MIINIIÑ 13 - NITI GONTU N.T. (BSI)

Barnabas la Sol Nyimi Kahetii ho Kiiniñtii

¹ Siisi Antiok gyoliñkonii ho hiiko nyibuhenii atañ la tonsḛrbo atañ dutii, Barnabas, Simeon humina Niger gyotiinii, Sairene daka Lucius, Manaen Herod ka hakhupiilyeako ka lengo hoka dunii ako, ho Sol.

² Mohlu Attoh mi heriila lo nyola dukele, Darii Yajiyallo lutii, “Barnabas la Sol nyimi pongepa atiito miigopa niihpana ngo mo anye mi gyotii nii.”

³ Nyola ho kuku lala mohlu mohluka alah mi mohluko tengatii ho mohlumi kiiniñtii.

Saiprus ho

⁴ Hopa, Darii Yajiyallo lo kiiniñ kotola, mo anye Seleusia ho totii; ho hiiko hokii mo anye Saiprus ho khobotii.

⁵ Mo anye Salamis ho ahchi biila, mo anye Pinii ka aguñmi gyukotii Jew atañka sinagog ho. Ho mo anye agiñho Jon datii mo anye mi hembyuñ dupa.

⁶ Mohlu hikha siilokiiddi ho intii Papos ka aruñare lohepa, mohlu ashu miiniiñ kone ko ahtii, Jew hoka amuh nyibuhenii, Bar-Jisu hiila armyañ.

⁷ Mo govonor ka agiñho dabotii, Sergius Paulus, chiniiñ miyu kone, Barnabas la Sol nyimi gyotii ho Pinii ka aguñmi tadu pa miitii.

⁸ Hojalo ashu miinii Elimas (hiikahii mohka armyañ mika lusaniimi) mohlumi pitrḛ siila datii, govonor mi henjenii hokii henkur kiine dupa hiila.

⁹ Hojalo Sol, humina Pol hiila hiitiirḛ gyotiinii, Darii Yajiyallo giitola, mohmi kaniila kaditii

¹⁰ ho lutii, “No igii ka oho, no hikha lotiiniiñ niimika ahha banii, poteje gollumisu ho diimmah giitola, no miitiñ masuha pakupalya parda mi miibii dola Pinii ka lembo mi?

¹¹ Ho siisi, kato, Attoh ka alah niiko ahkiñ doke, ho no micha kendo ho ichuche myodu hepa no danyi mi kapa lakiñ make.” Ohepada hapiñ la kamo nyi mohko suhi datii ho mo miyu atañmi metii mohmi alah sebiila ingii niipa.

¹² Ho govonor henjetii, niihna lyitiinii hiimi kapa lala, niimpalukoda mo hemurtii Attoh kiimi ka tonsḛr niimi.

Antiok ho Pisidia ho

¹³ Siisi Pol la mohka ajiñ atañ Papos hokii khobo tiiku, ho Pampilia ka Perga ho ahtii. Ho Jon mo anye mi apa tela Jerusalem ho ahkur tiiku;

¹⁴ hojalo mo anye inkatii Perga hokii ho Pisidia daka Antiok ho ahtii. Ho dumoalo ho mo anye sinagog ho intii ho dutii.

¹⁵ Dapo la nyibuhenii mi riku lala, sinagog daka sangiibo mo anye mi gyotii, lubiidola, “Anuanye si, niinyi ko hang haro lupa sanii miyu atañpa matiirḛ dokoda, hiimi luto.”

¹⁶ Hopa Pol guritii, ho mohka alah mi nyabii dola lutii: Isrel daka miyuatañ, ho nunu Pinii mika biisonii atañ, tageto.

¹⁷ Siika Isrel miyu atañka Pinii ngunuka aba atañmi kahetii ho miyu atañmi ano kahe dopa miitii mohluka Egip kiiddi hoka dulyi ho, ho alah yucha mapa mohlumi hokii agoho lingii tiiku.

¹⁸ Ho alyañpiilye anyañ hepa mo mohluka agiñho zabyo ho hembo montii.

¹⁹ Ho mo ganda pongkanu hemi Kanan ganda hokii pyadu loku lala, mo mohluka kiiddi mi mohluka alah ho bitii ku gandanencha chulipa, anya lampe la alyañ lyango hepa.

²⁰ Ho hiika hiiba ho mo mohlumi ayakacho kagiinii bitii Samuel nyibuhenii ka amiñ dayemi.

²¹ Ho mohlu radde kutii; ho Pinii mohlumi Kish ka oho Sol mi bitii, Benjamin halu ka miyu kone, nyang alyañ piilye pa.

²² Ho mo mohmi lapa lala, mo David mohluka radde pa miitii; humina mo pyakola ho lutiinii, Ngo kappatii Jesse ka oho David ko, miyu ngiika henko jaho miinii, huna hikha ngiika henko jaho miikiñ donii.

²³ Siika miyu ka oho asi hokii Pinii Isrel pa Lyangur ahgiitii, Jisu mi, mohka hemme niitii.

²⁴ Mohka ahma rampa Jon tonsḛr khenyotii henkur niika baptisma lanii mi Isrel daka miyu atañmi.

²⁵ Ho Jon mohka miigomi miija lala, mo lutii, Niihiila ngiimi nunu hendo? Ngo mo make. Ma, hojalo ngiika kiiliñ ho kone ahkiñ doke, huka nyota nanii mitrḛlya ngo tapya niipa lyima.

