Pilipae 2 - Tataroha Diana

Kie Ke Haꞌamwai-mweiꞌakie Mala A Kraes

¹ Nou saie uri iiꞌo-rurunge iꞌomu i lalo aana a Kraes ko haꞌa-aꞌailaꞌaꞌomu, na manata-diananga ingeie ko haꞌasusuꞌomu. Na nou saie noꞌone uri omu toꞌo aana Liꞌoa Maaꞌi peꞌiꞌomu, na omu manata diana huniꞌomu heiliu peꞌi aamasilana mo iinoni.

² Na aena urine, no ko eitanaiꞌomu uri hunie omu ke neꞌie taꞌa-taꞌa mei sae, na omu ke mani manata diana huniꞌomu heiliu. Mala omu kei teꞌurine, nge ne kei tohungei ilenimwaꞌe oto liutaa haahiꞌomu.

³ Na omu ke suꞌuri da nga mei ola huni haꞌapainaꞌaꞌomu na huni toohaꞌiniꞌomu haahie. Taꞌe omu ke haꞌamwai-mweiꞌaꞌomu, na omu ke loꞌongaꞌinie uri ngaeta mwala kire roroꞌa liutaa aamiu.

⁴ Omu ke suꞌuri loꞌongaꞌi mola i sulie nga taa omu saetoꞌo aana maraamiu, taꞌe omu ke loꞌongaꞌi noꞌone i sulie nga taa e diana hunie ngaeta mwala.

⁵ Tolahamiu na ahutana loꞌongaꞌinge iꞌomu ke mani sada oto mala loꞌongaꞌinge na tolahana a Kraes.

⁶ Aana ingeie e pwani neꞌi God oto uure mai, taꞌe e kaꞌa sare tola hiitoꞌo ike aana mei neꞌisaenga ngeena i sapena, uri ingeie e sada mola peꞌie a God.

⁷ Oto ingeie maraana e toliꞌaasie ahutana walu ola huni haataꞌinie painanga ingeie ngeena, na e si toolea tolaha ni koni-konihe i sapena aana e neꞌi iinoni, na e iiꞌo oto mola mala ngaeta iinoni aana walumalau ie.

⁸ E haꞌamwai-mweiꞌaa maraana, oto e tola i sulie neꞌisaenga a God lai hule oto aana maelana i lengine poꞌu-poꞌu.

⁹ Aena ngeena, nge a God e si tahelaꞌinie oto loꞌu liutaa hunie leu ni haꞌamaꞌunge i Lengi, na e niie satai ola ngeena hunie nge e lai peine loꞌu liutaa aana taꞌena nga sata.

¹⁰ Na hunie haꞌamaꞌunge aana satana a Jisas, ahutana mo ola mauri taꞌau i Lengi na mo iini mei aano, na oto aana hanue mo iini e mae oto, kire kei meni pouruuru i naꞌona.

¹¹ Na ahutada kire kei meni houleꞌinie oto uri a Jisas Kraes ingeie Aalaha haahie taꞌena nga ola. Na kire kei meni haꞌamanikuluꞌaa satana God Aamaka.

Kie Ke Neꞌi Raa-raa Hunie Walumalau

¹² Aena urine, maeni eesiku, mala omu lae kaꞌu peꞌi tola i sulie a God aana omu rongo hunie walaku maholo ineu ue peꞌiꞌomu, omu ke hele susuleꞌi aani lulu i sulilana walaku oto urine, oto liutaa aana maholo mala ienini nge nou kaꞌa iiꞌo ike peꞌiꞌomu. Aana e roroꞌa toꞌohuu uri omu ke mani meꞌuteꞌinie a God hunie omu ke asu aꞌailaꞌa huni haꞌa-oaie leune a God e aehotaa, aana e haꞌa-uuriꞌomu mwaanie haꞌamotaahinge.

¹³ Aena aana a God ni ko esu i lalo aamiu urine, huni haꞌamwaꞌe-mwaꞌeꞌomu, na hunie omu ke sai tola i sulie tolahana maraana.

¹⁴ Taꞌe-taꞌena nga ola omu ko euꞌesuie, omu ke auꞌesu oodo-oodo oto mola aana, mwaanie upwanga na haitelilinge haahiꞌi.

