MIHUKAKIÑNIIÑ 4 - NITI GONTU N.T. (BSI)

Dariiganda Hoka Heriinii

¹ Siika hiiba ho ngo kadi kiile, ho kato, dariiganda ho alyeh lyeko tola do! Ho kapyo japa ka luniiñ hii, ngiimika luniiñmi ngo takele siirii gyuniiñ hiilyañ, lune, “So chato, ho ngo niimi kakiñso siika hiiba ho niihna lyikiñ donii.”

² Ohepada ngo Yajiyallo ho dami, ho kato, raddeduko hii dariiganda ho domi, kone raddeduko ho dupa!

³ Ho hii huna hiiko dunii hii jasper yalañ la carnelian yalañ kapune, ho raddeduko ho gokḛrpala nyimeyaru hii dabiine emerald yalañ hiilyañ.

⁴ Gokḛrpala raddedukoho nyikhañhela piilye raddeduna nanii do, ho raddeduko ho nyikhañ hela piilye amiabañ atañ du, puloo pulye giitola, ayyiñ hokii tahiñbyopa giitola mohluka dinta atañ ho.

⁵ Raddeduko hokii dolya byoliñne, ho adu-abiñne ho yapuñ genne, ho raddeduko ka hataho kanuhe yamu muru tila do, hiikahii Pinii ka kanuhe Yajiyallo;

⁶ ho raddeduko ka hataho hiikaho dotii kakoho sisa ka siimie donii hiilyañ, crystal yalañ chuli. Ho raddeduko mi gokḛrpala, raddeduko ka pache pache dalyi, piilye turnii achu-amyo atañ, poteje amee adiñ giitola kiiliñ hata pada da:

⁷ kapyoja turnii achu-amyo hii patii chuli, anyenii turnii achu-amyo hii shiihiibo chuli, hingenii turnii achu-amyo hii miyu ka nyitumoru hiilyañ giitola, ho piilyenii turnii achu-amyo hii khoñkhu gonii hiilyañ.

⁸ Ho piilyeru turnii achu-amyo hii, kone abikii ale lekhe giitola, poteje amee giitola gokḛrpala ho ura ho, ho allo ayoh mi mohlu pema biisie singuma, “Darii, darii, darii, Attoh Pinii Tamoja, huna dutiinii ho du ho ahkiñ donii!”

⁹ Ho niidajalopa turnii achu-amyo assañ talyi ho khiichi ho mohmi payapacho luchi mo huna raddeduko ho dunii, huna ayu dahepa dukiñ donii,

¹⁰ nyikhañhela midiñpiilye amiabañ atañ nyanki do mohka hataho huna raddeduko ho dunii ho mohmi heriinyadonii huna ayu dahepa dukiñ donii; mohlu mohluka tahiñbyopa mi raddeduko ka hataho rilii biido, biisie sibii dola,

¹¹ “no khiiniiñ, ngunuka Attoh ho Pinii, lariidupa assañniimi ho khiiniiñmi ho harchichikemi, niimpalukoda no hikha drih atañmi puliñtii, ho niika henko ho mohlu lintii ho puliñ kotii.”