Matiu 7 - Tataroha Diana

Leilemu Kei Lae Noꞌone Mala O Ko Leie Mwala

¹ Oto a Jisas e heꞌi teꞌuri loꞌu, “Mwaanie omu talei lei-leie taꞌena nga iinoni, mwaanie a God e leiꞌomu noꞌone urine.

² Aena aana tolahai ola nge omu kei leie ngaeta mwala aana, a God kei leiꞌomu noꞌone aana. Na nga haꞌatolanga uri taa nge omu ko leie mwala aana, taꞌa-taꞌa haꞌatolanga ngeena noꞌone mola nge a God kei leiꞌomu aana.

³ ?E ue kaꞌu o ko ili lio susulie kele ngangaꞌai ola oto mola mwai-mwei i maana aasimu? Taꞌe hule aana iꞌoe, rotoi ei leku e eno honosie maamu na o kaꞌa sai hiingeꞌinie.

⁴ Na e kaꞌa diana ike noꞌone uri hunie o ke unue hunie aasimu uuri, ‘Kaꞌu ne ke taꞌaasie ngangaꞌai ola mwaanie maamu,’ na hule aana iꞌoe maraamu, rotoi ei leku noꞌone mola e eno honosie maamu.

⁵ !Nga hero-heronga kaꞌa urine ike! Mala uri o ko teꞌurine, nge o ko lupweꞌi deu-deu mola ni ngeena. Taꞌe o ke holaꞌi taꞌaasie kaꞌu rotoi ei leku ngeena mwaanie maamu hunie maamu ke manola. Oto o ke si lio susulie kele ngangaꞌai ola i maana aasimu hunie o ke kae aasie.”

Haꞌa-uusulinge A Jisas E Saꞌa Toꞌohie Ike Saena Ngaeta Mwala

⁶ “Mwaanie omu nii-niie mo ola maaꞌi mala Tataroha Diana hunie mo iini kei heliwala mola hunie. Aana urine e urihana mola omu ko niie mo ola maaꞌi ana mo usu, oto kire kei eeliꞌu mola na kire kei alaiꞌomu. Na e urihana noꞌone omu ko aasie mo ola diana iꞌomu mala mo dehi i saana mo poo, na kire kei uuri puli-pulisiꞌi mola aana aeꞌaeda.”

O Ke Aarengaꞌi Tarau Talana Mo Tolahai Ola Diana A God

⁷ Oto a Jisas e heꞌi teꞌuri loꞌu, “Omu ke susuke aana a God, na ingeie kei niie huniꞌomu. Omu ke hai-heitalea i saana God, na omu kei lio oodoie. Na omu ke iiki-iiki i kolune maa ingeie, na kei tahanie maa talamiu.

⁸ Aana taꞌena nga iini ko sukaa nga mei ola aana a God, nge kei niie oto hunie. Na taꞌena nga iini ko heitalea nga mei ola aana a God, kei lio oodoie oto. Na taꞌena nga iini ko iiki-iiki ikolune maa ingeie, nge a God kei taha maa talana oto.

⁹ ?E ue aana iꞌomu mo mamaꞌa wa mo teite? ?Mala uri kalemu kei sukaa nga mei ngeulaa aamu, o sai niie mola nga ho heu ana?

¹⁰ ?Wa ko sukaa nga ho iiꞌe aamu, o sai niie mola nga mwaa ana? !Haꞌike!

¹¹ Iꞌomu mo iinoni oorahaꞌaa, taꞌe hule aana omu sai niie mo ola diana hunie mo mwela iꞌomu. ?Ilisie Aamamiu i Lengi iini e diana liutaa aana taꞌena nga iinoni, uri e saꞌa nii liutaa aana mo ola diana hunie nga mo iini ko suke aana?

¹² “Mo ola nge saemiu mwala ke dauꞌi huniꞌomu, nge iꞌomu noꞌone omu ke dauꞌi hunie mwala. Aena aana loꞌongaꞌinge aana ahutana mo Haꞌatolanga a Mosis na haꞌa-uusulinge mo propet ni otona.”

