METHU 27 - NITI GONTU N.T. (BSI)

Jisu mi Pailet ko Ahgiitii

¹ Aro kukele, hikha nyibu burii atañ la miyu atañka amiabañ atañ lusu nyatii Jisu mi menke nendupa hiila;

² ho mohlu mohmi rala la ho agoho lingiila ho mohmi Pailet govonor ko nembitii.

Judas Ka Shiiniiñ

³ Ho Judas, Jisu mika talubalobo, Jisu mi haliibiido hiila kappatii, mo henkur kula ho hiika rupu posa hiñkhañ hemi nyibu burii la amiabañ atañmi biku tiiku,

⁴ lubiidola, “Ngo miigyatii diigolugo giima niimika talubalo niisi.” Mohlu lutii, “Hiimi ngunu nii chindo? Niika henko siitiika.”

⁵ Ho rupu posa mi piniiude ho ripa lobi tekula, mo intiiku; ho mo inkula atoh hosḛr siitii.

⁶ Hojalopa nyibu burii atañ, rupu posa mi lala la, lutii, “Siimi yadiñ ho atii tiiku lakiñ kumake, niimpalukoda siikasi ai ka arie ke.”

⁷ Hopa mohlu lusu kulala, ho hiika hiilo piichañ puniika balumi riitii, nyibo miyu atañmi alie kopa.

⁸ Hopa hiika balu mi siilo jalopa Ai ka Balu hiila lubiida.

⁹ Ho nyibuhenii Jeremiah ka luto laka donii hii lyipela lyitii, lubiidola, “Ho mohlu rupu posa hikhañ hemi latii, mohka arie paka laniiñ mi, hiika arie hii Isrel ka oho atañka atiibiniiñ,

¹⁰ ho mohlu hiimi piichañ punii ka balu ariepa bitii, Attoh ka ngiimi kakiñnii chulipa.”

Pailet Jisu mi Taka biido

¹¹ Siisi Jisu govonor ka hataho datii; ho govonor mohmi takatii, “No Jew atañka Radde ha?” Jisu lutii, “No ludonii hiila siilo.”

¹² Hojalopa mohmi nyibu burii atañ la amiabañ atañ halii biisudo, mo hang lusimatii.

¹³ Ho Pailet mohmi lutii, “No tapa mapo ne drihmi mohlu halii biido?”

¹⁴ Hojalopa mo mohmi hang lusi ma, gonge mitrḛ lulima; hopa govonor hempḛr hemurtii.

Jisu mi Mendopa Lubiido

¹⁵ Siisi dituñ sodu ho govonor pattiih tungko nii hokii kone mi apalila miiju dotii humina mohlu luchinii.

¹⁶ Ho mohluko hempḛr ingyamiigyanii pattiih tunkonii kone dutii, Barabas hiila.

¹⁷ Ho mohlu dakuñ nyatii, Pailet mohlumi lutii, “Humi nunu ngiimi nunupa apa kencho hiila hendo, Barabas miha malo Jisu miha humina Kristo la ludanii?”

¹⁸ Niimpalukoda mo chintii siikasi mohlu kariñla mohmi bolii bitii hiila.

¹⁹ Hiikahaho ho, mo ayakacho kako duta naniiñho durañpa, mohka mihie mohmi puyu biliitii, “Hiika denki miyu mi hangja miiyo, niimpalukoda hiika miyu pa ngo ano heru hembi teke siyo emmakoho.”

²⁰ Siisi nyibu burii atañ la amiabañ atañ miyu atañmi lurutii Barabas mi kuto ho Jisu mi mento hiila.

²¹ Govonor hiira mohlumi lutii, “Siika anye sokii humi nunu ngiimi nunupa apa kencho hiila hendo?” Ho mohlu lutii, “Barabas mi.”

²² Pailet mohlumi lutii, “Hokoda ngiimi nii miikiñ cho hiila hendo Jisu mi humina Kristo la ludanii?” Mohlu hikha lutii, “Mohmi leda lala mento.”

²³ Ho mo lutii, “Niimpa, mo nii miigya tola?” Hojalopa mohlu uroyapa gyutii, “Mohmi leda lala mento.”

