1 Korinit 16 - Tataroha Diana

O Ke Nii Suli Maholo Huni Peꞌie Kira Maitale

¹ Oto no ko sare haꞌarongoꞌomu mola aana niinge huni peꞌie mwala a God aana poꞌo ni henue i Jiudia. Omu ke asuie oto mola mala nou hatongaꞌinie hunie mo soihaadaꞌinge aana poꞌo ni henue i Kalesia.

² Ahutana mo Dinge Maaꞌi, omu ke mani niie niinge ngeena, nga iini na e nii-nii mola i sulie tari-olanga ingeie, na omu ke mani loo-loohaꞌinie mola i suli maholo, mwaanie omu loꞌo-loꞌohie loꞌu nga mo niinge aana maholo ne kei lae mai seemiu.

³ Oto maholo no ko lae mai hule i seemiu, na ni omu lio hilisie nga mo mwane huni toolea niinge iꞌomu taꞌau hunie i Jerusalem. Ineu ne ke si uusungeꞌinire taꞌau peꞌie mei toꞌoha ngeena, na ne ke uusue nga uusu-uusu huni haataꞌinie uri ikire mo mwane diana.

⁴ Na mala uri ko melisine ne ke lae noꞌone, nge ne kei hekusire taane taꞌau.

Ngaeta Mo Oalaꞌinge A Pol

⁵ Ne kei liu taane mai keliꞌomu aana maholo ne kei uure mwaanie poꞌo ni henue i Masedonia, aena aana nou loꞌongaꞌinie uri ne ke holaꞌi lae kaꞌu i Masedonia.

⁶ Ne kei kele iiꞌo tewa taane ohe peꞌiꞌomu lai hule i haꞌamangolana mo waro-waro aana wawai na iihiꞌure. Oto urine omu sai peꞌieu loꞌu huni lae taraꞌasi aana laenga ineu takoie leu nge ne kei lae loꞌu aana.

⁷ Aana nou kaꞌa sare maatoliꞌomu ike oto molana aena aana no ko tapaliu mola. Saeku uri ne ke kele iiꞌo tewa kaꞌu peꞌiꞌomu, mala uri Aalaha ko toliꞌaasie ke urine.

⁸ Taꞌe ne kei iiꞌo kaꞌu i leu i Epesas hule aana dinge Pentekos.

⁹ Aana kele maholo kohi huni deu i sulie nga mo ola diana hunge i leu ni oto ienini, maꞌalana uri nga mo iini hunge ko si uure honosieu taane.

¹⁰ Mala uri a Timoti ko hule i seemiu, omu ke lio i suli diana aana, aena aana ingeie ko esu noꞌone nana Aalaha ikie mala ineu.

¹¹ Nga iini eemiu ke suꞌuri mwaka aana, taꞌe omu ke peꞌi diana aana mola. A Timoti ko lae-lae noꞌone peꞌie ngaeta mo iini kire hiiwalaimoli aana a Jisas, na no ko tohungei maaꞌoohire uri kire ke hule mai seeku. Oto saeku uri omu ke peꞌie laenga ikire ngeena hunie kire ke aalihoꞌi mei seeku.

¹² Aasikaelu maaꞌi, a Apolos, no ko unu-unue taane hunie uri ke lae kaꞌu peꞌie ngaeta mo iini hiiwalaimoli huni keliꞌomu, taꞌe e kaꞌa neꞌisae ike ue ni lae wau aana kele maholo ienini. Mala ko toto diana hunie aana nga maholo, nge ke si lae taane wau.

Mei Wala Ooreta A Pol

¹³ Omu ke lio talamiu na omu ke hiiwalaimoli ngaingedi. Omu ke suꞌuri meꞌu, taꞌe omu ke uure maꞌutaꞌa.

¹⁴ Taꞌena nga ola omu ko euꞌesuiꞌi, omu ke auꞌesuiꞌi oto aani manata-diananga haliꞌite.

¹⁵ Oto maeni eesiku maaꞌi, omu saie taane a Stepanas na uluhe ni iinoni ingeie. Omu saie uri ikire oto eetana nga mwala kire hiiwalaimoli aana Jisas aana poꞌo ni henue iꞌomu wai Akaea, na kire toliꞌaasire maraada huni peꞌi-peꞌi aani esunge nana mo iini e hiiwalaimoli. No ko eitanaiꞌomu uri

¹⁶ omu ke lulu i sulie oto mo taungei naꞌohai iinoni urine, na taꞌena nga iini ko esu peꞌire.

¹⁷ No ko tohungei saemango oto hiitoꞌo haahie a Stepanas, na a Fotiunetas, na a Akaikas aana kire lae mai hule i seeku oolisiꞌomu.

¹⁸ Kire tohungei haꞌasaedianaꞌaau oto mala kire haꞌasaedianaꞌaꞌomu keꞌu holaꞌinaꞌo. Aena urine omu ke haꞌamaꞌu aana mwala urine.

¹⁹ Mo soihaadaꞌinge i leu aana poꞌo ni henue i Esia, kire ko niie saediananga ikire huniꞌomu. A Akuila na Prisila oto peꞌie mo iini ko rururu peꞌire tarau wau i nume ikirerue, kire ko niie mei wala ni saediananga huniꞌomu i lalo aana satana Aalaha

²⁰ peꞌie ahutana mo iini e hiiwalaimoli aana Jisas mai leu. Oto iꞌomu, saeku hunie omu ke mani hele kiꞌi heiliu mala mo heꞌimalahune maaꞌi.

²¹ Ineu a Pol ni no ko uusue mei wala ni saediananga ooreta ienini huniꞌomu oto aana kiꞌi-kiꞌiku maraaku.

²² Taꞌena nga iini nge e kaꞌa manata diana hunie a Aalaha ikie a Jisas, nge haꞌaloinge a God kei hite aana. No ko eitanaie a Aalaha ikie a Jisas hunie ke lae mai lau-leu,

²³ na uri hahuꞌana manata-diananga ingeie ke iiꞌo peꞌiꞌomu.

²⁴ Manata-diananga ineu ke iiꞌo peꞌie ahutemiu i lalo aana Kraes Jisas.