheeṭaan.

³⁴ Ibn al insaan ja yaakul wa yashrab, wa intu bitguulu, Shuuf! Da raajil biyaakul katiir wa sharraab xamr, wa biḥibb al bilimmu_ḍ ḍariiba wa_l xaaṭyiin.

³⁵ Wa_l ḥikma tawarri vadila be kullu awlaada.”

MAS‐ḤAT YASUUV

³⁶ Wa ṭalab minnu waaḥid min al Farriisiyyiin vashaan yaakul mavaahu. Wa daxal beet al Farriisi, wa gavad yaakul.

³⁷ Wa shuuf, mara kaanat fi_l balad, wa hiya xaaṭya. Wa lamma virfat ’innu gaavid fi beet al Farriisi, jaabat gizaaza fiiha riiḥa.

³⁸ Wa wagafat waraahu vind kirveenu tabki. Wa bigat taghassil kirveenu be_d dimuuv. Wa kaanat tamsaḥum be shavar raasa, wa tagabbil kirveenu wa tadhinum be_r riiḥa.

³⁹ Wa lamma shaaf kida, al Farriisi an naadaahu gaal fi nafsu, “Ar raajil da iza nabi kaan virif minu al mara di, wa minu hiya al bitalmasu ’innaha xaaṭya.”

⁴⁰ Wa radda Yasuuv wa gaal leehu, “Yaa Simvaan, Vindi ḥaaja aguula leek.” Wa gaal, “Guul, yaa Muvallim.”

⁴¹ “Kaan fih zool, madyuuniin leehu raajleen, waaḥid valeehu xumsumiyya jineeh, wa_t taani xamsiin.

⁴² Wa lamma maa kaan yagdaru yadfavuuha, ghafar leehum al itneen. Wa vala kida, minu fiihum biḥibbu aktar?”

⁴³ Wa radda Simvaan wa gaal, “Aẓunn al ghafar leehu aktar.” Wa gaal leehu, “Ḥakamta be_l ḥagg.”

⁴⁴ Wa itlafat le_l mara wa gaal le Simvaan, “Shaayif al mara di? Ana daxalta beetak, wa inta maa addeetni mooya le kirveeni, laakin hiya be dimuuva, ghassalat kirveeni, wa masaḥatum be shavar raasa.

⁴⁵ Wa inta maa sallamta valeiya, laakin hiya min wakit maa daxalat, maa baṭṭalat tagabbil kirveeni.

⁴⁶ Wa inta maa masaḥta raasi be_z zeet, laakin hiya masaḥat kirveeni be_r riiḥa.

⁴⁷ Wa vala kida, aguul leek, itghafarat leeha xaṭaayaaha_l katiira, vashaan ḥabbat katiir. Wa_l yitghafar leehu galiil, yaḥibb galiil.”

⁴⁸ Wa gaal leeha, “Itghafarat leeki xaṭaayaaki.”

⁴⁹ Wa_l mavzuumiin mavaahu ibtadu yaguulu fi nufuusum, “Minu da al bighfir al xaṭaaya kamaan?”

⁵⁰ Wa Yasuuv gaal le_l mara, “Iimaanik xallaṣik. Amshi be_s salaam.”