MIINIIÑ 28 - NITI GONTU N.T. (BSI)

Malta ho

¹ Ngunu hargii kula la, ho ngunu chinto ku siilokiiddi ka armyañ Malta hiila.

² Ho hoka dunii atañ dumiñhokii mitrḛ kapuñ pongeyapa aroh-ayatii, niimpalukoda mohlu yamu tige lala ho ngunumi kariikatañ, niimpalukoda miido huri ho lakhiine.

³ Pol panyi tonge mi lala la ho hiimi yamu ho aliitii, tabu sohe lyiliñtii gubu kopa ho mohka alah ho karke hatii.

⁴ Hoka miyu tabu mi mohka alah bila dopa kapa lala, mohlu kone anyañ lusu nyatii, “Hemmo sanii nyima siika miyu si miyu meniike. Siimie hoka shiisa nii hokii hargii siitii, ayakacho kanii hii mohmi sanke nenkiñma.”

⁵ Mo, hojalo, tabumi yamu ho pipa lotii ho hang heru matii.

⁶ Mohlu kalyatii, mohka pyari niimi kalyatii malo aluñpaka shiihi niimi; hojalo mohlu kalya yade yala la hang mohko ayamapa lyilyi nii, mohlu hengu ritii ho lusutii mo pinii ke hiila.

⁷ Siisi hiika ganda daka ariapii kiiddi atañ hii hiika siilokiiddi ka miyu akuñ jakiitii, Publius hiila armyañ, mo ngunumi kariikatañ ho sobomola ngunu agiñho allo lohiñhe piiluñsiile la mi.

⁸ Hiila lyihii Publius ka aba achihla ho iichañ ela lyihii; ho Pol mohko kahala ahtii ho kubitii, ho mohka alah mi mohko tencha lala mohmi miipyatii.

⁹ Ho siika drihsi hiila lyikele, siilokiiddi hoka miyu dunii atañ tiirḛ hukiina achih-ahe giitiinii ahgiitii tii ho miipya konyatii.

¹⁰ Mohlu abuje ahmiñayiñ ngunumi bihii; ho ngunu khori kukele, mohlu huluho ngunuka anna nii hemi aliibi.

Malta hokii Rom Lohe

¹¹ Piilo bariñhe dala la ngunu yasiejaji la khori hiikahii siilokiiddi ka doriipa lyine, Alejandria ka yasiejaji, Bupiñsiinii Anuabañ luniiñ agiñho.

¹² Sairakas ho ahchi, ngunu hiiko allo lohiñhe dutiihe.

¹³ Ho hiikohokii ngunu khoriku ho Rhegium ho ahchi; ho allo lohe dala la ahadalyi ka allyi heri, ho allo lohe yaho ngunu Puteoli ho ahchi.

¹⁴ Hiiko ngunu anubarmii atañmi kapa, ho ngunumi mohluka agiñho gyolii lokanuhe allo dudopa. Ho hiila ngunu Rom ho ahchi.

¹⁵ Ho hoka anubarmii atañ, mohlu ngunumi tapa lala, Appius ka Dukuñko kane adho hokii miilañ ahhii ho Hinge Chidii duko ngunumi kapa hapa ahhii. Mohlumi kapa lala Pol Pinii mi payapacho hiila luhii ho harori.

Rom ho

¹⁶ Ho ngunu Rom ho ahchi biikele, Pol mi atohpa dusu dopa bibii lyimi, dagur biinii ka agiñho mohmi dabii niipa.

¹⁷ Allo lohiñhe daku lala mo hoka Jew sangii gyagii niimi gyobii nyimi; ho mohlu ahkuñ kiile, mo mohlumi lutii, “Anubarmii atañ, ngo hang miigya masu miyu atañmi malo ngunuka aba-apa ka muju lujju mi, hojalo ngiimi pattiih tunko niipa Jerusalem hokiila Rom miyuatañ ko nembo bitii.

¹⁸ Mohlu ngiimi taka kula la, mohlu ngiimi apapa miiku, niimpalukoda hang lugo giimane ngiimi shiido pa halii dopa.

¹⁹ Hojalo Jew atañ chetii, ngiimi chechepa Kesar mi lyardo pa miitii, ngiiko hang ngiika ganda mi chekho la halii dopa lyimasii.

²⁰ Hopa siika piigo pa ngo niimi kapa talyi ludo pa lyine ho niimi lurii dopa, hojalo siikasi Isrel atañ paka hengi nanii giinii ngo siika dachañ ranyi mi giidopa lyine.”

²¹ Ho mohlu mohmi lutii, “Ngunu hang siiti kapama Judia hokii niika piigo mi, ho hang anubarmii so ahma luko hala malo hang ayamapa niimi lula.

²² Hojalo ngunu niiko hokii taka nando niika henju nii hiila; niimpalukoda siika dungunii tongemi ngunu chindo kapakohe chekho la lunyada.”

²³ Mohlu allo lohe mohpa kahe lala, mohlu mohka imi ko ahtii hempḛr taropa. Ho mo mohlumi drih mi lukotii aro hokiila alyiñ kamo lohe, Pinii ka raddeganda mi pyakotii ho mohlumi taliidopa yarkatii Jisu ka piigomi Mose ka dapo hokii tiirḛ ho nyibuhenii kokii tiirḛ.

²⁴ Ho tonge taliitii niihna mo lutiinii, tonge tajematii.

²⁵ Hopa, mohlu kone anyañ mi takho siila la, mohlu impe siitiiku, Pol hiila gonge lukele: Darii Yajiyallo ludiko lutii nunuka aba atañmi Aijaya nyibuhenii mi luta nala:

²⁶ Siika miyuatañ ko inge, ho luhe, Nunu tanii hii tasuda hojalo pema tachiñ nyama, ho nunu kanii hii kasuda hojalo pema kala nyama.

²⁷ Niimpalukoda siika miyu atañka ahha hii piicha nyado kuke, ho mohluka yaroo hii tana nanii aie dokuke, ho mohluka amee hii mipu nyado kuke; hiila makoda mohluka amee lo kala kendo, ho mohluka yaroo lo tage kendo, ho mohluka ahha ho tala kendo, ho ngiiko ahkur nyakiñne miipya kodupa.

²⁸ Hojalo nunu chinto hokoda siika Pinii ka sangopyako mi Midomiyu atañ ko kiiniñ bulyike: mohlu tage kendoke.

³⁰ Ho mo hiiko anyañ nyanye poteje datii mo atoh iho siibiidola, ho hikha rumi kariitii huna mohko ahtiinii,

³¹ Pinii ka raddeganda mi tonsḛrkhenyo la ho Attoh Jisu Kristo ka piigomi hikha tadopa ho hiinyañ mapa.