Matiu 20 - Tataroha Diana

A Jisas E Aalahuu Aana Mwala Auꞌesu

¹ Oto a Jisas ko heꞌi ere loꞌu uuri, “Aalahanga a God e urihana nga naꞌohai mwane nge e toꞌo aana hohola, na e iisitaa oto i maahuꞌo-huꞌo huni haaraie nga mwala huni holire huni esu nana aana hohola ingeie.

² Oto kire mani neꞌisae mouteꞌi peꞌie naꞌohai mwane ngeena uri kei holire aana waaite diana aana taꞌa-taꞌa seleni ni Rom aana hai dinge. Nge e si uusungeꞌinire taꞌau i laona hohola ingeie.

³ “Aana siwana nga maholoi sato aana aapa i hoꞌowa, e tapaliu na ko leesie ngaeta mwala kire uure mola mwaakule aana leu ni uusiꞌe.

⁴ Oto ko unue hunire uuri, ‘Omu ke lae noꞌone i esu nekue aana hohola ineu, na ne ke si waaiꞌomu taane adona asunge iꞌomu.’

⁵ Oto kire ko lae oto i esu. Na oto i upui aatowaa na loꞌu i aapai sato ko heꞌi teꞌurine loꞌu.

⁶ “Oto maholo ko karaꞌinie limana nga maholoi sato i seulehi, e lai liu loꞌu i saana leu ni uusiꞌe na ko leesie ngaeta mwala kire uure mola mwaakule. Oto ko dolosi loꞌu aada uuri, ‘?E ue omu ko talei uure-uure oto mola mwaakule hunie hai dinge laku urine?’

⁷ “Oto kire ko aalamie uuri, ‘Sulie nga iini huni esu nana haꞌike.’ “Oto ko unue hunire uuri, ‘Nge ko urine, omu ke lae noꞌone i hohola ineu huni esu nekue.’

⁸ “Oto i seulehi, naꞌohai mwane paine ngeena ko unue hunie naꞌohana mwala auꞌesu uuri, ‘Soie mai mwala auꞌesu, na o ke niie mo toꞌoha ikire hunire. O ke talaꞌae aana mo iini kire hule haꞌi puri, o si lai haꞌamango aana mo iini kire hule holaꞌinaꞌo.’

⁹ “Mo mwane e aehota asu aana limana nga maholoi sato i seulehi, kire lae mai, oto kire ko toolea taꞌa-taꞌa seleni ni Rom nga mwane.

¹⁰ Oto e lae urine, lai hule aana mo iini nge kire aehota asu oto uure i maahuꞌo-huꞌo. Ikire, kire lae loꞌu mei huni toolea waaitada, na kire ko loꞌongaꞌinie uri kire kei tola liutaa aana mo iini nge kire aehota asu haꞌi puri. Taꞌe kire si lio, na kire ko meni tola sada loꞌu mola aana taꞌa-taꞌa seleni nga iini.

¹¹ Kire tola toꞌoha mango, kire ko si aehota upwesie naꞌohai mwane ngeena.

¹² Kire ko teꞌuri, ‘!Sei! Mwala kire lae poi puri ie kire asu mola hunie taꞌa-taꞌa maholoi sato, oto o ko si holi sada aada loꞌu mola peꞌie mo iini melu esu hunie hai dinge laku i laona sato raramea.’

¹³ “Oto naꞌohai mwane ngeena e aalamie ngaeta iini aada na ko teꞌuri, ‘Rongo kaꞌu malahuku, nou kaꞌa haꞌamweꞌu-mweꞌuꞌo ike. O haiholotaꞌinie kaꞌu hunieu uri o neꞌisae mouteꞌi huni esu uana taꞌa-taꞌa seleni aani dinge.

¹⁴ Toolea mo toꞌoha iꞌoe na o ke aalihoꞌi mola i nume, aana nou sare niie noꞌone mola hunie iini e lae mai puri ie mala oto nou niie kaꞌu huniꞌo.

¹⁵ ?Uri e kaꞌa adona ike ne ke dau mala saeku aana mo toꞌoha ineu maraaku? ?Wa omu ko upwesieu mola aana no ko deu diana aana mo iinine urine?’ ”

¹⁶ Oto a Jisas ko si haꞌamangoa ere-erenga ingeie na ko teꞌuri, “Mo iini hunge nge kire ko puri oto ie kire kei lae loꞌu i naꞌo, na mo iini e naꞌo-naꞌo kaꞌu kire kei heꞌi puri loꞌu.”

Oolune Nga Maholo A Jisas E Ere I Sulie Maenga Ingeie

¹⁷ Oto maholo a Jisas e lae hunie i Jerusalem, e si toolea aawalai pwaarongoisuli mwana rue maraada, na ko lae peꞌi ere-ere nada lae-laeꞌi uuri,

¹⁸ “Kolu ko lae oto hunie i Jerusalem eena, na ineu a Kale Ni Iinoni, pwelolaku kei lae oto taꞌau i leune. Kire kei niieu oto i nimana mo naꞌohai pris na mo haꞌa-uusuli aana mo Haꞌatolanga a Mosis huni lei mae aaku.

