Tataroha Diana I Sulie A Jisas Kraes Nge A Mak E Uusue 11 - Tataroha Diana

A Jisas E Aarapuu I Jerusalem Mala Inemauri

¹ Maholo a Jisas na mo pwaarongoisuli ingeie kire lae hunie i Jerusalem, kire ko nanauhie mo huilume i Betfeis na i Betani, karaꞌinie Uuwo Ni Ei Olif. Oto a Jisas ko uusungeꞌinie e ro pwaarongoisuli ingeie oto i naꞌo,

² na ko teꞌuri hunirerue, “More ke lae i naꞌo aana huilume nge kolu ko leesie taꞌaune. Na maholo more kei hule taꞌau, more kei leesie kele dongki haalu kire pwasue taꞌau i leune. Dongki ngeena, nga iinoni kaꞌa taꞌe ike ue aana. Oto more ko luhesie, more ko toolea mai hunieu.

³ Mala uri nga iini ko dolosi aamoreꞌi uuri, ‘?More ko luhesie huni taa?’ oto more ke unue oodoie uuri, ‘A poro paine e saetoꞌo aana, na kei haꞌatola aalihoꞌi taane loꞌu mei aana lau-leu.’ ”

⁴ Oto kirerue lae taꞌau, na kire ko lio oodoie oto kalei dongki i sulie tala nge ngaeta mwala kire pwasue oto i maana nume. Na maholo kirerue ko luhesie,

⁵ ngaeta mwala kire uure i leune, kire ko dolosi aadarue uuri, “!Ei! ?More ko luhesie dongki ngeena huni taa?”

⁶ Oto kirerue ko aalamire oto mala a Jisas e hatongaꞌi hunirerue, na mo mwaena ko toliꞌaasie oto hunirerue.

⁷ Oto kirerue toolea mai kalei dongki ngeena i saana a Jisas, na kirerue ko aasie mo toꞌoni ikirerue i kolune dongki, oto a Jisas e si taꞌe i lengine.

⁸ Na aana maholona mwala hunge kire eepasie tala aana mo toꞌoni ikire, na ngaeta mo iini kire ko lamasie mo kele sasarai ei i laona maꞌusu na kire holasiꞌi noꞌone i sulie tala.

⁹ Oto mwala kire naꞌo na mo iini i purine a Jisas, kire ko si lae peꞌi soi oto paine, na kire ko lahea God uuri, “!Lahea God! A God ke haꞌadianaꞌaa iini ko lae mai nunuhaꞌana satana.

¹⁰ A God ke haꞌadianaꞌaa mwane ie, aana ko lae oto mai huni neꞌi inemauri naka mala a Deved Inemauri weuwaka. !Lahea God taꞌau i Lengi!”

¹¹ A Jisas e lae hule taꞌau i Jerusalem, oto e lae sili taꞌau i laona Nume Maaꞌi Peine, ko lio hailiu hunie leesie ahutana mo ola. Taꞌe aena aana maholona ko seulehi mone oto, e lae mola hunie i Betani peꞌie aawalai pwaarongoisuli mwana rue ingeie.

A Jisas E Uesie Ngaeta Ai

¹² Oto e dangi hoꞌowa kire ko eelihoꞌi mei mwaanie i Betani, na maholona a Jisas ko hiolo.

¹³ Oto e leesie ai fik uure mai haꞌatau, na apana e ure diana. Oto ko lae oto i saana huni leesie ohe nga hue-huei ei aana. Taꞌe maholo e lae mai hule aana, na ko leesie mola taꞌe apa-apana haliꞌite, i sulie e kaꞌa hule ue aana maholo hunie mo fik kei hungu.

¹⁴ Oto a Jisas ko teꞌuri hunie ai ngeena, “Nga iini saꞌa roroꞌa ni ngaue loꞌu nga hue-huei ei loꞌu eemu uure siꞌiri pwau weu.” Na mo pwaarongoisuli ingeie kire rongoa oto nga taa e unue.

A Jisas E Oohea Mwala Mwaanie Nume Maaꞌi Peine

¹⁵ Maholo kire lai aarapuu taꞌau i Jerusalem, oto a Jisas ko lae i laona lolata aana Nume Maaꞌi Peine, na ko aehota oohea mwala ko holi-holi na mo iini ko haꞌa-haꞌaholingeꞌi ola. Ko keusie oto mo taetahe mwala ko ooli-oolisi toꞌoha na mo leu ni iiꞌo-iiꞌo ikire mo iini ko haꞌaholingeꞌi hiroikuu.

¹⁶ Na ko uure honosie oto mwaanie nga iini e toolea loꞌu mei nga mei ola huni haꞌaholi i laona lolata aana Nume Maaꞌi Peine.

