Tataroha Diana I Sulie A Jisas Kraes Nge A Luk E Uusue 4 - Tataroha Diana

A Satan E Malaahongana A Jisas

¹ Oto a Jisas e aalihoꞌi mwaanie wai i Jodan, na Liꞌoa Maaꞌi e iiꞌo oto peꞌie, e si toolea taꞌau i henuesala.

² Na a Satan e malaahongana hunie hai aawalai hei dinge, na e kaꞌa hikana nga mei ngeulaa aana maholona, oto ko hiolo.

³ Oto a Satan ko teꞌuri hunie, “Mala o ko neꞌie Kalena God toꞌohuu, o ke unue ho heu ie ke neꞌi bred.”

⁴ Taꞌe a Jisas e aalamie mola uuri, “Mo Uusu-uusu Maaꞌi e unue uuri, Iinoni e saꞌa mauri ike mola aani bred hahaiteli.” Diutronomi 8:3

⁵ Oto a Satan ko heꞌi toolea loꞌu taꞌau, na ko tolana haataꞌi lau-leu oto aana ahutana mo aalahanga aana walumalau hunie.

⁶ Oto a Satan ko heꞌi teꞌuri loꞌu hunie, “Nou sai niie ahutana mo aalahanga ie namue peꞌie manikuluhaꞌani hunie o ke paine haahiꞌi, aana niilana e lae oto hunieu uri ineu ne ke si niiꞌi hunie taꞌena nga iini i sulie saeku.

⁷ Oto mala uri o kei pouruuru ni haꞌamaꞌunge aaku na o kei palo-paloau, nge ne kei niie ahutana mo ola ienini namue.”

⁸ Oto a Jisas ko aalamie loꞌu uuri, “Mo Uusu-uusu Maaꞌi e unue uuri, Omu ke palo-paloa mola taꞌe a God Aalaha iꞌomu, na omu ke asu mola nana taꞌe ingeie haliꞌite.” Diutronomi 6:13

⁹ Oto a Satan ko heꞌi toolea loꞌu a Jisas taꞌau i Jerusalem, na ko lai haꞌa-uuresie oto taꞌau i lengine ho susumaa aana Nume Maaꞌi Peine, ko si teꞌuri loꞌu hunie, “Mala o ko neꞌie Kalena God toꞌohuu, o ke toliꞌaasiꞌo uure i lengi i leu hunie o ke teke hao i aano.

¹⁰ Aana mo Uusu-uusu Maaꞌi e unue uuri, A God kei uusungeꞌinie mo ensel ingeie huni lio i suli diana aamu.

¹¹ Kire kei talaꞌahuaꞌo aana nimada mwaanie aeꞌaemu e hite aana nga ho heu.” Sam 91:11-12

¹² Oto a Jisas ko aalamie loꞌu a Satan ko teꞌuri, “Taꞌe mo Uusu-uusu Maaꞌi e unue noꞌone uuri, Omu ke suꞌuri oohongie a God Aalaha iꞌomu.” Diutronomi 6:16

¹³ Oto maholo a Satan e malaahongana a Jisas aana mo tala ngeena mango, nge e si lae mwaanie a Jisas, ko lai maaꞌoohie nga maholo aaopa huni malaahongana loꞌu.

A Jisas E Aehotaa Asunge Ingeie Aana Poꞌo Ni Henue I Kalili

¹⁴ A Jisas e aalihoꞌi loꞌu hunie poꞌo ni henue i Kalili, na e honu oto aana nanamanga aana Liꞌoa Maaꞌi. Oto tarohaꞌana e si taro i sulie ahutana mo henue aana poꞌo ni henuena.

¹⁵ Na a Jisas e aehota haꞌa-haꞌa-uusuli i laona mo nume ni palo-palo na ahutana mwala kire ko meni lahea.

Mwala Ni Nasaret Kaꞌa Sare Rongo Hunie A Jisas

¹⁶ Oto a Jisas e aalihoꞌi loꞌu i Nasaret, huilume nge e paine taꞌe aana. Oto aana Dinge Maaꞌi Mo Jiu, e lai sili weu i nume ni palo-palo ikire oto mala ko lae-lae tarau, na e uure i lengi huni saaie mo Uusu-uusu Maaꞌi.