²⁴ Hopa Pailet hang luliñ biimalyi hiila kalala, hojalo chesu resuya lupa biichi helala, mo yasie jolala miyu atañka kadopa alah hasutii, lubiidola, “Siika miyu ka siiko ho ngo luta kote make ah; nunu henko siitiika.”

²⁵ Ho hikha miyuatañ lusitii, “Mohka shiiniiñ mi ngunuko ho ngunuka oho atañko khiilii tope!”

²⁶ Ho mo Barabas mi mohlupa apalintii, ho Jisu mi higor pala la, mohmi leda lala menke nendupa nembitii.

Sipahi Atañ Jisu mi Somiñ Biido

²⁷ Ho govonor ka sipahi atañ Jisu mi raddeduko lengoho selii biitii; ho mohlu hikha sipahi atañmi gyokuñ liitii mohka hataho.

²⁸ Ho mohlu Jisu ka abitarii mi khepa lala ho lanchañkoma pulye bereya mohmi agiitii,

²⁹ ho taremi radde giiju hiilyañ hikhii lala mohlu mohka dinta ho kheliitii, ho lahbi alah ho pemu buhe bitii. Ho mohka hataho liibañ khanga tola dula mohmi somiñ biido, lubiidola, “Gyutii, Jew atañka radde!”

³⁰ Ho mohlu mohmi chukḛr chuputii, ho pemu mi lala la mohka dinta ho hibiido.

³¹ Ho mohmi nyapa koya miilala, mohlu mohka pulye giiniimi tiipatii, ho mohka pulye mi mohmi agiitii, ho mohmi ingiitii leda lala mendupa.

Jisu mi Ledatii

³² Mohlu ila dokele, mohlu Sairene hokii miyu kone ahla dopa kappatii, mohka armyañ Saimon hiila; hiika miyu mi chechepa Jisu ka pogyañ mi jobii bitote hiila kheliitii.

³³ Ho mohlu Golgota luniiñ gandaho ahchi kula la (Hiika luniiñ hii allo dinkhu ka ganda),

³⁴ mohlu mohmi roalha tantote bitii, arpḛr miiyonii; hojalo mo hiimi tangka lala, mo hiimi tamatii.

³⁵ Ho mohlu Jisu mi leda kulala, ho mohka pulye mi mohluka punkoho sarche siitii pota tuka siibii dola;

³⁶ ho mohlu duha nyatii ho hiiko mohmi kahlyala dutii.

³⁷ Ho mohka dinta ayoho mohlu mohmika halii laka keniiñhii, hiila ketola dotii, “Siikasi Jisu Jew atañka Radde.”

³⁸ Ho diipyonii anye miilañmi mo agiñho ledatii, kone mi lahbi dalyiho kone mi lahchi dalyi.

³⁹ Ho hoka impo biinii atañ mohmi ngarpa nyatii, mohluka adiñ mi dimpi biidola

⁴⁰ ho lubiidola, “No piniiude mi pyadu lolala ho allo lohiñ niiho pencha kendo hiibii lyila, atoh miya lyangur siito tiikiilo! No matiirḛ Pinii Oho milo, pogyañ hokii akañ so totoku.”

⁴¹ Hii chulipa nyibu burii atañ tiirḛ, pagenii atañ la amiabañ atañ agiñho, mohmi nyapa koyatii, lubiidola,

⁴² Mo mihmi lyangur biine; mo atoh mi lyangur siila mayu ha. Mo Isrel ka Radde; mohmi siisi pogyañ hokii akañ so toke nento, ho ngunu mohmi henje talyi.

⁴³ Mo Pinii mi henjeda; Pinii mi mohmi siisi tupya kiineto, mo matiirḛ mohmi anna dokoda; niimpalukoda mo lutii, Ngo Pinii ka Oho ke.

⁴⁴ Ho diipyonii anye mo agiñho pogyañ hoka leda lehiñ konii miilañ mohmi nyapa koyatii.

Jisu ka Shiiniiñ

⁴⁵ Siisi allo ka gunta talyañlenye hokii hikha kiiddi apiñ hii kamo ramba lyiritii gunta tahiñ lyihepa.

