Luuga 22 - Kitaab al Vahd aj Jadid 1978

YAHUUZA AL XAAYIN

¹ Wa lamma garrab Viid al Faṭiir, yavni Viid al Fiṣaḥ,

² al gusus al kubaar wa muvallimiin al gaanuun kaanu bifattishu keef yaktuluuhu. Vashaan hum kaanu xaayifiin min an naas.

³ Wa_sh Sheeṭaan daxal fi Yahuuza al ismu_l Isxaryuuṭi, waahid min al iṭnaashar.

⁴ Wa Yahuuza masha wa itkallam mava al gusus al kubaar wa_ḍ ḍubbaaṭ keef yasallimu leehum.

⁵ Wa kaanu mabsuuṭiin, wa ittafagu yadduuhu guruush.

⁶ Wa hu kaan raḍyaan, wa fattash vala furṣa yasallimu leehum lamma_j jamav maa kaan fih.

AL VASHA AL AAXIR

⁷ Wa ja yoom Viid al Faṭiir, al yoom al kaan laazim yaḍbaḥu fiihu xaruuf aḍ ḍabiiḥa di.

⁸ Wa Yasuuv rassal Buṭrus wa Yuuḥanna wa gaal leehum, “Amshu wa ḥaḍḍiru leena Viid al Faṭiir vashaan naakul.”

⁹ Wa hum gaalu leehu, “Inta vaawizna naḥaḍḍir ween?”

¹⁰ Wa gaal leehum, “Shuufu, awwal maa intu tadxulu fi_l madiina, raajil bishiil burmat mooya yagaabilkum. Amshu waraahu le_l beet al huwa bidxulu.

¹¹ Wa guulu le siid al beet, ‘Al Muvallim yaguul leek, Ween ooḍat aḍ ḍeefaan al ana baakul fiiha Viid al Fiṣaḥ mava talaamiizi?’

¹² Wa huwa biwarriikum ooḍa kabiira fi saraaya foog, majaahza. Ḥaḍḍiru leena hinaak.”

¹³ Wa mashu wa ligu zei maa hu gaal leehum. Wa ḥaḍḍaru_l Fiṣaḥ.

¹⁴ Wa lamma_s saava jaat, hu gavad fi_ṭ ṭarabeeza, wa_l iṭnaashar rasuul mavaahu.

¹⁵ Wa hu gaal leehum, “Ana be kullu gudrati kunta baduur aakul Viid al Fiṣaḥ da mavaakum gubbaal maa atvab.

¹⁶ Vashaan aguul leekum, ana maa baakul minnu taani marra, lighaayat maa bitimm fi malakuut Allaah.”

¹⁷ Wa axad kubbaaya, wa lamma shakar, hu gaal, “Uxdu_l kubbaaya di, wa gassimuuha beenkum.

¹⁸ Vashaan ana baguul leekum, min hassav lighaayat maa malakuut Allaah biji, ana maa bashrab min mooyat al vinab.”

¹⁹ Wa axad veesh, wa shakar wa kassar wa adda leehum, wa gaal, “Da jismi al ana addeetu fishaankum. Avmilu da vashaan titzakkaruuni.”

²⁰ Wa kida kamaan axad al kubbaaya bavd al vasha wa gaal, “Al kubbaaya di, hiya al ittifaag aj jadiid be dammi al iddaffag fishaankum.

²¹ Laakin shuufu, al bisallimni, iidu mavaai fi_ṭ ṭarabeeza.

²² Wa Ibn al insaan maashi zei maa maktuub vannu. Wa laakin muṣiiba le_z zool al bisallimu.”

²³ Wa hum ibtadu yas’alu bavḍahum le bavḍ, yaatu minnahum biyavmil al vamal da.

²⁴ Wa kamaan shakal gaam beenum yaatu minnahum yakuun akbar.

²⁵ Wa hu gaal leehum, “Muluuk al umam yavmilu zei as saiyid foogum. Wa deel al biḥkumu valeehum, bisammuuhum naas yavmilu_l xeer.

