Tataroha Diana I Sulie A Jisas Kraes Nge A Luk E Uusue 5 - Tataroha Diana

Mo Pwaarongoisuli A Jisas E Holaꞌi Soire

¹ Ngaeta hai dinge a Jisas e uure i reune Aasi I Kalili na mwala hunge kire loko noꞌone mai saana. Oto mwala ngeena kire ko uure suꞌu-suꞌuie, aena aana kire ko sare rongoa walana God.

² Oto a Jisas e leesie e ro iiola kire ooke puri eeni hai oone, na mwala wee-weesi e lae oto mwaaniꞌi aana kire ko hodalie mo huꞌo ikire.

³ A Jisas e hane i laona ngaeta iiola, iini a Saemon, na ko unue hunie uri ke kele uusue wau mwaanie oone. Oto e iiꞌo i laona iiola, ko si haꞌa-uusulie mwala.

⁴ Maholo e ere-ere mango nana mwala, e si unue hunie a Saemon uuri, “O ke dau suꞌuweu aana leu kokoro, na omu ke aatongie huꞌo i eesi hunie nga mo iiꞌe.”

⁵ Oto a Saemon ko aalamie na ko teꞌuri, “Poro paine, melu haꞌaweoꞌemeelu kaꞌu aani lionga haidengieꞌi, na melu kaꞌa kele saunie ike nga mei ola. Taꞌe i sulie walamu, nge ne kei heꞌi aatongie loꞌu huꞌo.”

⁶ Oto kire ko aatongie loꞌu huꞌo, na kire ko si weꞌi haahie mo iiꞌe oto hunge, hule aana huꞌo na ko karaꞌi haka oto loꞌu.

⁷ Oto kire soie mo oada aana ngaeta iiola huni lae mai peꞌire. Mo oada kire lae mai saada, kire ko si haꞌahonue ahutana e ro iiola aani iiꞌe, hule aana kire ko karaꞌi dodo oto.

⁸ Maholo a Saemon Pita e leesie nga taa e rau ngeena, oto ko si pouruuru i naꞌona Jisas na ko teꞌuri, “O ke lae mwaanieu Aalaha, aana ineu iinoni ni oorahaꞌaa.”

⁹ Aana a Pita na mo iini loꞌu peꞌie kire ko si meni pangataꞌinie mo iiꞌe oto hunge nge kire waꞌi haahiꞌine.

¹⁰ A Jemes na a Jon, e ro kalena Sebedi, e ro oana a Saemon na kirerue ko tohungei pangataꞌi noꞌone. Oto a Jisas ko teꞌuri hunie a Saemon, “Mwaanie o maꞌu-meꞌu. Uure siꞌiri pwau weu, o kei neꞌi iinoni wee-weesi oto hunie mo iinoni.”

¹¹ Oto kire ookea mo iiola i oone, na kire toli puri aana toꞌo-toꞌolada, kire si lulu i sulie a Jisas.

A Jisas E Haꞌa-uurie Mwane Ko Mweri

¹² Ngaeta maholo a Jisas e iiꞌo aana ngaeta huilume na mwane ko sapesalu aana maelaa ni osa, ingeie noꞌone i leune. Oto maholo a mwaena e leesie a Jisas, ko si lai pouruuru honosie na ko haꞌatohu aana uuri, “Aalaha ineu, mala o ko mwaꞌe-mwaꞌe, o ke kuraa sapeku hunie ne ke rereꞌa adona iiꞌonga loꞌu peꞌie mwala a God.”

¹³ Oto a Jisas e si susueꞌinie wau nimana huni hele i sapena mwaena, na ko aalamie uuri, “Iau, nou mwaꞌe-mwaꞌe taane. Sapemu ke mola oto.” Oto maelaa ni osa ngeena e tolana mango oto mwaanie.

¹⁴ Oto a Jisas ko si teꞌuri hunie, “Mwaanie o haꞌa-haꞌarongoa nga iini aana nga taa e rau. Taꞌe o ke oodo mola i saana mo pris hunie kire ke saie uri sapemu e mola oto. Na o ke niie uuraaꞌinge hunie a God mala mo Haꞌatolanga a Mosis e unue. Urine ahutana mwala kire ke si meni saie uri sapemu e mola oto.”

