MIHUKAKIÑNIIÑ 19 - NITI GONTU N.T. (BSI)

¹ Siika hiiba ngo tapato takoso hempḛr goro abuje miyu kii hiilyañdo dariiganda ho, gyubiidola, “Halleluya! Sangopyako ho tatukatu ho harchichike hii ngunu Pinii kiike,

² niimpalukoda mohka ayakacho kaniiñ hii jije ho kadiko; mo halii biine kaye pfyoaridiisunii bomi huna kiiddiapiñ mi mudu biinenii mohka datuapu puniilo, ho mo miili biine mohmi mohka miira atañka ai pa.”

³ Rongeta mohlu gyurido, “Halleluya! Muku mohkokii ayoh ho sucha do ayudahepa.”

⁴ Ho nyikhañ hela piilye amiabañ atañ ho piilye achu-amyo atañ chukila ho Pinii mi heriido huna raddeduko ho dunii, lubiidola, “Amen. Halleluya!”

Subuñ ka Mihie Millo lasu lyiho hoka diigo

⁵ Ho raddeduko hokii hempḛr goropa aguñ gyuliñdo, “Ngunu Pinii mi assañto, hikha nunu mohka miira atañ, nunu hutiina mohmi biiso nyadonii, atu la kaye nyi.”

⁶ Ho ngo tapato takoso hempḛr miyu taro ka adu-abiñ niipa tato, hempḛr yasie abujeka bido niihtañ ho hempḛr uro yapuñ gendo niihtañ, gyubiidola, “Halleluya! Niimpalukoda Attoh ngunuka Pinii Tamoja sangii do.

⁷ Kiije ngunu hempyosa ho khiisa ho mohmi assañsa, niimpalukoda Subuñ ka mihie ladu ahdo kuke,, ho mohka Mihie mo atohpa henju doke;

⁸ siikasi mohmi pulye aya hokii giiju dopa bitiike, hudakhada ho darii hokii” niimpalukoda aya pulye hii denki miijoke piniimiyu atañka.

⁹ Ho miidopopi lune ngiimi, “Siika siimi keto: Lyanko kendo hiika atañ hutii mina gyotiinii Subuñ ka mihie lako alyiñapiñ diikoho dudupa.” Ho mo ngiimi lune, “Siika atañsi jije Pinii ka aguñke.”

¹⁰ Ho ngo mohka alih ho giihi to mohmi herii dupa, hojalo mo ngiimi lune, “No hiila miiyo! ngo nochitañ miira ahiñke ho niika anubarmii hiilyañ hutiina Jisu mika pyako niimi badonii. Pinii mi heriito.” Niimpalukoda Jisu mika pyako niisi nyibuheniiñ ka yajiyallo ke.

Puloo Gora Hoka Yoniibo

¹¹ Ho ngo kapato dariiganda mi miiko dopa, ho kato, puloo gora! Mo hiika ayoh hoka dunii bo gyokodo Lotii ho Jije hiila, ho denkipa mo haliido ho gyambo pado.

¹² Mohka amee hii yamu miilyo hiilyañne, ho mohka adiñho abuje tahiñbyopa giine; ho mohko armyañ ketola giine nii mina mi kone hetrḛ chimanii hojalo mo atohsii.

¹³ Mohka tarii giiniiñ hii ai hoka sambyunii, ho mohka armyañ mohmika gyoniiñhii Pinii ka Aguñ.

¹⁴ Ho dariiganda daka armi atañ, giinyatola aya pulye hokii, puloo ho darii, mohmi imbo mondo puloo gora atañ.

¹⁵ Mohka aguñ hokii hempḛr areh ilyo biliñ biido niilona ganda atañmi pakhii kendonii, ho mo mohlumi sangii kendo dachañ panyi lo; mo nyorpi kendo Pinii Tamojaka hadii ka ow nyorpi naniiñ ho

¹⁶ Mohka tariiho ho mohka halañho mohka armyañ hii ketola do, radde atañka Radde ho attoh atañka Attoh.

¹⁷ Ho ngo kapato miidopopi danyi ho dapa, ho hempḛr goropa mo gyobiido hikha piita atañmi yapuñ liipa hoka gola danii atañmi, “Ahto, ahkuñto Pinii ka kahe apiñ diikoho,

¹⁸ radde atañka ayya mi diidupa, kepten atañka ayya mi, tamomiyu ka ayya mi, gora atañ la hoka yoniiñ boka ayya atañmi, ho hikha miyu atañka ayya mi, anyeru dasḛr la miira nyikii mi, anyeru atu la kaye nyikii mi.”

¹⁹ Ho ngo kapato achu-amyo la kiiddiapiñ daka radde atañmi mohluka armi atañka agiñho mohmi gyambo padu pa hiila huna gora ka ayoho dunii ho mohka armi mi pariidupa hiila.

²⁰ Ho achu-amyo mi latu biine, ho hiika agiñho amuh nyibuhenii mi, huna mohka dapa kagiñnanii miitiinii niilona mo talubalo tiinii hiika atañmi hutiina achu-amyo ka miiho niimi giidonii ho hutiina hiika puchiniimi herii nyadonii. Siika anye mi turdopa jopa liibiido yamu ka siimie ho niihna sulphur lo yadonii.

²¹ Ho khiibe atañ pakhii kobiine mohka ilyolo huna gora ka ayoh ho dunii, ilyo mohka aguñ loka biliñ niilo; ho hikha piita atañ mohluka ayya atañmi diibiido.