²⁶ Laakin intu maa takuunu kida. Laakin al akbar fiikum, xalliihu yabga zei al aṣghar, wa_r ra’iis zei al xaddaam.

²⁷ Minu huwa akbar, al gaavid fi_ṭ ṭarabeeza walla al bixdim? Maa huwa al gaavid fi_ṭ ṭarabeeza? Laakin ana fi wasiṭkum zei al bixdim.

²⁸ Laakin intu istanneetu mavaai fi tajaaribi.

²⁹ Wa laakin ana kamaan jahhazta leekum malakuut, zei maa Abuui jahhaz leiya malakuut.

³⁰ Vashaan taakulu wa tashrabu fi ṭarabeezati fi malakuuti, wa tagvudu vala karaasi wa taḥkumu vala gabaayil Israa’iil al iṭnaashar.

³¹ Yaa Simvaan, yaa Simvaan! shuuf, ash Sheeṭaan kaan vaawiz kullakum vashaan yagharbilkum zei ad dura.

³² Laakin ana ṣalleet fishaanak vashaan maa tawaddir iimaanak. Wa inta, lamma tarjav taani, sabbit axwaanak.”

³³ Wa hu gaal leehu, “Yaa Rabb, ana mustavidd amshi mavaak ḥatta le_s sijin wa le_l moot.”

³⁴ Wa Yasuuv gaal, “Yaa Buṭrus, aguul leek, gabl maa ad diik yakoorik al leela, inta bitankirni talaata marraat, wa taguul inta maa tavrifni.”

³⁵ Wa hu gaal leehum, “Lamma rassaltakum biduun juzlaan wa laa kiis wa laa jizam, kuntu taḥtaaju le ḥaaja?” Wa gaalu, “Wa laa ḥaaja.”

³⁶ Wa hu gaal leehum, “Laakin hassav, al vindu juzlaan xalliihu yashiilu, wa kiis kamaan. Wa_l maa vindu seef, xalliihu yabiiv gamiiṣu wa yashtari waaḥid.

³⁷ Vashaan ana baguul leekum, Al maktuub da laazim yatimm fiyya al yaguul, Ḥasaboohu mava_l maa yaḥfaẓu_l gaanuun. Aiwa, al maktuub vanni bitimm.”

³⁸ Wa hum gaalu, “Yaa Rabb, shuuf, fih hina seefeen.” Wa hu gaal leehum, “Kifaaya.”

JETSEEMAANI

³⁹ Wa hu masha zei vaadatu le Jabal az Zeetuun, wa talaamiizu kamaan tibivoohu.

⁴⁰ Wa lamma wiṣlu fi_l maḥall, gaal leehum, “Ṣallu, vashaan maa tadxulu fi tajriba.”

⁴¹ Wa hu marag minnahum masaafa tagriiban zei maa tarmi ḥajar. Wa rakav vala rukabu wa ṣalla.

⁴² Wa gaal, “Yaa Abuui, iza inta raḍyaan, shiil kubbaayat aḍ ḍiig di minni. Laakin maa iraadati, laakin iraadatak tatimm.”

⁴³ Wa malaak min as sama ẓahar leehu yagawwiihu.

⁴⁴ Wa huwa kaan fi ḍiig, wa kaan biṣalli shadiid. Wa_l mooya min jismu naggaṭ zei ad damm vala_l arḍ.

⁴⁵ Wa lamma gaam min aṣ ṣala, ja le talaamiizu wa ligaahum naayimiin min al ḥuzn.

⁴⁶ Wa hu gaal leehum, “Intu naayimiin le shinu? Guumu wa ṣallu, vashaan maa tadxulu fi tajriba.”

GABḌ YASUUV

⁴⁷ Wa wakit maa kaan yitkallam, jo naas kutaar. Wa mavaahum raajil ismu Yahuuza, waaḥid min al iṭnaashar, maashi giddaamum. Hu garrab le Yasuuv vashaan yasallim valeehu be boosa.

