MIINIIÑ 18 - NITI GONTU N.T. (BSI)

Korint ho

¹ Siika hiiba ho mo Aten mi apatela ho Korint ho intii.

² Ho mo Jew kone Aquila mi kappatii, Pontus hokii, kamipa Italy hokii mohka mihie Priscila agiñho ahbotii, niimpalukoda Klaudius hikha Jew atañ lubiido Rom ganda hokii ingeku lutii. Ho mo mohlumi kadupa intii;

³ ho niimpalukoda mo kiiri miiniiñ ahiñtii hopa mo mohluka agiñho dubo montii, ho mohlu miigo miitii, niimpalukoda mohlu tabyo peniiñ kiiri miiniiñtii.

⁴ Ho mo cheriila lyitii sinagog ho dumoalo karmyañmi, ho Jew atañ la Grik atañmi lyartii.

⁵ Sailas la Timoti nyi Masedonia hokii ahchi biikiile, Pol tonsḛrkhenyo niimi chibiitii, Jew atañmi lukola Jisu ke Kristo hiila.

⁶ Ho mohlu chekhola ho mohmi ayamapa lubiido, mo mohka abitarii mi pisupidiñ siila la ho mohlumi lutii, “Nunuka ai mi nunu kosuke halii kokiñ siidonii! ngo lusa giima lyike ah. Siisi kiija ngo Midomiyu atañ ko inchi.”

⁷ Ho mo hiiko hokii inkula ho miyu koneka ude ho ahtii Titius Justus hiiniiñko, Pinii mika herii koneko; mohka ude sinagog ka aruñho dotii.

⁸ Krispas, sinagog daka sangiibo, Attoh mi henjetii, hikha mohka ude uru agiñho; ho abuje Korint miyuatañ Pol ka luniiñmi tala la henjetii ho baptisma latii.

⁹ Ho Attoh Pol mi lutii ayoh yohe mihukaniiñho, “Biiso yo, hojalo luto ho adumapa dayo;

¹⁰ niimpalukoda Ngo niika agiñho dake, ho miyu kone hetrḛ niimi ayamapa miikiñ make; niimpalukoda ngiikii abuje miyu siika citi so du.”

¹¹ Ho mo nyangela piilo barkhe dutii, Pinii ka aguñmi tonsḛrla mohluka punkoho.

¹² Hojalo Gallio Akaia ka govonor pa lyikele, Jew atañ tonge pa Pol mi pahatii ho mohmi gondu ude ho selii biitii,

¹³ lubiidola, “Siika miyu si miyu atañmi lurudo Pinii miya heriito dapo mi chekhola.”

¹⁴ Hojalo Pol mo ludupa miikele, Gallio lutii Jew atañmi, “si matiirḛ miigyala malo diigyalugya niika drih koda, ngo tiirḛ nunuka agiñho lubo monte ke, O Jew atañ;

¹⁵ hojalo siika drih si taka siila aguñ atañ, armyañ atañ ho nunuka attoh ka dapo ka piigo misu koda, nunu attoh ya hentiñ nyato; ngo chekho talyike siika drih atañmi ayakacho kadupa.”

¹⁶ Ho mo mohlumi gondu ude hokii nempa limbiido.

¹⁷ Ho mohlu miilañru Sostenes mi latutii, sinagog daka sangii bomi, ho mohmi hitii gondu ude aruñho. Hojalo Gallio siimi kagetage matii.

Antiok hoka Ahkur kuniiñ

¹⁸ Siika hiiba ho Pol abuje allo ho datii, ho anubarmii atañmi apatela ho Sairia ho khobotii, ho mohka agiñho Priscila la Aquila nyi miilañ. Kenkrea ho mo mohka adiñ mi chekotii, niimpalukoda mo hemmetii.

¹⁹ Ho mohlu Ipisia ho ahtii, ho mo mohlumi hiiko apatii; hojalo mo mohkontii sinagog ho intii ho Jew atañmi cheriitii.

²⁰ Mohlu mohmi iche abu kiiliñ dudo koda hiila lukele, mo ma lutii;

²¹ hojalo mohlumi ilepa miibii dola mo lutii, “Ngo nunuko ahkur talyike Pinii matiirḛ helyi milo,” ho mo Ipisia hokii khoritii.

²² Mo Kaesarea ho khochi bobiila, mo ayoh ho chala ho gyoliñkonii atañmi ayahelyi lutii, ho Antiok ho totii.

²³ Hiiko myodu iche lopa tela mo intiiku ho ganda ponge abi injola Gelesia la Phrygia mi impobiitii, harolupa la hikha henjeajiñ atañmi.

Apollos Ipisia la Korint ho

²⁴ Siisi Jew miyu Apollos hiila, Alejandria hoka dunii, Ipisia ho ahtii. Mo hempḛr lula miyu kone, piniipota atañ mika chiniiñ.

²⁵ Mohmi Pinii ka lembo mi luko tola dotii; ho yajiyallo mi giikañari giisu lyiniiñ, mo lutii ho ludiko jaho lutii Jisu drih piigo atañmi, chiniiñ mo Jon ka baptisma mi kontiisii chinsu tiinii.

²⁶ Mo haropa luritii sinagog ho; hojalo Priscila la Aquila nyi mohka luniiñmi tapa lala, mo anye mohmi ingiila ho ayayapa ho jije mi luko lubyañtii Pinii ka lembo mi.

²⁷ Ho mo Akaia mi impo biinala henkele, anubarmii atañ mohmi haro lupatii, ho henjeajiñ atañmi mohmi kariikatañ to hiila ketii. Mo ahchi biikele, mo hempḛr uro hembyuñtii hutiina aroh-ayala henjetiinii,

²⁸ niimpalukoda mo chemitii Jew atañmi uropa cheriibiidola butii apurho, piniipota mi kakiñ biidola Jisu lodake Kristo hiila.