¹⁵ Na hunie omu ke iiꞌo oodotaꞌi, na tolahamiu ke diana aana omu neꞌi mwela maaꞌi a God oto, maꞌalana omu ko oꞌoꞌo ue i matolana mo iinoni ni oorahaꞌaa na tolahada e popoliꞌiliꞌi. Ikire, kire iiꞌo i laona rodohono, na iꞌomu oto raa-raa hunire,

¹⁶ aani laeliwalanga nada aana mei wala nge e sai niie maurihe huu hunire. Na mala uri omu ko teꞌurine, nge ne kei tohungei ilenimwaꞌe aana hai dinge a Kraes kei ooli mei, aena aana ne kei saie uri nou kaꞌa huru mwaakule ike taane aana asunge ineu i matolamiu.

¹⁷ Na hiiwalaimolinge iꞌomu aana God, e urihana uuraaꞌinge nge niilana a lae hunie a God na ko ilenimwaꞌe haahie. Oto mala uri ingeie kei loꞌongaꞌi ni iidu tarakonie maenga ineu noꞌone huni haꞌa-ahue uuraaꞌinge aana hiiwalaimolinge iꞌomu, nge ne kei tohungei ilenimwaꞌe loꞌu liutaa. Na saeku omu ke ilenimwaꞌe oto noꞌone peꞌieu haahie leune.

¹⁸ Oto mala nga mei ola urine kei reu eeku, nge omu ke ilenimwaꞌe mola peꞌieu.

A Pol E Sare Uusungeꞌinie A Timoti Na A Epaprodaetas I Saana Mo Pilipae

¹⁹ Nou norutoꞌo uri e saꞌa tewa ike taane i naꞌona Aalaha ikie a Jisas kei haꞌamwadaꞌue hunieu, huni uusungeꞌinie wau a Timoti i seemiu. Hunie ineu noꞌone ne ke hii kohi aani rongolana nga mo tataroha mwaaniꞌomu.

²⁰ Aana a Timoti oto taꞌa-taꞌa iini e manata diana huniꞌomu noꞌone mala ineu, huni leesie uri mauringe iꞌomu ke lae diana.

²¹ Mo iini hunge, kire ko talei loꞌo-loꞌongaꞌinire mola maraada, na kire saꞌa loꞌohie ike mo ola i sulie tolahana a Jisas Kraes.

²² Taꞌe omu lio saie oto asunge diana a Timoti, aana ko peꞌi diana aaku aani laeliwalanga aana Tataroha Diana, mala e ro heꞌi-aamana ko esuie taꞌa-taꞌa mei esunge.

²³ Aena urine, ingeie oto ne kei tolana uusungeꞌinie wau i seemiu, aana maholo ne kei sai diana aana uri nga taa kei reu eeku i leu.

²⁴ Na nou hiiwalaimoli uri e saꞌa tewa taane na a Aalaha ikie kei peꞌieu hunie ineu maraaku ne ke hule wau i seemiu.

²⁵ Na nou loꞌongaꞌinie oto uri e malisine ne ke holaꞌi uusungeꞌinie oto wau a oaku Epaprodaetas. Aana ingeie oto mwane aasikaelu nge omu uusungeꞌinie mai huni peꞌieu, na mere asu tararuru oto nana God mala e ro ramo i laona oohotaa.

²⁶ A Epaprodaetas ko tohungei sare leesiꞌomu loꞌu, na ko tohungei tolahiꞌe aana omu rongoa uri ko mweri hiitoꞌo.

²⁷ Na e toꞌohuu oto, aana e tohungei mweri hiitoꞌo, hule aana e karaꞌi mae. Taꞌe a God e aamasie, na e haꞌa-uurie. Na kaꞌa taꞌe ike ingeie haliꞌite, aana a God e aamasieu noꞌone mwaanie uri saehuunge haahie maenga ingeie ke hite haahie loꞌu ahutana saehuunge ineu.

²⁸ Aena urine no ko tohungei sare uusungeꞌinie oto wau a Epaprodaetas i seemiu, hunie omu ke ilenimwaꞌe loꞌu aana omu kei leesie, na hunie ineu ne ke suꞌuri tolahiꞌe aana.

²⁹ Aena urine, omu ke takuhie peꞌi ilenimwaꞌenga mala aasikaelu i lalo aana Kraes. Na omu ke haꞌamaꞌu noꞌone aana mo iini mala ingeie.

³⁰ Aana ingeie e toliꞌaasie maraana, mala oto e karaꞌi mae i tehulaꞌana asunge a Kraes, hunie ke peꞌieu oolisiꞌomu, aana e aasa oto huniꞌomu huni peꞌieu aana maholona.