²⁶ Anubarmii atañ, Abraham ka uru atañka oho atañ, ho nunu agiñ hoka dabonii Pinii mika biisonii atañ, ngunupa kiiniñ bitii siika sangopyako ka puyu mi.

²⁷ Hutiina Jerusalem ho dunii ho mohluka sangii atañpa, niimpalukoda mohlu mohmi kala matii malo nyibuhenii ka luniiñmi tala matii, nii mina dumoalo karmyañmi ritii nii, hiimi miipetii mohmi halii biidola.

²⁸ Mohlu mohmi hang shiido pa halii sanii giimasii, hojalo mohlu Pailet mi mohmi mento hiila kubiido.

²⁹ Ho mohlu hikha mo piigo mika ketola doniimi miipe lala, mohlu mohmi sannii hokii akañ ho jolo tii, ho mohmi byuh ho atiitii.

³⁰ Hojalo Pinii mohmi shiinii hokii turdo miitii;

³¹ ho allo abuje mo hiika atañka agiñho ahtii hutiina mo agiñho Galili hokii Jerusalem lohe chabo tiinii, hiika atañ siisi mohka haki pa lyibida miyu atañpa.

³² Ho ngunu ayapuyu nunupa balii giidu niihna Pinii hii aba atañmi hemme bitii nii,

³³ siika siimi mo miipe bitii ngunupa mohka oho atañpa Jisu mi turdo pa miila lala; anyenii assañbiisie keto laka donii hiilyañ, No ngiika Oho, siilo kii ngo niika aba.

³⁴ Ho jije lusu dokoda mo mohmi shiinii hokii turdo pa miitii, lyakur kiine kumatii, mo hiila lutii, Ngo niimi darii ho jije David ka lyarniiñ mi bichi.

³⁵ Hopa hiira mo koneya assañbiisie ho ludo, No niika Darii Kone mi lyake nenkiñ ma.

³⁶ David pakoda, mo Pinii ka bulyañ atañmi miiho kula la mohka atoh santuñ ho, mipu tiiku, ho mohka aba atañ agiñho alie tiiku, ho lyartii ku;

³⁷ Hojalo humina Pinii turidopa miitiinii lyanii mi kapa matii.

³⁸ Siimi hopa nunu chinto, anubarmii atañ, siika miyu kiilo ke ingyamiigyanii hokii ka hello kunii mi nunumi gyuko donii,

³⁹ ho mo kiilo kone abi huna henje nyadonii kapane drih hokii tupya konyada nii mina nunu Mose ka dapo lo tupya kola matiinii.

⁴⁰ Hendinyato, hopa, hiilamakoda nunukoke ahkiñ donii niihna nyibuhenii atañmi lutii nii:

⁴¹ Kato, nunu chekhonii atañ, ho kahotamo nii, ho lyunii; niimpalukoda ngo nunuka myodu ho miigo miida, miigo nunu henje kemake, kone matiirḛ nunumi lukoda.

⁴² Mohlu ago linku kiile, miyuatañ lyarbiido siika drih atañ siimi rongelya dumoalo ho luko dokoda hiila.

⁴³ Ho sinagog daka dukuñ hii duja kukele, abuje Jew atañ la Judaism hoka lyiguh monii henjenii atañ Pol la Barnabas nyimi imbo montii, hiika atañ mo anye mi lutii ho lyarbiido Pinii ka aroh-aya mi miikañ ari miito hiila.

⁴⁴ Dumoalo kone yaho hikha citi hii daja sama dakuñ nyatii Pinii ka aguñmi tadu pa hiila.

⁴⁵ Hojalo Jew atañ miyu taro mi kapa lala, mohlu kariñ nyatii, ho Pol ka luniiñmi chekho la miitii, ho mohmi cheriitii.

⁴⁶ Ho Pol la Barnabas nyi harola lutii, lubiidola, Siikasi kapyopa Pinii ka aguñmi nunumi luko lupyo dopa lyido. Niimpalukoda nunu siimi khiipa nyado, ho atohmi santḛrlamanii sango mi larii niipa lyima lusuda, tageto, ngunu Midomiyu atañ ko inchi ke ah.

⁴⁷ Niimpalukoda Attoh ngunumi miito ludo, lubiidola, Ngo nunumi Midomiyu atañka hutoh pa atii biilyi ke, niimpalukoda nunu sangopyako mi hikha kiiddiapiñ so ahgii dupa.

⁴⁸ Ho Midomiyu atañ siimi tapa lala, mohlu hempyotii ho Pinii ka aguñmi assañtii; ho hempḛr abuje kahekola lyitii henjeniiatañ mi santḛrlamanii sango mi.

⁴⁹ Ho Attoh ka aguñ hii hikha gandasiiko ho tapatatii patii.

⁵⁰ Hojalo Jew atañ niibur niigatii tatukatu henjenii annii akha atañmi ho citi daka khiikonii miyu atañmi, ho lubuluga tii Pol la Barnabas mi miihimiire tote hiila, ho mo anye mi gandachie hokii nempa lintii.

⁵¹ Hojalo mohlu mohluka alih daka dimḛr mi pipa siitii mohlumi chekhola, ho Ikonium ho intii.

⁵² Ho henjeajiñ atañ hempyo nyatii ho Darii Yajiyallo agiñho.