⁴⁶ Ho alyiñdalyi gunta tahiñ dakele Jisu hempḛr goropa gyuritii, “Eli, Eli, lama sabachthani?” Hiila luniiñsi, “Ngiika Pinii, ngiika Pinii, niimpana no ngiimi helyu biilyi kunii?”

⁴⁷ Ho hoka danii tange siimi tapa lala lutii, “Siika miyu si Elija mike gyodonii.”

⁴⁸ Ho kone nyibya loda hala ho empya labiila, hiiko roalha tansa nii hokii poteje niima biila, ho hiimi pemu ho ngalii lala, ho mohmi bitii tanke nendupa.

⁴⁹ Hojalopa tange lutii, “Kalyato, ngunu kakasa Elija ahla mohmi lyangur talyiha.”

⁵⁰ Ho Jisu hiira hempḛr uropa gyutii ho mohka yajiyallo mi biliitiiku.

⁵¹ Ho kato, piniiude daka tonkhu nanii pulye hii tanye sarche ritii, ayoh hokii la akañ lohepa; ho kiiddiapiñ hii abyutii, ho yalañ atañ chopya chosatii;

⁵² byuh atañ tiirḛ miiko nyatii, ho abuje ayu hoka piniimiyu shiinii ka apo hii turku ritiiku,

⁵³ ho byuh atañ hokii limbii la mohka turiturku lyiho mohlu darii citi ho intii ho abuje miyuatañ ko ahtii.

⁵⁴ Ho Rom sipahi sabii ho mohka agiñ hoka danii, Jisu mi kahlya la dola, myobu huniiñ mi ho nii lyitii hiimi kappatii, mohlu biiso nyatii, ho lutii, “Jijeloda Siikasi Pinii ka oho ke!”

⁵⁵ Hiiko annii akha miilañ abuje datii, adho hokiila kala datii, Galili hokii Jisu mika imbo monii, mohmi miiho luhoniiñ;

⁵⁶ hoka danii atañ Mary Magdalen, ho Mary Jems Josep nyika annii, ho Zebedi ka oho atañka annii.

Jisu mika Alie kuniiñ

⁵⁷ Alyiñdalyi kukele, mingo miyu kone Arimatia hokii ahtii, Josep hiila armyañ, hiitḛr Jisu ka henjeajiñ konetii.

⁵⁸ Mo Pailet ko ahtii ho Jisu ka shiima mi kutii. Ho Pailet mohmi bitote hiila lutii.

⁵⁹ Ho Josep shiima mi jobii tiiku, ho pulye darii bereho aputii,

⁶⁰ ho mohka atoh paka niti byuh ho atiitii, hiikahii yalañ ura hoka byuh heniiñ; ho mo byuh ka hagya ho yalañ puro puhe giipiñ tola atiitii ho intiiku.

⁶¹ Mary Magdalen la koneya Mary bo hiikaho datii, byuh ka pache dalyiho dutii.

Byuh mika Dagur Biinii

⁶² Allo lohe yaho, hiikahii, Miimyo biniiñ allo ka hiibaho, nyibu burii atañ la Parisi atañ Pailet ko dakuñnyatii

⁶³ ho lutii, “Tonsḛrbo, ngunu hendḛrdo hiika golluboka luniiñmi, mohka turla daho, ‘Allo lohiñ niika hiibaho Ngo hiira turiturku talyi.’

⁶⁴ Hopa lutii byuh mi allo lohiñ lohepa ayapa dagur biike nento, hiilamakoda mohka henjeajiñ atañ ahla ho mohmi diipyo biikiñ doke, ho miyu atañmi luko kendoke mo shiite hela turiturku neku, ho kami hoka gollumisu hii kapyo dakii mitrḛ ayamaya pa lyikiñ doke.”

⁶⁵ Pailet mohlumi lutii, “Nunukii kalyabiinii sipahi da; inge, niihtañ nunu aya dagur biila kendo dabiihe.”

⁶⁶ Hopa mohlu intii ho byuh mi hempḛr ayapa yalañ giitiñ niimi miitiñtii ho dagur biinii mi kalya biike nentii.