¹⁵ Taꞌe tataroha aana Jisas e si taro hiitoꞌo loꞌu mola, nge mwala hunge e si lae mai huni rongoa Jisas, na hunie ke haꞌa-uurire mwaanie taꞌena nga maelaa.

¹⁶ Taꞌe ingeie e heꞌi lae loꞌu mola mwaanire huni iiꞌo maraana huni aarengaꞌi.

A Jisas E Haꞌa-uurie Mwane E Rarasi

¹⁷ Aana ngaeta hai dinge a Jisas e haꞌa-uusulie mwala, na ngaeta mo Parise na mo haꞌa-uusuli aana mo Haꞌatolanga a Mosis, ikire noꞌone i leune. Kire uure noꞌone mai mwaanie i Jerusalem na ahutana mo huilume aana mo poꞌo ni henue i Kalili na i Jiudia. Na a Jisas e toꞌo aana nanamanga a God e waꞌu huni haꞌa-uurie mo iini ko mweri.

¹⁸ Ngaeta mo mwane kire lae mai na kire aangaꞌinie mwane e rarasi aana hulite. Oto mo mwaena ko sare toolea i nume hunie kire ke neꞌie i naꞌona Jisas.

¹⁹ Taꞌe aena aana mwala e hunge, oto kire kaꞌa saie ike uri kire kei liu peꞌie uri taa i nume. Oto kire aangaꞌinie, kire ko si hane peꞌie mola taꞌau i koluhana nume. Oto kire si hokaꞌie koluhana nume talana mwane rarasi ngeena. Oto kire uukue mola i aano i matolana mwala i naꞌona Jisas.

²⁰ A Jisas e leesie hiiwalaimolinge mo mwane ngeena e paine, e si teꞌuri hunie mwane e rarasi ngeena, “Kaleku, mo oorahaꞌaa iꞌoe saeꞌaasileni e lae oto.”

²¹ Oto mo Parise na mo haꞌa-uusuli aana mo Haꞌatolanga a Mosis, kire ko aehota papanguru-nguru oto hunire maraadaelu uuri, “?A tei mwane ni ko ere toohaꞌinie uri ingeie e paine mala God ie? Taꞌa-taꞌa iini e sai saeꞌaasi oorahaꞌaa oto mola nge a God.”

²² Oto a Jisas mone e saie mola mo loꞌongaꞌinge ikire, ko si teꞌuri hunire, “?E ue nge omu ko loꞌo-loꞌongaꞌi oto hiitoꞌo urine?

²³ Omu saie kaꞌu uri erenga ni mola e mwadaꞌu, na taꞌena nga iini e sai unue mola uuri, ‘Mo oorahaꞌaa iꞌoe saeꞌaasileni e lae oto,’ na loꞌu uuri, ‘!Taꞌelaꞌi! !O ke lae-lae oto!’ Taꞌe huni esuie e ro mei neꞌisaenga ngeena, kire tohungei aasa oto hiitoꞌo hunie iinoni.

²⁴ Taꞌe ineu, a Kale Ni Iinoni, ne kei esuie mola mei ola hunie omu ke lio saie uri ineu, nou toꞌo aana noꞌone nanamanga huni saeꞌaasi oorahaꞌaa mai aano i leu.” Oto a Jisas e si unue hunie mwane e rarasi ngeena uuri, “!Taꞌelaꞌi! O ke toolea hulite iꞌoe na o ke lae-lae oto i nume iꞌoe.”

²⁵ Oto a mwaena e tolana taꞌelaꞌi oto i naꞌona ahutada, e toolea hulite nge e eno-enohie, na ko lae oto peꞌi paalahea God i nume ingeie.

²⁶ Oto ahutana mwala ko si meni pangataꞌi, na kire ko soi haꞌamanikuluꞌaa God. Taꞌe kire ko meꞌu noꞌone, oto kire ko unue uuri, “!Haꞌike eena! Mo ola e si lai lio aaopa kaꞌu kolu ko leesiꞌi siꞌiri ie.”

