Avmaal 2 - Kitaab al Vahd aj Jadid 1978

YOOM AL XAMSIIN

¹ Wa lamma ja Yoom al Xamsiin, kulluhum kaanu sawa fi makaan waaḥid.

² Wa ṭawwaali, ja ṣoot min as sama zei habuub shadiida, wa mala kullu_l beet al hum kaanu gaavidiin fiihu.

³ Wa ẓaharat leehum lisaanaat mungasima, zei min naar, wa gavadat vala kullu waaḥid minnahum.

⁴ Wa kulluhum kaanu malyaaniin min ar Ruuḥ al Gudus, wa badu yitkallamu be lughaat muxtalifa zei maa addaahum ar Ruuḥ al guwwa vashaan yitkallamu.

⁵ Wa kaanu gaavidiin fi Uurushaliim rujaal bixaafu Allaah min al Yahuud min kullu balad ad dunya.

⁶ Wa lamma simivu _ṣ ṣoot da, naas kutaar itlammu wa itḥayyaru, vashaan kullu waaḥid minnahum kaan bismavum yitkallamu be lughatu.

⁷ W_sstaghrabu wa itvajjabu wa gaalu, “Ar rujaal deel al bitkallamu, maa kulluhum naas aj Jaliil?

⁸ Wa keef kullu waaḥid minnana bismavum yitkallamu be_l lugha bitaavtu nafsu.

⁹ Niḥna naas Fartiyya wa naas Maadiyya wa naas Vilamiyya wa naas as saakniin fi_l Viraak wa fi_l Yahuudiyya wa fi Kabbaduukiyya wa fi Buntus wa fi Aasiya.

¹⁰ Wa fi Firijiyya wa fi Banfiliyya wa fi Maṣir wa agsaam Liibiyya al gariiba le Geerawaan wa ḍuyuuf min Ruumiya, Yahuud wa miṣaddigiin diin al Yahuud.

¹¹ Naas Kariit wa naas al Varab, binasmavum yitkallamu be lughaatna van al avmaal al kabiira bitaavat Allaah.”

¹² Wa kulluhum kaanu bistaghrabu wa bitḥayyaru wa yaguulu bavḍahum mava bavḍ, “Mavnal kalaam da shinu?”

¹³ Wa taanyiin kaanu biḍḥaku valeehum wa biguulu, “Ar rujaal deel sakraaniin.”

BUṬRUS YABASHSHIR AN NAAS

¹⁴ Fi_l wakit da, Buṭrus wagaf mava_l ḥidaashar, wa rafav ṣootu wa gaal leehum, “Yaa rujaal al Yahuud, wa_l gaavidiin fi Uurushaliim kullukum, asmavu kalaami, wa xalliini awarri leekum mavna_l kalaam da.

¹⁵ Vashaan an naas deel maa sakraaniin zei maa intu taftakiru. Hassav as saava tisva fi _ṣ ṣabaaḥ bass!

¹⁶ Laakin da huwa_l gaal an nabi Yuu’iil,

¹⁷ Allaah biguul, fi_l aiyaam al axiira, ana bakubb Ruuḥi vala kullu_n naas. Wa awlaadkum wa banaatkum bitnabbu, wa shabaabkum bishuufu ru’ya, wa shuyuuxkum biyaḥlamu.

¹⁸ Wa fi_l aiyaam deelaak ana bakubb Ruuḥi vala xaddaamiini, rujaal wa niswaan, wa hum bitnabbu.

¹⁹ Wa ana bawarri vajaayib fi_s sama foog wa valaamaat vala_l arḍ tiḥit, damm wa naar wa duxaan.

²⁰ Ash shamish bititghayyar le _ḍ ḍulumma, wa_l gamar bibga zei damm gubbaal maa biji yoom ar Rabb, al yoom al kabiir wa_l mavruuf.

²¹ Wa kullu waaḥid al binaadi b_ism ar Rabb bikuun muxallaṣ.

²² Yaa rujaal Israa’iil, asmavu_l kilmaat di: Yasuuv an Naaṣiri, huwa raajil, magbuul vind Allaah. Wa beehu Allaah vamal guwwaat wa vajaayib wa valaamaat beenkum zei maa intu bitavrifu.

²³ Yasuuv da kaan musallam leekum be tartiib Allaah as saabit wa mavriftu min gubbaal. Wa intu ṣalabtuuhu wa kataltuuhu be iideen an naas al baṭṭaaliin.

