MIHUKAKIÑNIIÑ 3 - NITI GONTU N.T. (BSI)

Sardis Paka Puyu

¹ “Ho Sardis gyoliñkonii daka miidopopi kedo: ‘Mohka aguñ hukiina kanuhe Pinii ka Yajiyallo ho pukkanuhe takḛr giidonii . “‘Ngo chindo nunuka miigo atañmi; nunu turnii hiila armyañ giisudo, ho nunu shiinii.

² Huroto, ho alḛr miipa siito niihna dorañnii hiimi ho shiipa miila ka doniimi, niimpalukoda ngo nunuka miigo atañmi digoabiaya dopa kapama ngiika Pinii ka kata ho.

³ Hempa nyato niihna nunu larii tiinii ho tapatiinii; hiimi atii biito, ho henkur nyato. Nunu matiirḛ huro makoda, ngo diipyonii hiilyañ ahchi, ho nunu chinkiñ make nii myodu ho ngo nunuko ahchi hiila.

⁴ Hojalo siisi lohepa lamapa armyañ tonge giido ranke Sardis ho, miyuatañ huna mohluka tarii mi miibḛr giima ranii ho mohlu ngiika agiñho imbo kendoke puloo pa, niimpalukoda mohlu khiiniiñ.

⁵ Hii huna pamiñdonii giikiñdo sichuli puloo pulye atañmi, ho ngo nyupa tama mohka armyañ mi sango ka kheta hokii; Ngo mohka armyañ mi Aba la mohka miidopopi atañka hata ho khako talyi.

⁶ Hii hukiina yaroo giidonii, mohmi take nento niihna Yajiyallo gyoliñkonii atañmi ludonii.’

Piladelpia Paka Puyu

⁷ “Ho Piladelpia gyoliñkonii daka miidopopi kedo: ‘Darii koneka aguñ, jije kone, huko hona David ka sabe donii, huka miiko lyiho kone hetrḛ miipiñ lakiñma, huka miipiñ lyiho kone hetrḛ miiko lakiñma.

⁸ “‘Ngo chindo nunuka miigo atañmi. Kato, Ngo nunupa alyeh mi miiko tola atii bibii lyike, nii mina kone hetrḛ miitiñ lakiñ manii; ngo chindo nunuko harchichike hii do hojalo lama pasu, ho nunu ngiika luniiñmi tado ho ngiika armyañ mi mapa ma.

⁹ Kato, Ngo hiika atañmi miichi sinagog daka Saitan mi huna ludonii mohlu Jew atañ hiila ho mohlu hiilama, hojalo amuh do. Kato, ngo mohlumi ahdo pa miichi ho nunuka alih ho chuki kiine talyi, ho chinke nenchi ngo nunumi hendu hiila.

¹⁰ Niimpalukoda nunu ngiika yanupa pigiito hiiniiñmi atiibiido, ngo nunumi tenka nii myodu hokii lapya talyi niihna hikha dohadolo so ahla donii, hiika atañmi tenka dupa hutiina kiiddiapiñ so dunii.

¹¹ Ngo nyibya ahlyike; ayapa biito niihna nunuko donii, niimpalukoda kone lotrḛ nunuka tahiñbyopa mi robii koma dopa.

¹² Hii huna pamiñtiinii, Ngo mohmi ngiika Pinii ka piniiude ka siirañpa miichi; pema mo hiiko hokii agoho linkiñma, ho ngo mohko ngiika Pinii ka armyañ mi kechi, ho ngiika Pinii ka citi ka armyañ mi, niti Jerusalem niihna ngiika Pinii kokii todonii dariiganda hokii, ho ngiika atohka niti armyañ mi.

¹³ Hii hukiina yaroo giidonii, mohmi take nento niihna Yajiyallo gyoliñkonii atañmi ludonii.’

Laodisia Paka Puyu

¹⁴ “Ho Laodisia gyoliñkonii daka miidopopi kedo: ‘Amen hiila talii dopaka aguñ, lotii ho jije haki, Pinii ka pulyi hoka lintuja.

¹⁵ “‘Ngo chindo nunuka miigo atañmi: nunu lakhii tiirḛ lakhiima ho gubu tiirḛ gubuma. Ngo hendo nunu lakhii pakoda lakhii ho gubu pakoda gubu kencho!

¹⁶ Hopa, niimpalukoda nunu guluñgule do, ho lakhii tiirḛ lakhiima ho gubu tiirḛ gubuma, ngo nunumi ngiika aguñ hokii chupa linchi.

¹⁷ Niimpalukoda nunu ludo, Ngo mingo, ngiiko gandanencha abuje do, ho ngo hang anna ma; hang chimapa nunu milyiñdorso siike, arohkapa, arro, micha, ho ahuara.

¹⁸ Hopa ngo nunumi yardu ngiiko hokii riito yamu loka nitimiikunii ayyiñ mi, niimpalukoda nunu mingo dupa, ho puloo pulye nunu atohmi ahgii siidupa ho nunuka ahuara hiinyañ saniiñmi achuñ giidupa, ho diiro nunuka amee ho nesu dupa, niimpalukoda nunu kapa dupa.

¹⁹ Hiika atañ hutii mina ngo hendu nii, ngo gadu ho miikhiiñdu; hopa hendinyato ho henkur nyato.

²⁰ Kato, ngo alyeh ho dake ho padiñdu; hu kone jalo matiirḛ ngiika gyoniiñ mi tapa talyi ho alyeh mi miiko talyi, ngo mohko ahchi ho mo agiñho diibo talyi, mo ngiika agiñho.

²¹ Hii huna pamiñdonii, ngo mohmi ngiika agiñho raddeduko ho dugii talyi, niihtañpa ngo atoh tiirḛ pamiñtii ho ngiika Aba ka raddeduko ho dubo du.

²² Hii hukiina yaroo giidonii, mohmi take nento niihna Yajiyallo gyoliñkonii atañmi ludonii.’”