Mwala Hunge Kei Sereꞌinie Tala Takoie Maurihe Huu

¹³ “Omu sai sili i laona Aalahanga a God mola sulie maai para mwai-mwei. Aana maai para hunie maenga e paine na tala takoie e aaroka, na mwala hunge kire ko lae oto i sulie.

¹⁴ Taꞌe maai para hunie maurihe huu e mwai-mwei na tala takoie e kokohisi, na tootaꞌi iini mola kire kei lio oodoie.”

Tolahana Mo Propet Eero-Eero Kei Haataꞌinie Uri Kire Takalo

¹⁵ “Omu ke lio talamiu aana mo propet eero-eero, kire kei lae mai seemiu na kire kei lupweꞌi deu mala mo sipu e rako-rako, taꞌe i laona saeda, ikire mo wawaulo ni meꞌesu oto toꞌohuu.

¹⁶ Omu kei lio saire taane aana tolahada, mala walo kau-keu e saꞌa hungu ike aana fik, wa puli-pulisi poo ke hungu aana grep.

¹⁷ E urine loꞌu aana taꞌena nga ai diana kei hungu oto aani hue-huei ei diana, na ai aaela kei hungu oto aani hue-huei ei aaela haliꞌite.

¹⁸ Ai diana e saꞌa roroꞌa hungu ike aani hue-huei ei aaela, wa ai aaela ke hungu eeni hue-huei ei diana

¹⁹ Taꞌena nga ai e kaꞌa hungu eeni hue-huei ei diana, nge kire kei tohue na kire kei aasie i laona dunge.

²⁰ Aena ngeena omu kei lio saie mo propet eero-eero aana tolahada.

²¹ “E kaꞌa ike ahutana mo iini ko unu-unue hunieu uuri, ‘!Aalaha ineu!’ uri kire kei meni sili i laona Aalahanga a God, taꞌe mo iini ko deu i sulie saena Aamaku i Lengi haꞌalaa.

²² Aana dinge ooreta, mwala hunge kei unue hunieu uuri, ‘!Aaia, aalaha iꞌemi! Emi tarohaꞌinie walana a God aana satamu, na emi oohe aasie mo liꞌoa aaela aana satamu, na mo huꞌi-huꞌite hunge emi deuꞌi aana satamu.’

²³ Oto aana maholona ne ke si unue mola hunire uuri, ‘Nou kaꞌa manataꞌiniꞌomu ike. !Tahi mwaanieu, iꞌomu mo iinoni ni oorahaꞌaa!’ ” Sam 6:8

Iini Ko Tola I Sulie A Jisas E Urihana Mwane Saenanau E Tohu Diana Aana Nume

²⁴ “Aena ngeena taꞌena nga iini ko rongoa walaku peꞌi sulu i suliꞌi, e urihana iinoni saenanau e tohue nume ingeie aana e eli kokoro talana mo hunu, na e neꞌie mo heu i poo-pootana mo hunu aana nume ngeena.

²⁵ Oto lae-lae maholo kei talei nemosie, na kei kone ahuie, na ooru peine kei halolo aana nume ngeena, taꞌe e saꞌa aaꞌoho ike, aena aana poo-pootana e iiꞌo i lengine hau.

²⁶ “Na taꞌena nga iini ko rongoa walaku na e kaꞌa sulu ike i sulie, ingeie e urihana iinoni e pweu nge e tohue nume ingeie mola i lengine oone mwaakule. E kaꞌa eli kokoro ike wa ke neꞌie mo heu ehuie mo hunu.

²⁷ Oto lae-lae maholo nemo kei nemosie, na kone kei kone ahuie, na ooru peine kei hite aana, oto kei aaꞌoho taꞌingelu oto i aano.”

Haꞌa-uusulinge A Jisas E Nanama

²⁸ Maholo a Jisas e unu mangoa mo ola ienini, oto ahutana mwala ko meni pangataꞌinie mo haꞌa-uusulinge ingeie,

²⁹ aana haꞌa-uusulinge ingeie e kaꞌa urihana ike mo haꞌa-uusuli aana mo Haꞌatolanga a Mosis, aana e haꞌa-uusuli aana nanamanga.