ROM MIKA POL KA SIITI KENIIÑ 10 - NITI GONTU N.T. (BSI)

¹ Anubarmii atañ, ngiika ahha heniiñ ho Pinii mika mohlupa ka kuniiñ hii hiila siike mohlumi lyangur dokoda hiila.

² Ngo mohlupa haki bidu niimpalukoda mohlu Pinii pa miichi hiila hendo, hojalo hiikahii chimbii dola miima.

³ Niimpalukoda, hang chimapa Pinii koka denki ahniiñmi, ho atohpa miiri talyi hiilaka meniiñsi, mohlu Pinii ka denki ho tiilii siima.

⁴ Niimpalukoda Kristo dapo ka kami jaku, hopa hujalopa henje talyi hiimi lupya bikiñdo.

Sangopyako si Miilañ Rupa

⁵ Mose ketii miyu huna denki pa miidonii niihna dapo ho ketola donii hii hiilo sankiñdo.

⁶ Hojalo denki henje hoka doniibo ludo, Niika ahha ho luyo, “Hu dariiganda ho chakiñdo?” (hiika hii, Kristo mi akkañ ho togii dupa hiila)

⁷ malo “Hu takhubiidañ ho tokiñ do?” (hiika hii, Kristo mi shiiniiñ hokii seri duku pa).

⁸ Hojalo nii hiila si ludo? Aguñ hii nunuka aruñho doke, nunuka nyachuho ho nunuka ahha ho (hiika hii, henje ka aguñ nii mina ngunu tonsḛrkhenyo donii);

⁹ niimpalukoda, nunu matiirḛ nunuka nyachulo khako dokoda Jisu Kristo Attoh ho nunuka ahha ho henje dokoda Pinii mohmi shiinii hokii turdo miibiine, nunu lyangur kokiñdo.

¹⁰ Niimpalukoda miyu mohka ahha lo henje du ho hiilo lupya kodu, ho mo mohka nyachu lo khakodu ho hopa lyangur kodu.

¹¹ Piniiaguñ si ludo, “Kone mitrḛ huna mohmi henje donii hiimi hiinyañ aba kema.”

¹² Niimpalukoda hiiko hang ponsa siima Jew la Grik nyi; Attoh ahiñsii hikha ruka Attoh ho mohka mingo mi bido hikha rumi huna mohmi gyodo nii.

¹³ Niimpalukoda, “koneabi huna Attoh ka armyañ mi gyodo nii lyangur kokiñdo.”

¹⁴ Hojalo niihtañpa miyuatañ mohmi gyokiñdo humina mohlu henje manii? Ho niihtañpa mohlu mohmi henje talyi humina mohlu ronge hetrḛ tapa manii? Ho niihtañpa tapa talyi mi tonsḛrkhenyonii nyima koda?

¹⁵ Ho niihtañpa miyuatañ tonsḛrkhenyo talyi nii dahepa mohlumi kiiniñ tama? Hiila ketola do, “Niihtañ kapyo hiika alih hii huna ayapuyu mi tonsḛrkhenyo donii!”

¹⁶ Hojalo mohlu hikha ayapuyu ka luniiñmi tama; hopa Aijaya ludo, “Attoh, hu henje nyado niihna mo ngunukokii tapa tiinii?”

¹⁷ Hopa henjehii ahdu tapa nii hokii, ho niihna tapa donii hiika hii Kristo mika tonsḛrkhenyo nii hokii.

¹⁸ Hojalo ngo takadu, mohlu tapa ma ehna? Jije mohlu tapatii; niimpalukoda “Mohluka luniiñ hikha kiiddiapiñ ho intii patii, ho mohluka aguñ atañ dohadolo ka dotḛr lyihepa.”

¹⁹ Hiira ngo taka du, Isrel tachiñ manepo? Kapyo pa Mose lune, “Ngo nunumi kariñdopa miichi hiika atañmi hutii na ganda kiimanii; piicha ganda agiñho ngo nunumi hadii dopa miichi.”

²⁰ Ho Aijaya hempḛr harola lutii, “Ngo mepa kotii hiilo huna ngiimi memanii; Ngo attohmi kakiñ siitii hiika atañmi huna ngiimi kumanii.”

²¹ Hojalo Isrel atañpa mo lutii, “Hikha allo loteje ngo ngiika alah mi lyuliñ tola atiibitii luniiñ tamaniipa ho chekhonii miyu atañpa.”