¹⁹ Oto kire kei heꞌi niieu loꞌu hunie mo Aapoloa Aaopa huni haꞌamwasi eeku, na huni wini-winieu, na huni horo maesieu i lengine poꞌu-poꞌu. Taꞌe aana oolune nga hai dinge, ne kei taꞌelaꞌi eelihoꞌi loꞌu mwaanie maenga.”

Mo Mwane Paine Ke Neꞌi Iinoni Auꞌesu Nana Ahutana Mwala

²⁰ Oto huꞌe a Sebedi e lae mai saana a Jisas peꞌie e ro kalena mwane, ko pouruuru i naꞌona, na ko sukaa uri ke peꞌie.

²¹ Oto a Jisas ko dolosi aana a huꞌena uuri, “?Nga ola taa ni o saetoꞌo aana?” Oto a huꞌena ko aalamie uuri, “Ne kei tohungei ilenimwaꞌe aana o kei neꞌie e ro kaleku ienini ke aalaha peꞌiꞌo aana e ro naꞌohai leu aana aalahanga iꞌoe, nga iini i pwalo-pwalomu na nga iini i meu-meulimu.”

²² Oto a Jisas ko unue hunie e ro mwaasine ngeena uuri, “More kaꞌa saie ike nga taa more ko sukaa ni ngeena. ?Uri more sai hotelaꞌinie taane iiola ne kei hotelaꞌinie? ?Wa kei hiꞌe huniꞌomoreꞌi?” Oto e ro mwaasine ko aalamie uuri, “Mere sai esuie mola.”

²³ Oto a Jisas ko unue loꞌu hunirerue uuri, “Toꞌohuu more kei hotelaꞌinie taane iiola ne kei hotelaꞌinie, taꞌe uri hunie iiꞌonga i pwalo-pwaloku na i meu-meuliku, e kaꞌa leu ike i sapeku huni niie hunie nga iini, aana e ro iiꞌo-iiꞌoha ngeena kire iiꞌo oto loosie mo iini Aamaku e lio hilisire.”

²⁴ Maholo ngaeta aawalai pwaarongoisuli loꞌu kire rongoa sukanga ro mwaasine, oto kire ko si saewasulie e ro mwaasinena.

²⁵ Taꞌe a Jisas e mani soire mai saana, ko si unue hunire uuri, “Omu saie oto uri mo aalaha ni welumalau kire ko sasare haataꞌinie nanamanga ikire haahie mwala ikire, na mo naꞌohai mwane kire sai deu rarahie noꞌone mwala huni lae i sulie mo heri-huninge ikire.

²⁶ Taꞌe iꞌomu, omu ke suꞌuri teꞌurine i matolamiu. Nga iini hikemiu ko sare aalaha, ke neꞌi iinoni euꞌesu nemiu.

²⁷ Na nga iini hikemiu ko sare neꞌi naꞌohai mwane haahiꞌomu, nge ke neꞌi koni-konihe nana ahutemiu mango.

²⁸ Mala oto ineu a Kale Ni Iinoni nou kaꞌa lae ike mai hunie uri mwala ke asu nekue, taꞌe nou lae mai huni neꞌi koni-konihe nana mwala, na huni niie maurihaꞌaku i tehulaꞌana mwala hunge, na huni holi eelihoꞌi aana mwala hunge.”

A Jisas E Haꞌa-uurie E Ro Mwane Kire Ulu

²⁹ Maholo a Jisas na mo pwaarongoisuli ingeie kire ko lae mwaanie hanue i Jeriko, mwala oto hunge kire ko lae noꞌone i sulire.

³⁰ E ro mwane e ulu kirerue oꞌoꞌo i reune tala i leune, na kirerue ko rongoa uri a Jisas nge ni ko tapaliu. Oto kirerue ko aehota aawara oto uuri hunie, “!Aalaha paine! !Kalena Deved Inemauri, o ke aamasiꞌemereꞌi!”

³¹ Oto mwala ko ere aadarue uri kirerue ke rohu. Taꞌe kirerue ko si aawara oto loꞌu liutaa uuri, “!Aalaha paine! !Kalena Deved Inemauri, o ke aamasiꞌemereꞌi!”

³² Oto a Jisas e uure hahuroto, ko dolosi aadarue uuri, “?Nga taa ni more saetoꞌo aana ne ke da huniꞌomoreꞌi?”

³³ E ro mwane e ulu ngeena ko aalamie a Jisas uuri, “Aalaha paine, saemereꞌi hunie mere ke lio-lio loꞌu.”

³⁴ A Jisas e aamasirerue, ko si hele wau i maadarue, na maadarue ko tolana lio-lio loꞌu. Oto kirerue ko si lae i sulie.