²⁴ Laakin Allaah gawwamu min been al meyyitiin wa fakka leehu awjaav al moot, valashaan maa kaan mumkin le_l moot ’an yamsiku.

²⁵ Vashaan Daawuud gaal be xuṣuuṣu, Kunta bashuuf ar Rabb giddaami daaiman, wa valashaan huwa vala yamiini, ana maa batḥarrak.

²⁶ Valashaan kida, galbi farḥaan wa lisaani mabsuuṭ. Wa jismi kamaan biviish vala_r rajaa.

²⁷ Valashaan inta maa bitxalli nafsi fi_l Haawiya, walla taxalli Gudduusak yarjav le_t turaab.

²⁸ Inta warreetni sikak al ḥayaat, wa bitamlaani faraḥ mavaak.

²⁹ Yaa axwaan, xalliini aguul leekum be sulṭa van abuuna_l kabiir Daawuud. Hu maat, wa dafanoohu. Wa gabru fih hina lighaayat al yoom da.

³⁰ Laakin hu kaan nabi, wa virif Allaah gaal leehu be ḥalaf ’innu bixuṭṭ vala kursiihu waaḥid min awlaadu.

³¹ Daawuud shaaf al maashi yasawwiihu Allaah, wa valashaan kida, hu itkallam van giyaamat al Masiiḥ ’innu maa xallaahu fi_l Haawiya, wa jismu maa rajav le_t turaab.

³² Wa Allaah gawwam Yasuuv da, wa niḥna kulluna shaahidiin be_l ḥagiiga di.

³³ Valashaan kida, hu kaan marfuuv be yamiin Allaah, wa axad min al Abu ar Ruuḥ al Gudus al wavad beehu, wa kabba da, al hassav bitshuufuuhu wa bitasmavuuhu.

³⁴ Vashaan Daawuud maa ṭalav foog le_s sama, wa laakin huwa nafsu gaal, Ar Rabb gaal le Rabbi, Agvud van yamiini,

³⁵ ḥatta avmil vudwaanak bambar le rijleek.

³⁶ Valashaan kida, xalli kullu ahl beet Israa’iil yavrif be_l ḥagg ’an Allaah vamal Yasuuv da, al intu ṣalabtuuhu, Rabb wa Masiiḥ.”

³⁷ Wa lamman an naas simivu da, itḥayyaru fi guluubum katiir xalaaṣ, wa gaalu le Buṭrus wa le_r rusul at taanyiin, “Binavmil shinu, yaa axwaan?”

³⁸ Wa Buṭrus gaal leehum, “Tuubu wa itvammadu kullu waaḥid minnakum b_ism Yasuuv al Masiiḥ le ghufraan xaṭaayaakum, wa bitaaxudu hadiyyat ar Ruuḥ al Gudus.

³⁹ Vashaan leekum al wavad, wa le awlaadkum wa le kullu_n naas al baviidiin, le kulluhum al binaadiihum ar Rabb Ilaahna.”

⁴⁰ Wa be kilmaat taanya katiira, Buṭrus kaan biḥazzirum wa bibashshirum wa gaal, “Axlaṣu min naas az zaman da al baṭṭaaliin.”

⁴¹ Wa_l giblu kalaamu itvammadu, wa itlammu valeehum fi_l yoom daak talaatat alaaf nafar tagriiban.

⁴² Wa kaanu bistamirru fi tavliim ar rusul wa_sh sharika wa kasr al veesh wa _ṣ ṣala.

⁴³ Wa_l xoof wagav vala kullu nafs, wa_r rusul vamalu vajaayib wa valaamaat katiira.

⁴⁴ Wa kullu_l mi’aaminiin kaanu sawa, wa kaanu vindahum kull al ḥaajaat bitaavatum fi maḥall waaḥid.

⁴⁵ Wa kaanu bibiivu ḥaajaatum wa buḍaavatum wa bigsimuuhum been kulluhum, le aiyi waaḥid zei maa hu kaan muḥtaaj.

⁴⁶ Wa kullu yoom kaanu bistamirru yitlammu fi_l heekal wa bikassiru_l veesh fi_l buyuut, wa biyaaklu mava bavḍ be faraḥ wa guluub muxliṣiin.

⁴⁷ Wa kaanu yaḥmadu Allaah wa yalgu nivma giddaam kullu_n naas. Wa_r Rabb jamav le_l kaniisa kullu yoom al kaanu bixlaṣu.