Kolosi 2 - Tataroha Diana

¹ Nou saetoꞌo aana uri omu ke manataꞌinie uri no ko tohungei esu oto hiitoꞌo huni peꞌiꞌomu, na huni peꞌie noꞌone mo iinoni hiiwalaimoli wau aana huilume karaꞌiniꞌomu i Leodisia, na loꞌu ahutana mo iinoni a God nge hule aana nou kaꞌa oodoire ue.

² No ko esu urine huni haꞌadodoa saemiu, na hunie omu ke mani manata diana huniꞌomu heiliu. Saeku uri omu ke manataꞌinie taꞌingelu tohungana saenanaunge, na omu manataꞌinie taane mala uri omu ko sai diana aana a Kraes. Ingeie oto aahuꞌine mei saehaahinge a God nge e iiꞌo mumuni keꞌu holaꞌinaꞌo.

³ Na taꞌe a Kraes mola ni e sai tahanie saeka hunie kie ke lio saie ahutana mo saenanaunge a God nge kire oꞌoꞌo mumuni keꞌu ngeena.

⁴ No ko ere urine huniꞌomu, mwaanie uri nga iini e haꞌatakaloꞌomu aani eeronga, maꞌalana uri ke rongo kohi loꞌu uri taa.

⁵ Aana maꞌalana nou kaꞌa iiꞌo ike peꞌiꞌomu aani sape, taꞌe ineu taane peꞌiꞌomu aani liꞌoa, na no ko ilenimwaꞌe huni leesie iiꞌolamiu e diana na hiiwalaimolinge iꞌomu e aꞌailaꞌa taane aana a Kraes.

A Kraes E Sai Peꞌikie Aana E Paine Oto Liutaa

⁶ Oto aana omu toolea a Kraes Jisas mala Aalaha iꞌomu, omu ke tola oto i sulie.

⁷ Omu ke iiꞌo susu oto i lalo aana Kraes mala nga ai imi-imine e susu i aano. Na hiiwalaimolinge iꞌomu ke susu na ke aatosara loꞌu aana mo ola nge haꞌa-uusulilemiu e lae aani, na omu ke paa-paalahea God taraureꞌi suli maholo.

⁸ Omu ke lio talamiu noꞌone mwaanie nga iini e haꞌatakaloꞌomu aana mo haꞌa-uusulinge eero-eero na mo loꞌongaꞌinge ni iinoni mola. Aana maꞌalana mo loꞌongaꞌinge mala ngeena ke rongo ni saenanau oto uri taa, taꞌe kire kaꞌa uure ike mai mwaanie a Kraes, taꞌe mo ola mola aana nanamanga ni welumalau.

⁹ Na kie saie uri a Kraes e diana liutaa aana taꞌena nga ola ni welumalau, aana ahutana mau-meuringe a God e iiꞌo i lalo aana a Kraes maholo e lae mai neꞌi iinoni mala ikie.

¹⁰ Na aana omu lado oto peꞌie a Kraes, nga mei ola e kaꞌa aiꞌaa ike mwaanie maurihaꞌamiu. Aana ingeie oto e aalaha haahie ahutana mo aalaha na mo ensel na mo aakalo na taꞌena nga liꞌoa nanama taꞌau i Lengi na mai aano.

¹¹ Na loꞌu aana omu lado oto peꞌie a Kraes, omu toolea oto taungei torihesiꞌonga aaopa huni haataꞌinie uri iꞌomu oto mo iinoni a God. Mala torihesiꞌonga mo Jiu ko taꞌaasie nga aapa mwaanie sapena iinoni, nge urine noꞌone a Kraes e tori aasie tolahai ola ni oorahaꞌaa mwaaniꞌomu. Na torihesiꞌonga e asuie huniꞌomu ngeena, e kaꞌa ola ike aani ninimei iinoni, taꞌe ola aana maelana a Kraes maraana e asuie hunie omu ke iiꞌo luhetaꞌi mwaanie nanamanga aana oorahaꞌaa.

¹² Oto maholo loto maaꞌilemiu e lae, e urihana a God e haitolingeꞌiniꞌomu oto peꞌie a Kraes, na e taꞌelaꞌiniꞌomu oto loꞌu peꞌie noꞌone hunie mauringe haalu. A God e si esuie urine i tehulaꞌana hiiwalaimolinge iꞌomu aana nanamanga paine ingeie nge e taꞌea a Kraes mwaanie maenga.

¹³ Holaꞌinaꞌo e urihana uri omu mae oto mola i tehulaꞌana mo takalonga iꞌomu, na aena aana mo loꞌongaꞌinge aaela mo puꞌo ko oꞌoꞌo aamiu. Taꞌe a God e da omu ke mauri eelihoꞌi loꞌu peꞌie a Kraes, na e saeꞌaasie oto mo oorahaꞌaa ikie mwaanikie.