¹⁷ Oto ko si ere aada uuri, “A God e unue aana mo Uusu-uusu Maaꞌi uuri, Nume ineu oto nume ni aarengaꞌinge hunie mwala aana ahutana mo henue i laona walumalau. Aesaea 56:7 Taꞌe omu ko si da mola ko neꞌie hahale kira horopeli kire sai mumuni i laona.” Jeremaea 7:11

¹⁸ Oto mo naꞌohai pris na mo haꞌa-uusuli aana mo Haꞌatolanga a Mosis kire rongo urine, kire ko aehota loꞌongaꞌi oto i sulie nga tala uuri taa kire kei horo maesie a Jisas aana. Taꞌe kire ko meꞌuteꞌinie, aena aana ahutana mwala ko tohungei pangataꞌinie haꞌa-uusulinge ingeie.

¹⁹ Oto e hule i seulehi, a Jisas na mo pwaarongoisuli ingeie kire lae oto loꞌu mwaanie i Jerusalem.

A Jisas E Haꞌa-uusuli I Sulie Aarengaꞌinge Peꞌi Hiiwalaimolinge

²⁰ Oto i maahuꞌo-huꞌo aana hai dinge loꞌu i puri, kire ko eelihoꞌi loꞌu mei sulie tala, na kire ko leesie ai nge a Jisas e uesie, e mae uure i toꞌelena lai hule oto aana imi-imine.

²¹ Oto a Pita ko aamasitoꞌo aana nga taa nge a Jisas e unue, oto ko teꞌuri hunie, “Haꞌa-uusuli, o ke lio kaꞌu. Ai nge o uesie e mae oto.”

²² Oto a Jisas ko unue hunire uuri, “Omu ke hiiwalaimoli mola aana a God.

²³ Toꞌohuu no ko unue huniꞌomu uri mala taꞌena nga iini eemiu ko unue hunie toloi henue ie uuri, ‘O ke pola mola i eesi,’ na e kaꞌa neꞌisae rue-ruaꞌa, nge nga taa e sukaa kei reu mola hunie.

²⁴ Oto aena ngeena no ko unue huniꞌomu uri aana maholo omu ko aarengaꞌi na omu ko sukaa nga mei ola aana a God, omu ke norutoꞌo oto uri omu hele aana oto, na niilana nga taa omu sukaa kei lae oto huniꞌomu.

²⁵ Na maholo omu ko aarengaꞌi, omu ke holaꞌi saeꞌaasie kaꞌu nga mei ola omu ko toꞌo aana honosie nga iinoni, hunie Aamamiu i Lengi ke si saeꞌaasie mo oorahaꞌaanga iꞌomu mala omu esuiena.”

²⁶

Mo Rato Ni Jiu Kire Lupweꞌi Dolosie Uri Nanamanga A Jisas E Uure I Tei

²⁷ Oto kire ko heꞌi hule loꞌu taꞌau i Jerusalem, na maholo a Jisas e lae i laona Nume Maaꞌi Peine, mo naꞌohai pris, na mo haꞌa-uusuli aana mo Haꞌatolanga a Mosis, na mo rato ni mwane, kire lae mai saana.

²⁸ Oto kire ko dolosi aana uuri, “?Nga nanamanga uri taa ni o toꞌo aana huni esuie walu ola o ko deuꞌi ngeena? ?Na a tei ni e niie nanamanga ngeena huniꞌo?”

²⁹ Oto a Jisas e aalamire ko teꞌuri, “Ineu noꞌone no ko sare holaꞌi dolosie taꞌa-taꞌa mei dolosinge aamiu. Mala omu ko aalamieu, nge ne ke si unue oodoiꞌomu uri nanamanga uri taa nou toꞌo aana huni esuie walu ola ienini.

³⁰ Oto omu ke unue kaꞌu oodoieu. ?A tei ni e niie nanamanga hunie a Jon huni loto maaꞌi aana mwala? ?A God wa mo iinoni mola?”

³¹ Oto kire ko aehota ere hailiu i matolada uuri, “?Oto nga taa kolu kei unue? Mala uri kolu kei unue a God ni e niie nanamanga ngeena hunie a Jon, nge kei unue hunikolu uuri, ‘?Nge ko urine, na e ue omu kaꞌa hiiwalaimoli aana?’

³² Taꞌe mala kolu kei unue uri iinoni mola ni e niie nanamanga ngeena hunie a Jon, nge kolu kei lio talakaelu aana mwala. Aena aana ahutana mwala kire mani neꞌisae oto uri a Jon ingeie nga propet toꞌohuu.”

³³ Oto kire ko si aalamie mola a Jisas uuri, “Melu kaꞌa saie ike.” Oto a Jisas ko si teꞌuri hunire, “Ko urine, nge ineu na nou saꞌa unue ike noꞌone oodoiꞌomu uri nga nanamanga uri taa no ko esuie mo ola ienini aana.”