¹⁷ Oto kire ko niie uusu-uusu hio-hio a Propet Aesaea hunie, na ko tahanie oto aana leu nge e uusue uuri,

¹⁸ Liꞌoa Maaꞌi a God oto peꞌieu, aena aana e lio hilisieu huni tarohaꞌinie Tataroha Diana hunie mo iinoni meitale. E uusungeꞌinieu huni tarohaꞌinie uri mo iini kire hoꞌosire i nume ni hoꞌo uri kire ke iiꞌo luhetaꞌi oto, na huni haꞌarongoa mo ulu uri kire ke lio loꞌu, Aesaea 61:1 na huni unue hunie mo iini kire iiꞌo i mamalutana mwala e sai haꞌamweꞌu-mweꞌu uri kire ke iiꞌo luhetaꞌi loꞌu, Aesaea 58:6

¹⁹ na huni tola tahangaꞌinie uri e hule oto aana maholo a God kei peꞌie mwala ingeie. Aesaea 61:2

²⁰ Oto a Jisas e si lulungie uusu-uusu hio-hio, ko niie hunie iini ko hei raretaꞌi aana nume ni palo-palo ngeena, na ko iiꞌo oto i aano huni haꞌa-uusuli. Maholona oto ahutana mwala i laona nume ni palo-palo ngeena kire ko si meni lio hahuroto oto aana.

²¹ Oto a Jisas ko aehota ere-ere hunie mwala e loko ngeena na ko teꞌuri, “Mei wala aana mo Uusu-uusu Maaꞌi nge omu si kele rongoa saailana e lae namiu ngeena, ko oa oto huniꞌomu siꞌiri.”

²² Oto ahutana mwala ngeena kire ko si meni lahea oto peꞌi pangataꞌinilana mo eehuꞌi wala nge ko unuꞌine, taꞌe kire ko unue loꞌu uuri, “A mwane ngeena, ingeie kalena Josep mola ni ngeena.”

²³ Oto a Jisas ko teꞌuri hunire, “Nou saie mola karaꞌinie omu kei unue mei wala ni aalahuunge ngeena hunieu uuri, ‘Mwane kure-kure, o ke haꞌa-uuriꞌo kaꞌu.’ Aana omu ko loꞌongaꞌinie mola uri, e lae otoi diana uri mo huꞌi-huꞌite nge omu rongoa nou esuiꞌi keꞌu hai Kapaneam, ne ke asuiꞌi loꞌu mei leu.

²⁴ Taꞌe no ko unue oto huniꞌomu uri mwala aana tohungei henue nga propet, e aasa oto hunie kire ke haꞌamaꞌu aana wa kire ke rongo hunie.

²⁵ Nga taa no ko unue ie e toꞌohuu. Aana maholo pongine a Propet Elaeja, mo nao keni hunge kire oꞌoꞌo i Israel. Aana maholona e kaꞌa nemo ike hunie e oolu helisi peꞌie e oono waro-waro, na hiolonga paine e toolea ahutana hanue.

²⁶ Taꞌe hule aana uusungeꞌinilana Elaeja e kaꞌa lae ike i saana nga taꞌa-taꞌa iini aada. Uusungeꞌinilana e lae mola huni peꞌie mei nao keni aana huilume mo puꞌo wau i Serepat aana poꞌo ni henue i Saedon.

²⁷ Na aana maholo pongine a Propet Elaesa mwala hunge ni Israel kire toꞌo aana maelaa ni osa, taꞌe e kaꞌa haꞌa-uurie ike nga iini aada. Taꞌa-taꞌa iini e haꞌa-uurie oto a Neman, mwane aana aalahanga mo puꞌo i Siria.”

²⁸ Oto maholo mwala i laona nume ni palo-palo ngeena kire rongoa walu ola ienini, kire ko si tohungei saewasu.

²⁹ Oto kire tauleꞌi, kire ko oohea oto taꞌau i lengine tolana uuwo nge hanue ikire e iiꞌo aana, aena aana kire sasare pwelusie i kere-kerena maoꞌi aana leu e aasa.

