GELESIA 4 - NITI GONTU N.T. (BSI)

¹ Ngiika lusa niisi pensikosabo, nii dahepa mo himme pa lyichirañ, miira mi aya yadu hiila lyima, mo hikha gandasiiko ka atohpa lyido jalo;

² hojalo mo amiabañ ka kalyañ biniiñ ka ura hosu dukiñ siidonii nii dahepa aba ka siilo kiitii ka allo khiibi nii ahtema.

³ Hiichulipa ngunu tiirḛ; niido ngunu himme pa datorañ, ngunu tiirḛ siichañmiido mika sangiinii yajiyallo ka miirapa lyito.

⁴ Hojalo myodumyolo ka ahje lyikuho, Pinii mohka Oho mi kiiniñ bitii, nyimii lo bukotii, dapo ka ura ho bukotii,

⁵ hiika atañmi tupya dupa hutiina dapo ka ura ho dunii, niimpalukoda ngunu larii kola dopa oho atañpa.

⁶ Ho niimpalukoda nunu oho atañ ku, Pinii kiiniñtii mohka oho ka Yajiyallo mi ngunu ahha ho, gyobiidola, “Aba! Aba!”

⁷ Hopa Pinii kiilo nunu miira kuma ke hojalo oho kuke, ho oho koda hokoda pensi kosaniike.

Pol ka Henabiniiñ Gelesia Miyu Atañpa

⁸ Bilo, nunuka Pinii mika chima raho, nunu miirapa dune niihna jije pinii atañ manii;

⁹ hojalo siisi nunu Pinii mi chindo ku, malo Pinii lo chinko doku, niihtañpa nunu inkur kupa ajju ho myadonii yajiyallo ko, niimpa hiira nunu rongeta miira pa lyinado?

¹⁰ Nunu herii nyada allo atañmi, ho piilo atañmi, ho myodu myolo mi, ho anyañmi!

¹¹ Ngo biisodo ngiika nunu koka miiniiñ hii danyopa miipa mabyo peha hiila.

¹² Anubarmii atañ, ngo nunumi lyarlyi ke, ngo chulipa lyito, niimpalukoda ngo tiirḛ nunu chuli lyiduke. Nunu ngiimi hang miigya ma;

¹³ Nunu chindo siikasi ngiika ahuapo ka ahchi kopa ngo ayapuyu mi nunumi tonsḛrkhenyo khempyo tii;

¹⁴ ho ngiika herumyanka hii nunupa tenka niipa lyine, nunu ngiimi nipakoya ma malo khiimapama miima, hojalo ngiimi kariitii Pinii ka miidopopi hiilyañpa, Kristo Jisu hiilyañ.

¹⁵ Nunuka hembyañ biila hembiinii hii nii lyine ku? Niimpalukoda ngo nunuka haki, miila tiikoda matiirḛ, nunu ngiimi nunuka amee miilañmi harbi kene.

¹⁶ Ngo nunuka ahha baniipa lyido kupeha jije mika luko kopa?

¹⁷ Mohlu abuje nunuko miitii, hojalo aya piigo pama; mohlu nunumi ago nempa linala lyine, niimpalukoda nunumi mohlupa abuje miike nendupa.

¹⁸ Niimpalukoda aya piigopa siikasi kiirañ ayado abuje miiniiñ, ho ngiika nunuka agiñho dalyiho kontii mapa.

¹⁹ Ngiika himme atu atañ, huka agiñ hona ngo wiinga akhii achih chiniibo hiilyañ lyido nii dahepa nunuko Kristo ka henju hiilyañ giitema!

²⁰ Ngo hendo nunuka agiñho siisi dado koda hiila ho ngiika lujju mi lugu dokoda, niimpalukoda ngo hendḛr biilakuma nunumi.

Hagar la Sarah Nyimi ka Lumu Naniiñ

²¹ Ngiimi lukope, nunu hutiina dapo ka ura ho dunañ donii, nunu dapo mi tapa mapo?

²² Niimpalukoda hiila ketii Abraham kii oho anye dune hiila, kone miira loka ho kone hii dasḛr nyimii loka bukonii.

²³ Hojalo miira ka oho hii asiialyo ka henju hoka biiniiñ, dasḛr nyimii loka oho bukonii hii hemme niilo.

²⁴ Siisi siikasi lumunaniiñke: siika nyimii anye kii anye hemme nii do. Kone hii Sinai putoo hokii, miira paka oho bubinii; mo Hagar.

²⁵ Siisi Hagar Arabia daka Sinai Putoo ho dutii; siikasi siisi ka Jerusalem mi ludo, niimpalukoda mo mohka oho agiñho miira pa du.

²⁶ Hojalo Jerusalem ayoh dakii dasḛrdo, ho mo ngunuka annii.

²⁷ Niimpalukoda hiila ketii, “Hempyoto, taluñnii kone huna pema wiinga giimanii; goropa ho gyuto, nunu huna wiinga akhii achih chika manii; niimpalukoda opa koku boka himme atañ abu yado millo dunii ka himme atañmi hentola.”

²⁸ Siisi ngunu, anubarmii atañ, Isak chulipa, hemme koniiñ ka wiinga atañ ke.

²⁹ Hojalo hiika myodu hokii hiilyañ huna asiialyo ka henchañho buko tiinii miihimiiretii hiimi huna Yajiyallo ka henchañho buko tiinii, hiila siisi lyido.

³⁰ Hojalo piniipota nii hiila ludo? “Mompa to miira la miira ka oho mi; niimpalukoda miira ka oho pensi kokiñma dasḛr danii ka oho ka agiñho.”

³¹ Hopa, anubarmii atañ, ngunu miira ka oho make hojalo dasḛr nyimii ka oho ke.