Luuga 6 - Kitaab al Vahd aj Jadid 1978

RABB AS SABIT

¹ Wa ḥaṣal fi sabit taani ’innu faat fi wasṭ az ziraava. Wa kaanu talaamiizu yagṭavu raas ad dura wa yafrukuuha be iideehum, wa yaakluuha.

² Wa bavḍ al Farriisiyyiin gaalu leehum, “Le shinu bitavmilu_sh shi al maa be_l gaanuun fi yoom as sabit?”

³ Wa radda Yasuuv wa gaal leehum, “Maa gareetu_l vamalu Daawuud lamma kaan javaan, huwa wa_l kaanu mavaahu?

⁴ Hu daxal beet Allaah wa axad wa akal ar rughfaan al magaddasa, wa adda le_l mavaahu kamaan. Huwa akal al maa be_l gaanuun ’an yaaklu illa le_l gusus bass.”

⁵ Wa gaal leehum, “Ibn al insaan huwa Rabb as sabit.”

⁶ Wa ḥaṣal fi sabit taani, daxal beet ar Rabb wa kaan yavallim. Wa kaan fih zool hinaak iidu_l yamiin yaabsa.

⁷ Wa kaanu muvallimiin al gaanuun wa_l Farriisiyyiin yavaayinu leehu vashaan yashuufu iza huwa yashfi fi_s sabit, vashaan yalgu keef yashtakuuhu.

⁸ Laakin huwa virif afkaarum, wa gaal le_r raajil al iidu yaabsa, “Guum wa giif fi_l wasiṭ.” Wa huwa gaam wa wagaf.

⁹ Wa Yasuuv gaal leehum, “As’alkum shi. Be_l gaanuun yavmil vamal kwaiyis fi yoom as sabit walla vamal baṭṭaal? Yaxalliṣ an nafs walla yaktula?”

¹⁰ Wa vaayan leehum kullahum, wa gaal le_r raajil, “Midd iidak!” Wa vamal kida. Wa iidu bigat ṭaiba zei at taanya.

¹¹ Laakin hum kaanu zavlaaniin jiddan, wa itkallamu bavḍahum le bavḍ biyavmilu shinu be Yasuuv.

AL IṬNAASHAR RASUUL

¹² Wa ḥaṣal fi_l aiyaam deel ’innu marag fi_j jabal vashaan yaṣalli. Wa ṣalla ṭuul al leel le Allaah.

¹³ Wa lamma kaan an nahaar, naada talaamiizu wa ixtaar minnahum iṭnaashar as sammaahum kamaan rusul.

¹⁴ Simvaan as sammaahu kamaan Buṭrus, wa Andaraawus axuuhu, wa Yavkuub wa Yuuḥanna, wa Fiilubbus, wa Bartulamaawus,

¹⁵ wa Matta, wa Tumma, wa Yavkuub ibn Ḥalfa, wa Simvaan al bisammuuhu_l Ghayuur,

¹⁶ wa Yahuuza ibn Yavkuub, wa Yahuuza al Isxaryuuṭi al biga xaayin.

BARAKAAT WA MAṢAAYIB

¹⁷ Wa nazal mavaahum wa wagaf fi makaan waasiv. Wa kaanu mavaahu jamav katiir min talaamiizu wa naas kutaar min kull al Yahuudiyya wa Uurushaliim wa jamb Ṣuur wa Ṣeedaa. Wa hum jo vashaan yasmavuuhu wa vashaanu yashfiihum min amraaḍum.

¹⁸ Wa_t tavbaaniin min ash sheeyaaṭiin, hu shafaahum.

¹⁹ Wa kull an naas jarrabu yalmasuuhu, vashaan gudra kaanat bitamrug minnu wa kaan yashfiihum kullahum.

²⁰ Wa rafav veeneehu le talaamiizu wa gaal, “Mubaarakiin, yaa masaakiin, vashaan leekum malakuut Allaah.

²¹ Mubaarakiin, yaa javaaniin hassav, vashaan bitashbavu. Mubaarakiin, yaa al bitabku hassav, vashaan bitaḍḥaku.

²² Mubaarakiin lamma_n naas bikrahuukum, wa maa bigvudu mavaakum wa bishtimuukum, wa biṭallivu valeekum ism baṭṭaal vashaan Ibn al insaan.

²³ Kuunu farḥaaniin fi_l yoom daak, wa nuṭṭu min as suruur. Shuuf! ujratkum kabiir fi_s sama. Vashaan abahaatum vamalu kida be_l anbiya.

²⁴ Wa laakin, muṣiiba leekum, yaa ghaniyiin, vashaan axadtu raaḥatkum.

²⁵ Muṣiiba leekum, yaa_sh shabvaaniin hassav, vashaan tabgu javaaniin. Muṣiiba leekum, intu_l bitaḍḥaku hassav, vashaan bitaḥzanu wa tabku.

²⁶ Muṣiiba leekum, iza kull an naas yaguulu fiikum kalaam kwaiyis, vashaan abahaatum vamalu kida be_l anbiya al kaḍḍaabiin.