¹⁴ A God e usuri aasie oto mo uusu-uusu aana mo roroꞌanga ikie nge leilaka ko lae-lae haahiꞌi i sulie kie mani heitohea mo Haꞌatolanga a Mosis. E tohungei haꞌamangoa oto uusu-uusu ngeena aana maelana a Jisas i lengine poꞌu-poꞌu.

¹⁵ Oto urine a God e taꞌaasie nanamanga mwaanie mo liꞌoa aaela nge kire ko aalaha haahie walumalau. Iau, maelana Kraes e tohungei aꞌailaꞌasire oto, na ko haꞌamasara aana e haataꞌinie hunie walumalau uri ikire mo iini mwaakule mola.

Lulu I Sulie Mola A Kraes, Na Mo Haꞌatolanga Ni Iinoni Suꞌuri

¹⁶ Oto aena aana a Kraes e usuri aasie oto mo roroꞌanga ikie i sulie mo Haꞌatolanga a Mosis, mwaanie omu rorongo hunie mo iini ko sare unue uri omu kaꞌa iiꞌo maaꞌi ike aena aana nga moi taa omu ko ngeu-ngeuꞌi, wa omu ko inu-inuhiꞌi. Na mwaanie omu aapwa-aapwasu loꞌu noꞌone aana mo iini nge ko sare ere aaelasiꞌomu aana omu kaꞌa dau ike mala ikire i sulie mo houlaa maaꞌi i suli helisi, wa mo ngeuhe maaꞌi suli waro-waro, wa mo dinge maaꞌi suli wiki.

¹⁷ Aana walu ola poꞌoi sinaha ngeena, ikire mo nunui ola mola aana iini toꞌohuu kei lae mai ni ngeena. Na maholo iini toꞌohuu kei hule, nge kolu ke si toliꞌaasie mola mo nunui ola ngeena. Na a Kraes oto iini toꞌohuu, na e hule oto.

¹⁸ Na mwaanie omu toitoliꞌaasie nga iini ke haꞌapweuꞌomu aana mei wala uuri, “Omu saꞌa hele waaite ike taꞌau i Lengi, aena aana omu kaꞌa haꞌaletehie sapemiu peꞌi tola i sulilana mo haꞌatolanga e aasa.” Mo iinoni urine ko unue noꞌone uri kire leesie mo maꞌahu-polenga nge ko haataꞌinie uri e diana hunie mwala ke palo-paloa mo ensel. Taꞌe omu ke suꞌuri rongo hunire. Kire ko lupweꞌi haꞌamwai-mweiꞌara maraada i maana mwala, taꞌe kire ko toohaꞌinire mola aana mo neꞌisaenga ni welumalau nge hule aana kire kaꞌa toꞌohuu ike.

¹⁹ Kire kaꞌa hele maꞌutaꞌa ike aana a Kraes. Ingeie oto pwaune soihaadaꞌinge nge ko lio i sulie soihaadaꞌinge na ko hele lokoa ahutana mo sasarai ola aana hunie ke mauri oto mala a God e saetoꞌo aana.

²⁰ Omu mae tararuru oto peꞌie a Kraes na luhesilemiu e lae oto mwaanie taꞌena nga nanamanga aana walumalau. ?Oto e ue nge omu ko saronai lae-lae ue i sulie mo haꞌatolanga aana walumalau? ?E ue omu ko saronai hele maꞌutaꞌa ue aana mo haꞌatolanga mala mo iini ienini?

²¹ “Mwaanie omu hele-hele aana mo ola ienini, na mwaanie omu ngeu-ngeue mo ola ngeena, na mwaanie omu kopi-kopi aana mo ola waune.”

²² Taꞌe mo haꞌatolanga ngeena, mo iinoni kire asuiꞌi maraada i sulie mo ola aiꞌeiꞌaa aana walumalau ie ni ngeena.

²³ Saꞌa mola ngaeta mo iini ko loꞌo-loꞌongaꞌinie uri mo haꞌatolanga urine ikire oto tala ni saenanaunge toꞌohuu aena aana mwala nge ko deu i suliꞌi kire lio mala kire ko manata diana hunie a God, na uri kire ko haꞌamwai-mweiꞌara, na uri kire ko haꞌasapesaluꞌaa sapeda hunie kire ke iiꞌo maaꞌi. Taꞌe haꞌike, i sulie mo haꞌatolanga urine kire saꞌa roroꞌa ni haꞌa-oodohie ike mo saehanalinge mo iinoni wa mo heri-huninge ikire.