⁴⁸ Wa Yasuuv gaal leehu, “Yaa Yahuuza, inta bitsallim Ibn al insaan be boosa?”

⁴⁹ Wa lamma_l kaanu ḥawaleehu shaaf_l maashi yaḥṣul, hum gaalu, “Yaa Rabb, naḍrub be_s seef?”

⁵⁰ Wa waaḥid minnahum ḍarab vabd ra’iis al gusus, wa gaṭav aḍaanu_l yamiin.

⁵¹ Laakin Yasuuv radda wa gaal, “Xalluuhum lighaayat da.” Wa lamas aḍaanu wa shafaaha.

⁵² Wa Yasuuv gaal le_l gusus al kubaar wa ḍubbaaṭ vasaakir al heekal wa_sh shuyuux aj jo valeehu, “Ṭalavtu be suyuuf wa vaṣaayaat zei vala ḥaraami?

⁵³ Wakit maa ana kunta mavaakum kullu yoom fi_l heekal, maa gabaḍtu valeiya. Laakin di saavatkum wa guwwat aḍ ḍulumma.”

BUṬRUS YANKUR YASUUV

⁵⁴ Wa axadoohu wa saagoohu wa daxxaloohu fi beet ra’iis al gusus. Wa laakin Buṭrus tibivu min baviid.

⁵⁵ Wa lamma wallavu_n naar fi wasṭ al ḥoosh wa gavadu sawa, Buṭrus gavad beenum.

⁵⁶ Wa xaddaama shaafatu gaavid jamb an naar. Wa vaayanat leehu shadiid wa gaalat, “Ar raajil da kaan mavaahu kamaan.”

⁵⁷ Laakin huwa nakar wa gaal, “Yaa mara, ana maa bavrifu.”

⁵⁸ Wa bavd shwaiya, zool taani shaafu wa gaal, “Inta kamaan waaḥid minnahum.” Wa Buṭrus gaal, “Yaa zool, mush ana!”

⁵⁹ Wa bavd maa faatat saava waaḥda tagriiban, waaḥid taani it’akkad wa gaal, “Be_l ḥagg, da kaan mavaahu kamaan, vashaan huwa kamaan min aj Jaliil.”

⁶⁰ Wa Buṭrus gaal, “Yaa zool, ana maa bavrif bitguul shinu.” Wa ṭawwaali lamma huwa lissav yitkallam, ad diik koorak.

⁶¹ Wa_r Rabb itlafat wa vaayan le Buṭrus. Wa Buṭrus itzakkar kalaam ar Rabb al kaan gaal leehu, “Gubbaal maa ad diik yakoorik al leela, bitankirni talaata marraat.”

⁶² Wa Buṭrus marag barra wa baka bika murr.

⁶³ Wa_r rujaal al kaanu yaḥrasu Yasuuv, kaanu yashtimuuhu wa yajliduuhu.

⁶⁴ Wa hum ghaṭṭu washshu wa sa’aloohu wa gaalu leehu, “Itnabba! minu ḍarabak?”

⁶⁵ Wa hum kaanu yaguulu ḥaajaat taanya katiira valeehu wa yajaddifu.

⁶⁶ Wa fi_ṣ ṣabaaḥ badri, majlis ash shuyuux min al gusus al kubaar wa muvallimiin al gaanuun itlammu, wa jaaboohu giddaamum.

⁶⁷ Wa hum gaalu, “Iza inta_l Masiiḥ, guul leena.” Wa gaal leehum, “Iza gulta leekum, maa bitṣaddigu.

⁶⁸ Wa iza sa’altakum, maa bitruddu valeiya.

⁶⁹ Laakin min hassav Ibn al insaan bigvud vala yamiin gudrat Allaah.”

⁷⁰ Wa kulluhum gaalu, “Inta Ibn Allaah?” Wa gaal leehum, “Intu bitguulu ana huwa.”

⁷¹ Wa hum gaalu, “Naḥtaaj le shahaada taanya le shinu? Vashaan simivna min xashmu.”