IPISIA 3 - NITI GONTU N.T. (BSI)

Midomiyu Atañ Paka Pol Ka Miibinii

¹ Siika piigopa ngo, Pol, Jisu Kristo paka patiih tunkonii nunu Midomiyu atañpa,

² helliido nunu tapatiikudo Pinii ka aroh-aya ngiimika biniiñmi nunupa hiila,

³ niihtañpa michilamanii mi ngiimi chindopa miitii mihukakiñ biidola, ngo tudiipa kebii lyike.

⁴ Niida nunu siimi richi nunu helakendo ke ngiika chiniiñmi Kristo mika michilamanii drihmi,

⁵ nii mina chinke nematiinii miyu ka oho atañmi khiibe santuñ ho hiimi siisi kakiñtiiku mohka darii kiiniñkonii atañ la nyibuhenii atañmi Yajiyallo lo;

⁶ hiika hii, niihtañpa Midomiyu hii pensikonii ahiñpa lyiniiñ, apo koneka uru ahiñ, ho Kristo Jisu ka hemme biniiñ mika henchemoniiñ ayapuyu kiilo.

⁷ Siika ayapuyu silo ngiimi miitii miihoniipa Pinii ka aroh-aya laka ahmiñayiñ lo nii mina ngiimi miigomiiniipa bitiinii mohka harchichikelo.

⁸ Ngiimi, lusudokoda ngo atujasu hikha piniimiyu punkoho, siika aroh-aya mi bitii, Midomiyu atañmi tonsḛrkhenyo dopa Kristo ka mechilamanii mingomi,

⁹ ho hikha miyu atañmi kapa kiine dupa niihna michilamanii henjuniimi achuñ tola dotiinii santuñ abuje hepa Pinii huna hikha drih atañmi putiinii;

¹⁰ niimpalukoda gyoliñkonii lo Pinii ka abuje chila mi siisi chindopa miike nendupa miidopopi sangiinii atañla dariiganda hoka tamo atañmi.

¹¹ Siikasi lyiguhlamanii miigo henjutola ka dokunii nii mina mo Kristo Jisu ngunuka Attoh ko hendḛr tiikunii,

¹² hukohokiina ngunukii haronaniiñ ho hentiñnanii lindonii ngunuka henje kopa mohko.

¹³ Hopa ngo nunumi luchi iche hetrḛ ahha hameyo niihna ngo nunupa heru bida nii, hiikahii nunuka tatukatu pake.

Kristo ka Heniiñ

¹⁴ Siika piigopa ngo liibañ khangadu Aba ka hataho,

¹⁵ hukohokiina hikha uru koneabi dariiganda la kiiddiapiñ nyika armyañ mi myantiinii,

¹⁶ niimpalukoda mohka mingo tatukatulo mo nunumi alḛrnaniiñ mi bikiñcho mohka Yajiyallo lo miyu ka ura ho,

¹⁷ ho hiika Kristo nunuka ahha ura ho dukiñcho nunuka henje kiilo; niimpalukoda nunumi, liima tugela ho hensuniiho sampola dokenendupa,

¹⁸ chilananiiñ ka harchichike giikiñcho hikha piniimiyu ka agiñho niimkane na appiih ho aso ho ohoh ho urañ,

¹⁹ ho chinke nendupa Kristo ka heniiñmi niihna chilami abuyadonii, niimpalukoda nunumi hikha Pinii ka henju mi poteje giike nendupa.

²⁰ Siisi mo huna harchichike lo miigo miidonii ngunuka ura ho miila kendo siimi tiirḛ hempḛr abuyapa ngunuka kuniiñ malo heniiñmi hentola,

²¹ mohmi assañdiilañ kencho gyoliñkonii ho Kristo Jisu ko hikha santuñ atañso, ayudahepa. Amen.