³⁰ Taꞌe maholo kire hule aana leune, a Jisas e liu mola i matolada, e si lae mwaanire.

A Jisas E Haꞌa-uurie Mwane Liꞌoa Aaela E Hite Aana

³¹ Oto a Jisas e si lae hunie huilume i Kapaneam aana poꞌo ni henue i Kalili. Na aana Dinge Maaꞌi Mo Jiu e si haꞌa-uusulie mwala.

³² Ahutana mwala ko tohungei pangataꞌinie haꞌa-uusulinge ingeie, aana ko haꞌa-uusuli aana nanamanga.

³³ Na nga mwane liꞌoa aaela aana ingeie noꞌone wau i laona nume ni palo-palo aana maholona. A mwaena ko toolea oto aawaranga paine na ko unue uuri,

³⁴ “!Aaia! !Jisas ni Nasaret! ?O kei ue emeelu loꞌu eena? ?Ohe o lae oto mai huni waeliꞌemeelu ni ngeena? Ineu nou saiꞌo mola. Iꞌoe iini maaꞌi a God.”

³⁵ Oto a Jisas ko si ere aana liꞌoa aaela ngeena ko teꞌuri, “O ke rohu oto, na o ke lae mwaanie a mwane ngeena.” Oto liꞌoa aaela ngeena e kaꞌa waelie loꞌu a mwaena, taꞌe e si reputeꞌinie mola hai aano i matolana mwala na ko iisitaa oto mwaanie.

³⁶ Ahutana mwala ko si meni pangataꞌi na kire ko ere hailiu oto i matolada uuri, “?Nga mei haꞌa-uusulinge uri taa ni ienini? Aana a mwane ie e toꞌo aana nanamanga huni ere aana mo liꞌoa aaela peꞌie mei wala e saka, oto kire iisitaa oto.”

³⁷ Oto tataroha aana Jisas ko si tatangasie oto ahutana poꞌo ni henuena.

A Jisas E Haꞌa-uurie Mwala Hunge

³⁸ Oto a Jisas e uure mwaanie nume ni palo-palo mo Jiu ko si lai sili i nume a Saemon. Keni hungaona Saemon ko tohungei mataꞌi oto hiitoꞌo, oto mwala ko aitanaie Jisas uri ke peꞌie.

³⁹ Oto e lae wau i uure i sulie tahe a huꞌena, ko si ere aana mataꞌi ngeena uri ke lae mwaanie. Mataꞌi ngeena e lae oto mwaanie a huꞌena, na e tolana taꞌelaꞌi, na ko raretaꞌinire oto.

⁴⁰ Oto aana maholo ko seulehi oto, mwala e toꞌo aana mo iini ko mweri aani maelaa hai aaopaꞌi kire ko toolera oto mai saana a Jisas. Na e hele i sapeda aana nimana, na ko haꞌa-uurire oto.

⁴¹ Mo iini hunge mo liꞌoa aaela e iisitaa noꞌone mwaanire, na kire ko aawara uuri, “!Iꞌoe oto Kalena God!” Taꞌe a Jisas e ere aada mwaanie uri kire heꞌi unue loꞌu nga mei wala, aana kire saie uri ingeie ni oto a Kraes.

A Jisas E Laeliwala I Laona Mo Nume Ni Palo-palo Mo Jiu

⁴² Oto e dangi hoꞌowa, a Jisas e uure mwaanie huilumena ko si lae huni iiꞌo maraana aana nga leu, taꞌe mwala ko loꞌohie loꞌu mola. Maholo kire lio oodoie, oto kire ko sare uure honosie uri mwaanie e heꞌi lae loꞌu mwaanire.

⁴³ Taꞌe a Jisas e teꞌuri hunire, “Ne kei lae peꞌi laeliwala noꞌone aana Tataroha Diana aana Aalahanga God nana ngaeta mo henue, aena aana leune mone a God e uusungeꞌinieu mei.”

⁴⁴ Oto a Jisas e si lae peꞌi laeliwala i laona ahutana mo nume ni palo-palo mo Jiu ahusie oto ahutana hanue i Jiudia.