KOLOSIA 2 - NITI GONTU N.T. (BSI)

¹ Niimpalukoda ngo nunumi chinke nenado niimkane uro ngo nunupa miigo miito, ho Lahodicea hoka dunii atañpa, ho hikha hiika atañpa hutiina ngiika nyitumoru mi kapa nyamanii,

² mohluka ahha mi haro kiinedupa niimpalukoda mohlu hensu ho tongepa nyudiñ ladopa, hikha mingo mi dokenendupa chimbiidola Pinii ka michilamanii mi, Kristo kiimi,

³ hukohona hikha chila ho chilananiiñ atii tiikuñ tola donii.

⁴ Ngo siika siimi ludu niimpalukoda kone mitrḛ nunumi talubalo madopa mohluka takiñkahiñ luniiñlo.

⁵ Niimpalukoda ngo apo nyima siijalo, hojalo ngo yajiyallo pa nunuka agiñho dake, hempyo kendo nunuka aya miiju mi kapa lala ho nunuka henje hoka latrḛ paka daniimi Kristo ko.

Kristo ko Poteje Sango

⁶ Nunu Kristo Jisu mi Attoh pa larii tiiku, hopa mohko santo,

⁷ bugela ho mohko sancha to ho henje ho sanchato, niihtañpa nunumi tonsḛrtii, abuje payapacho lubiidola.

⁸ Hendi nyatolya siimi kone lotrḛ nunu pigii kolyayo mohluka henjumiiju ho surudonyo lo, miyumima ka miijulujulo, siichañmiido mika sangii yajiyallo lo, ho niihna Kristo ka miiju manii.

⁹ Niimpalukoda mohko hikha poteje piniiaju hii apopa lyila dohado,

¹⁰ ho nunuka sango hii pote doku mohko, huna hikha sangiinii ho otority ka akhojanii.

¹¹ Mohko nunutiirḛ mitupikotii alah loka mitupiniiñ lomapa, ahuapo ka asiialyo mi apa lala Kristo ka mitupiniiñlo;

¹² ho nunu mohka agiñho alie kotiiku baptisma lakoho, hukohona nunu turiturku tiikunii Pinii ka miigo miiniiñ mika henje agiñho, humina mo shiinii hokii turdo miitiinii.

¹³ Ho nunu, hutiina shiitii kunii palle miikohopa ho nunuka asiialyo hoka mitupiko maniiñho, Pinii turdopa miitiiku ahiñpa mo agiñho, hikha ngunumi ngunuka pallemiinii hemi hello kula,

¹⁴ lapabitiiku ngunumika haliitokula doniiñmi miichañ luchañ hoka, siika siimi mo lahotii, pogyañ ho ralii kobii dola.

¹⁵ Mo sangiinii ho tamo atañmi lapa tiiku ho butii miyu kadopa mohlumi miikiñ tii, mohlumi pamiñtii mohko.

¹⁶ Hiikohopa kone lotrḛ nunu ayakacho kakoyo taka kola nunuka diiniiñ taniiñmi malo dituñ soniiñmi malo niti piilo malo dumoalo mi.

¹⁷ Siika atañsi yallo kontii siike niihna ahkiñdonii; hojalo drih atañ Kristo kiisu ke.

¹⁸ Konelotrḛ nunu khiipa kolya yo, khiiliila atohpaka-taliilaka miiniiñmi ho miidopopi mika herii laka miiniiñmi, mohluka nyibuheniiñ mi lutiñ nambiidola, butelindu hang lukosanii giimapa mohluka asiialyo ka henjulo,

¹⁹ ho Akhojami ya gabii mapa, nii hokiina hikha apo hii, sangii donii ho nyudiñ tiinii tongepa hiika giidiñ siiniiñlo ho ahro atañlo, sancha da sancha naniiñlo Pinii kokii.

Shiiniiñ la Saniiñ Kristo ka Agiñho

²⁰ Kristo agiñho matiirḛ nunu shiitii kukoda siichañmiido mika sangiinii yajiyallo hokii, niimpa nunu sala darañ siisi jalo dohadolo kii hiilyañpa? Niimpa nunu tiilii siibidu sangiinii atañko,

²¹ “Gakkayo, Diikayo, Tenkayo”

²² (hiika drih atañmi ludo niihna hikha lyukiñ donii mohluka miitananii si), miyumima ka henjumiiju ho tonsḛr nii?

²³ Siika atañsi jijeloda lintii chila loka uro tapa dopa miiniiñ heriiniilo ho atohpaka-taliila ho hang chimapa apomi, hojalo hiika atañ ho hang khiiniiñ giima asiialyo ka miibḛr niimi kaka naniiñpa.