2 Timoti 1 - Tataroha Diana

Mei Wala Ni Saediananga Hunie Mwane Saanau A Timoti

¹ Saediananga mwaanieu a Pol, iini nge a God maraana e lio hilisieu uri hunie ne ke neꞌi hurulaꞌaa a Kraes Jisas, hunie ne ke tarohaꞌinie maurihe huu e haiholotaꞌinie hunie mo iini kire lado peꞌie Kalena, a Kraes Jisas.

² Na no ko uusu-uusu oto ie huniꞌo kaleku Timoti, aana iꞌoe oto mwela maaꞌi ineu. No ko eitanaie a God Aamaka na a Kraes Jisas Aalaha ikie uri hahuꞌana manata-diananga, na aamasinge, na hanuelamanga ingeie ke iiꞌo peꞌiꞌo.

O Ke Asu Aꞌailaꞌa Aana Nanamanga A Liꞌoa Maaꞌi Huni Houleꞌinie a Jisas

³ No ko aarengaꞌi talamu susue rodo na aatowaa, na no ko tohungei sae-saemango haahiꞌo suli maholo no ko aarea God ineu nge no ko esu nana peꞌie mei manatanga rereꞌa oto noꞌone mala mo weuweku kire auꞌesuie.

⁴ No ko aama-aamasitoꞌo taane aana maholo kure oopa nge o ngarasieu, oto saeku uri ne ke leesiꞌo kaꞌu loꞌu hunie ne ke saemango.

⁵ No ko aamasitoꞌo noꞌone aana mei hiiwalaimolinge toꞌohuu nge a nikemu a Iunis na a pwaa-pwaamu a Lois kire mani toꞌo aana, na nou saie uri iꞌoe noꞌone o toꞌo aana.

⁶ Oto no ko eitanaiꞌo uri o ke tohungei esu diana peꞌie mei nanamanga nge a God e niie huniꞌo aana maholo nou hele i pweumu. O ke asu diana aana mala o ko terehie dunge hunie ke waru diana, na mwaanie o toliꞌaasie e mwaꞌa mola.

⁷ Aana maꞌunge e kaꞌa uure ike mwaanie Liꞌoa Maaꞌi nge a God e niie mai naka. Taꞌe Liꞌoa Maaꞌi ko niie nanamanga hunie kie ke adona asunge a God, na hunie kie ke manata diana hunie mwala, na hunie kie ke kinetaꞌinie tolahaka maraaka mwaanie kie dau aaela.

⁸ Oto aena ngeena o ke suꞌuri masa ni houleꞌinie a Jisas Kraes oodoie mwala. Na o ke suꞌuri masa honosieu i sulie uri nou iiꞌo i nume ni hoꞌo haahie asunge nana. Taꞌe o ke hele maꞌutaꞌa mola aana nanamanga a God, na o ke mwaꞌe-mwaꞌe mola ni sapesalu aana o ko tarohaꞌinie Tataroha Diana a Jisas mala ineu.

⁹ Aana a God e haꞌa-uurikie na e lio hilisikie oto hunie kie ke neꞌi iinoni maaꞌi ingeie. E kaꞌa asuie ike mola leune aena aana kie malisi wa uri kie asuie nga mei ola diana adongana. !Haꞌike! Taꞌe e oalaꞌinie urine mola aana e tohungei sare haꞌadianaꞌakie. Uure oto wau i naꞌo na haꞌaholanga haꞌike ue, a God e oalaꞌinie oto uri a Jisas Kraes kei haꞌadianaꞌakie oto urine.

¹⁰ Oto maholo ie, a Jisas Kraes e hule oto huni haataꞌinie aamasinge a God hunikie. A Haꞌa-uuritaka, a Jisas Kraes e haꞌamangoa oto maenga, na e haataꞌinie oto Tataroha Diana hunikie, nge ko haꞌasinelie saeka, na ko haataꞌinie tala huni toꞌo aana maurihe nge e saꞌa heꞌi mango loꞌu.

¹¹ A God e lio hilisieu uri hunie ne ke tarohaꞌinie Tataroha Diana ngeena, na ne ke neꞌi hurulaꞌaa, na hunie ne ke haꞌa-uusulie mwala.

¹² Aena urinena nge no ko sapesalu siꞌiri ie. Taꞌe nou saꞌa roroꞌa ni masa ike, aena aana nou manataꞌinie a Jisas, iini nge nou norutoꞌo aana. Na nou saie uri ingeie e sai kinetaꞌinie walu ola nou neꞌiꞌi i nimana huni lio i suliꞌi, na kei kinetaꞌi diana aani lai hule aana dinge ooreta.

¹³ Oto o ke lae i sulie mo haꞌa-uusulinge toꞌohuu nge o rongoꞌi mwaanieu, na o ke haꞌa-aꞌailaꞌaa hiiwalaimolinge iꞌoe aana a Jisas Kraes, na o ke haimaanie manata-diananga ingeie hunie mwala.

¹⁴ Aana a God e niie oto walaimolinge diana i sulie a Jisas ngeena namue. Oto o ke lio i suli diana aana, na a Liꞌoa Maaꞌi i lalo aaka kei peꞌiꞌo.

¹⁵ O saie mola uri ahutana mo eesikaelu aana hiiwalaimolinge aana poꞌo ni henue i Esia nge o iiꞌo aana ngeena, kire aatopuri eeku mola, hule aana a Pijelas na a Hemojenis ikirerue noꞌone.

¹⁶ Taꞌe a Onesiporas e kaꞌa toliꞌaasieu ike, na e tohungei peꞌi-peꞌieu tarau na e kaꞌa masa ike honosieu maꞌalana nou oꞌoꞌo i nume ni hoꞌo. Aena urine nge no ko aarea a Aalaha ke haꞌadianaꞌaa uluhe ingeie.

¹⁷ Aana maholo e lae mai hunie huilume paine i Rom, oto e tohungei loꞌohieu oto hiitoꞌo lai hule aana e lio oodoieu.

¹⁸ Na o saie taane noꞌone mola uri e peꞌi-peꞌieu tarau maholo nou oꞌoꞌo wau aana huilume i Epesas nge o iiꞌo aana ngeena. Oto no ko aarea a Aalaha hunie ke haꞌadianaꞌaa na ke aamasie a Onesiporas oto noꞌone urine aana dinge ooreta.