A Jisas E Soie A Livae

²⁷ Oto i purine, a Jisas e si lae mwaanie huilume na ko leesie nga mwane satana a Livae e iiꞌo aana leu ingeie huni totola toꞌoha aana takis hunie aalahanga ni Rom. Oto a Jisas ko teꞌuri hunie, “O ke lulu i sulieu.”

²⁸ Oto a Livae e taꞌelaꞌi, ko toli puri oto aana toꞌo-toꞌolana na ko lulu i sulie oto.

²⁹ Oto a Livae ko esuie ngaunge paine hunie a Jisas i nume ingeie, na mwala hunge kire loko aana ngaunge ngeena. Hungelana mwala e loko ngeena, ikire mwala susulu toꞌoha noꞌone.

³⁰ Aena leune, ngaeta mo iini aana mo Parise na mo haꞌa-uusuli aana mo Haꞌatolanga a Mosis kire ko upwesie mo pwaarongoisuli a Jisas uuri, “?E ue nge omu ko ngeu na omu ko inu peꞌie mo iinoni oorahaꞌaala mala mo mwane susulu toꞌoha ngeena?”

³¹ Taꞌe a Jisas ko aalamire uuri, “Iinoni nge e awaa mola saꞌa saetoꞌo aana ike mwane kure-kure, taꞌe iini nge ko maelaaꞌa haꞌalaa.

³² Nou lae mai huni haaraie mo iinoni oorahaꞌaa ke oonisae, na nou kaꞌa lae ike mai huni haaraie mo iini kire unue kire diana oto.”

Haꞌa-uusulinge Haalu Ke Suꞌuri Pwaidora Peꞌie Haꞌa-uusulinge Lalahuꞌe

³³ Oto ngaeta mo iini ko unue hunie a Jisas uuri, “Mo pwaarongoisuli a Jon nge kire ko oolo-oolongau tarau, hunie aarengaꞌinge. Mo iini ikire mo Parise na kire ko teteꞌurine noꞌone. ?Taꞌe e ue nge mo pwaarongoisuli iꞌoe kire ko talei ngeu-ngeu na inu-inu mola?”

³⁴ Oto a Jisas ko aalamire uuri, “?Mo malahune a poro haalu kire kei saehuu uri taa na kire ko ngeu-ngeu ue aana ngauhe ni haꞌarurunge na a poro haalu e iiꞌo ue peꞌire?

³⁵ Taꞌe kei hule aana hai dinge nge kire kei toolea poro haalu mwaanire, nge kire ke si oolongau taane.”

³⁶ Oto a Jisas ko heꞌi unue loꞌu mei wala ni aalahuunge ie i sulie haꞌa-uusulinge haalu ingeie hunire uuri, “Nga iini e saꞌa aꞌarie ike nga leu aana toꞌoni haalu huni loꞌamenaa nga toꞌoni lalahuꞌe. Mala uri kei teꞌurine, ko waelie mola toꞌoni haalu ni ngeena, aena aana mei loꞌamena haalu e saꞌa sada ike peꞌie toꞌoni lalahuꞌe.

³⁷ Wa uri nga iini saꞌa huie ike waen haalu i laona mo ateꞌa lalahuꞌe nge kire asuiꞌi eeni teꞌe-teꞌei nanikot. Mala kei teꞌurine, ahutana e ro mei ola ngeena kei meni aaela, aana waen haalu kei hokaꞌie mola mo teꞌe-teꞌei olana, oto waen ko si aahe aasie mola.

³⁸ !Haꞌike! Taꞌe neꞌi-neꞌie oto waen haalu i laona mo ateꞌa aani teꞌe-teꞌei nanikot haalu haliꞌite.

³⁹ Taꞌe omu saie mone tolahana mo iinoni. Kire kei sereꞌinie haꞌa-uusulinge haalu ineu mala mwala kaꞌa saetoꞌo aana ike waen haalu i purine inuhilana waen lalahuꞌe.”