MAḤABBA LE_L VUDWAAN

²⁷ Laakin aguul leekum, yaa naas as saamiviin. Ḥibbu vudwaankum. Wa avmilu kwaiyis le_n naas al bikrahuukum.

²⁸ Wa baariku_l biguulu valeekum lavna. Wa ṣallu vashaan al yavmilu ḥaaja baṭṭaala leekum.

²⁹ Al yaḍrubak vala jamb waaḥid min washshak, aglib leehu_t taani kamaan. Wa_l yaaxud badalak, maa taaba taddiihu gamiiṣak kamaan.

³⁰ Wa kullu waaḥid al yaṭlub minnak, addiihu. Wa_l yaaxud maalak, maa taṭlubu minnu taani.

³¹ Wa zei maa intu vaawiziin an naas yavmilu beekum, avmilu intu beehum kida.

³² Wa iza bitḥibbu_n naas al biḥibbuukum, al faaida leekum shinu? vashaan al xaaṭyiin kamaan biḥibbu_n naas al biḥibbuuhum.

³³ Wa iza tavmilu_l xeer le_l biyavmilu leekum al xeer, al faaida leekum shinu? vashaan al xaaṭyiin kamaan biyavmilu zei da.

³⁴ Wa iza taddu sulfa valashaan taaxdu minnahum marra taanya, al faaida leekum shinu? Vashaan al xaaṭyiin biddu sulfa le_l xaaṭyiin, vashaan yaaxdu minnahum zeiyu.

³⁵ Laakin ḥibbu vudwaankum, wa avmilu_l xeer leehum wa addu sulfa, wa maa tantaẓiru ḥaaja. W_ujratkum takuun kabiira, wa intu takuunu awlaad Allaah al Vaali. Vashaan huwa vindu nivma le_l maa yashkuruuhu wa_sh sharriiriin.

³⁶ Kuunu malyaaniin raḥma zei maa Abuukum kamaan raḥiim.

ḤUKM VALA_T TAANYIIN

³⁷ Wa maa taḥkumu vala zool, vashaan intu maa bitkuunu maḥkuumiin. Maa talawwimu, vashaan maa bitkuunu malawwimiin. Aghfiru, wa yitghafar leekum.

³⁸ Addu, wa bidduukum. Keela kwaisa, mawazzana tamaam, mahzuuza, malyaana, yadduukum fi iideekum. Vashaan al keela_l intu tadduuha, bitkuun al keela al hum bidduukum.”

³⁹ Wa vallamum be masal. “Al vamyaan yagdar yaguud vamyaan zeiyu? Hum al itneen maa biyagavu fi ḥufra?

⁴⁰ At tilmiiz maa aḥsan min muvallimu. Wa laakin kull al yabga kaamil yakuun zei muvallimu.

⁴¹ Le shinu bitvaayin le_l ḥaaja_ṣ ṣaghaira al fi veen axuuk, wa maa bitshuuf al ḥaaja al kabiira al fi veenak?

⁴² Wa keef tagdar taguul le axuuk, Yaa axi, xalliini aṭalliv ash shi aṣ ṣaghaiyir al fi veenak, wa inta maa bitshuuf ash shi al kabiir al fi veenak? Yaa manaafig! Fi_l awwal ṭalliv ash shi al kabiir min veenak, wa bavdeen tagdar tashuuf kwaiyis vashaan taṭalliv ash shi aṣ ṣaghaiyir min veen axuuk.

⁴³ Vashaan maa fih shajara samḥa bitalid tamar baṭṭaal, wa laa fih shajara baṭṭaala bitalid tamar samiḥ.

⁴⁴ Vashaan kullu shajara mavruufa be_t tamar bitaava. Wa_n naas maa yalimmu tiin min shajar ash shook, walla yalimmu vinab min shajar al ghaaba.

⁴⁵ Az zool aṣ ṣaaliḥ min kanz galbu_ṣ ṣaaliḥ yaṭalliv ḥaajaat ṣaaliḥa. Wa_z zool ash sharriir min kanz galbu_sh sharriir yaṭalliv ḥaajaat sharriira. Vashaan min al katrat al fi galbu, xashmu bitkallam.

AL BANNAAYIIN ASH SHAAṬRIIN WA_L BALIIDIIN

⁴⁶ Wa le shinu bitsammuuni ‘Yaa Rabb, yaa Rabb’ wa maa bitavmilu_l baguulu.

⁴⁷ Kull al bijiini wa bismav kalaami wa biyavmil beehu, awarriikum huwa zei minu.

⁴⁸ Huwa mitil zool bibni beet, wa biḥfar tiḥit wa bixuṭṭ al asaas vala_l ḥajar. Wa lamma_l mooya malat al arḍ, wa_l mooya ḍarabat vala_l beet daak, maa gidir tahizzu, vashaan kaan asaasu vala_l ḥajar.

⁴⁹ Wa laakin al bismav wa maa biyavmil, hu zei zool bana beetu vala_l arḍ biduun asaas. Wa_l mooya ḍarabat vala_l beet, wa ṭawwaali al beet wagav. Wa kaan xaraab al beet daak kabiir.”