METHU 20 - NITI GONTU N.T. (BSI)

Robalu Hoka Miigo Miinii Atañ

¹ Niimpalukoda dariiganda ka raddeganda hii ude atoh chulike huna arokonchiho ila mohka robalu hopa miyu ajho tala intiinii.

² Ajho innii atañ loheka denarii mi lusu kulala, mo mohlumi mohka robalu ho kiiniñtii.

³ Ho gunta takkowa ho ago linkele mo biijḛr lengo ho enne pa dapasiila tange kappatii;

⁴ ho mohlumi mo lutii, Nunu tiirḛ robalu ho inge, ho kalii biidola ngo nunumi bisu talyike. Hopa mohlu intii.

⁵ Hiira gunta talyañ lenyeho ago lintii ho alyiñdalyi ka gunta tahiñ ho, mo hiika muju jaho miitii.

⁶ Ho mo alyiñdalyi ka gunta tango kupa miila dola mo agoho lintii ho miyutange dapa kappatii; ho mo mohlumi lutii, Niimpa nunu so assuale hang miimapa lotejeda?

⁷ Mohlu mohmi lutii, Niimpalukoda ngunumi kone tiirḛ ajhoma. Mo mohlumi lutii, Nunu tiirḛ robalu ho inge.

⁸ Ho alyiñdalyi kukele, robalu ka atoh mohkiimi ka kalya bomi lutii, Ajho innii atañmi gyokuñ lala mohluka injomi bitoku. Kami jahokii biribiila, kapyo lohepa.

⁹ Ho hiika gunta tangonii myodu hoka ajho koniibo ahkele, kone abimi denarii bitii.

¹⁰ Siisi ajho jotu japa ka jokonii ahtii, mohlu hentii mohlumi abu yapa bilyi do hiila; hojalo mohlumi tiirḛ denarii sii bisu tiinii.

¹¹ Ho hiila bihañ kiile mohlu ude atoh mi budubude lutii,

¹² lubiidola, Siika kami japaka ahniiñsi gunta tahesii lyisu nenii, ho no ngunu mila mohmi ahiñpa khiila ngunu hutiina loteje miikiñdo hembiidola ho danyi bengko biidola miitiinii.

¹³ Hojalo mo lusitii mohluka punko hoka konemi, Ajiñsi, Ngo nunumi aya mapa miimasii; nunu ngiimi denarii pa talii matoha ehna?

¹⁴ Labiihe niika injomi, ho ingeku; Ngo siika kamijami tiirḛ bichi hiila hentiiku nunumi ngo ne bichi.

¹⁵ Ngo nii miichi hiila hentii hiimi nunu ngiimi miike nente ma ha niihna ngiiko donii? Malo nunu ngiika hela laka biniiñmi kariñ dopo?

¹⁶ Hopa kamihii kapyo kendo, ho kapyohii kami kendo.

Jisu Rohiñ niipa Mohka Shiisanii piigo mi lupado

¹⁷ Ho Jisu Jerusalem ho chabii kiile, mo henjeajiñ alyañlenye mi aruñ ingiila intii, ho lembo ila dola mo mohlumi lutii,

¹⁸ “Kato, ngunu Jerusalem ho chalyi; ho miyu ka Oho mi nyibu burii la pagenii atañmi nembi kendo, ho mohlu mohmi mendopa halii kendo,

¹⁹ ho Midomiyu atañmi nembi kendo nyapa kiinedupa ho hike nendupa ho pogyañ ho leda kiine dupa, ho mo allo lohiñ niika hiiba ho turi kendoku.”

Annii Kone Ka Yarniiñ

²⁰ Ho Zebedi ka oho atañka annii mohko ahtii, mohka wiinga atañmi ahgiila, ho mohka hataho liibañ khangala mo ngoya kone kutii mohmi.

²¹ Ho Jisu mohmi lutii, “No nii anna do?” Mo Jisu mi lutii, “Hiila lutope siika ngiika wiinga anye mi, konemi niika lahbi dalyiho kone mi niika lahchi dalyiho piijoda dudopa, niika raddeganda ho.”

²² Hojalo Jisu lusitii, “No chinsu make no niihna kudonii hiila. Nunu tambo lakiñ dopeha Ngiika tango taniiñ mi?” Mohlu Jisu mi lutii, “Ngunu tambo lakiñdo.”

²³ Jisu mohlumi lutii, “Nunu ngiika tango mi tala kendo, hojalo ngiika lahbi dalyiho ngiika lahchi dalyi hoka dusa niimi ngo lula kema, hojalo hiikahii hiipasii dokiñ donii hupana ngiika Aba miimyo bitiinii.”

²⁴ Ho midiñ alyañhe siimi tapa lala, mohlu siika anuabañ anye mi hadiitii.

²⁵ Hojalo Jisu miilañrumi mohko gyolii lala ho lutii, “Nunu chindo Midomiyu atañ mika sangiibo mohlumi lumiñ biitola biidu, ho mohluka kaye miyuatañ mohlumi otority ho biitola dudu.

²⁶ Si chulipa nunuka punkoho lyikiñmake; hojalo huna nunuka punkoho kaye japa dana donii hii miilañ rumi ihomiiho kendo lodake,

²⁷ ho hujalopa kapyopa danado nunuka punkoho hii nunuka miirapa lyikiñdo lodake;

²⁸ sichuli miyu ka Oho tiirḛ miiho kopa ahmake miiho dupake ahnii, ho mohka sango mi abuje miyu mi tupya naniipa.”

Jisu Michanii Miyu Anye Mi Miipya Biido

²⁹ Ho mohlu Jeriko hokii ago linku kiile, hempḛr miyu taropa mohmi imbo montii.

³⁰ Ho kato, michanii anye lembo aruñho dutii, mo anye Jisu impo biila do hiila tapa lala, gyuritii, “Ngiinyi mi arohpe, David ka Oho!”

³¹ Miyu atañ mo anye mi gabiido, mo anye mi aduyo lutii; hojalo mo anye goro yapalya gyutii, “Attoh, Ngiinyi mi arohpe, David ka Oho!”

³² Ho Jisu damo lala mo anye mi gyobiido, lubiidola, Ngiimi niinyipa nii miibi kencho hendu?

³³ Mo anye mohmi lutii, “Attoh, ngiinyi ka amee mi kappa kiine kupe.”

³⁴ Ho Jisu aroh biidola mo anye ka amee mi tenetii, ho ohepada mo anye kappa datiiku ho mohmi imbo montii.