Kalesia 6 - Tataroha Diana

Kie Ke Peꞌikie Hai Liu

¹ Maeni eesiku maaꞌi, mala uri nga iini eemiu ko deu huꞌisie nga mei oorahaꞌaa, nge mo iini omu ko lulu i sulie tolahana Liꞌoa Maaꞌi, omu ke haꞌa-oodohie aani saemamae. Na omu ke lio talamiu noꞌone mwaanie uri iꞌomu maraamiu omu deu huꞌisie loꞌu mola mei olana.

² Omu ke peꞌiꞌomu heiliu aana walu ola ko hite-hite aamiu, aana urine nge omu ko tola i sulie haꞌatolanga a Kraes toꞌohuu eena.

³ Na mala uri nga iini ko loꞌongaꞌinie uri ingeie oto e paine liutaa, nge ko talei eero-eeroa mola maraana na hule aana ingeie iinoni mwaakule noꞌone mola.

⁴ Taꞌe nga iini ke lei-leie mola tolahana maraana. Mala uri tolahana ko diana aana asunge na iiꞌonga ingeie, nge ke sae-saemango mola haahie maraana, na e saꞌa loꞌongaꞌi oto hiitoꞌo ike aana haꞌasadangaꞌinilana tolahana ngaeta iinoni.

⁵ Aana nga iini ni e lio-lio i sulie oto maurihaꞌana maraana hunie a God.

⁶ Taꞌena nga iini haꞌa-uusulilana ko lae aana walana a God, nge ke waaie haꞌa-uusuli ingeie aana nga moi taa diana nge e toꞌo aani.

⁷ Na mwaanie omu loꞌo-loꞌongaꞌi takalo i sulie leinge a God. Nga iini e saꞌa roroꞌa pweloa ike a God wa ke eeroa haahie nga mei ola e asuie. Iinoni kei soꞌokonie mola nga moi taa e hasiꞌi.

⁸ Mala uri iinoni ko hesie mola mo loꞌongaꞌinge aaela ingeie, nge kei soꞌokonie oto tolaha ni maenga. Taꞌe mala uri ko hesie tolaha ni Liꞌoa, nge kei soꞌokonie oto maurihe huu.

⁹ Oto kie ke suꞌuri poosuaꞌa aana asuilana mo ola diana, aana kie kei hele aana soꞌokoninge aana maurihe huu taane aana maholo hunie, mala uri kie kaꞌa lalawasie ike.

¹⁰ Aena urine, maholo kie ko leesie uri e malisine kie ke peꞌie nga iini, nge kie ke peꞌie oto. Na peꞌinge ikie ke lae oto liutaa hunie mo iini kie mani hiiwalaimoli aana Kraes.

Haꞌapasunge Ooreta Na Mei Wala Ni Saediananga

¹¹ Leesie kaꞌu mo uusu-uusu peine no ko esuiꞌi ie aana no ko uusu-uusu huniꞌomu oto aana kiꞌiku maraaku.

¹² Mwala nge kire ko deu rarahiꞌomu hunie torihesiꞌonga ngeena, kire ko deu mola hunie mo Jiu ke saetoꞌo aada ni ngeena. Na loꞌu kire sereꞌinie mwala ke taungeꞌinire haahie hiiwalaimolinge uri maelana a Jisas Kraes i lengine poꞌu-poꞌu mola ni e sai haꞌa-uurikie.

¹³ Maꞌalana mo iini nge kire hele aana oto torihesiꞌonga, na ikire maraada kire kaꞌa hele i sulie ike mo Haꞌatolanga. Kire ko sare da mola uri omu ke hele aana torihesiꞌonga hunie kire ke ere toohaꞌinire uri kire dau suꞌuiꞌomu hunie.

¹⁴ Taꞌe ineu maraaku, nou kaꞌa sai toohaꞌinieu ike haahie mo ola urine. Taꞌa-taꞌa leu nou sai toohaꞌinieu haahie oto poꞌu-poꞌu a Jisas Kraes, Aalaha ikie. Aena aana nga taa nge a Jisas e asuie aana maelana i lengine poꞌu-poꞌu, nge walumalau ienini e pwani mae oto aana neꞌisaenga ineu, na e urihana ineu noꞌone nou pweni mae oto aana neꞌisaenga mo iinoni ni welumalau.

¹⁵ Oto e kaꞌa tohungei roroꞌa ike uri aana iinoni e torihesiꞌo wa e kaꞌa torihesiꞌo. Taꞌa-taꞌa leu e roroꞌa oto uri a God ke haꞌahaalukie hunie kie ke neꞌi iinoni haalu.

¹⁶ Hanuelamanga na aamasinge a God ke iiꞌo peꞌiꞌomu mo iini omu ko lulu i sulie haꞌatolanga ienini i laona maurihaꞌamiu, na iꞌomu oto mo tohungei iinoni ingeie.

¹⁷ Oto uure siꞌiri pwau weu, mwaanie nga iini e heꞌi kotahieu loꞌu haahie leune, aena aana mo reo i sapeku e haataꞌinie oto uri ineu koni-konihe a Jisas toꞌohuu.

¹⁸ Maeni eesiku maaꞌi, no ko eitanaie Aalaha ikie a Jisas Kraes uri hahuꞌana manata-diananga ingeie ke iiꞌo peꞌiꞌomu. Na ke urine oto.